Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 7 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 7 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 7

¹In thu han ziak chungchângah chuan: Mipain hmeichhia khawih loh a ṭha.

²Amaherawhchu, inngaihna a awm ṭhin avângin mipain nupui bîk nei ṭheuh sela, hmeichhia pawhin pasal bîk nei ṭheuh rawh se.

³Pasalin a nupui hnêna a tih tûr chu ti sela, chutiang bawkin nupui pawhin a pasal hnêna a tih tûr chu ti ve rawh se.

⁴Nupui chuan ama taksa chungah thu a nei lo va, a pasalin a nei zâwk a ni; chutiang bawkin pasal pawhin ama taksa chungah thu a nei lo va, a nupuiin a nei zâwk a ni.

⁵Ṭawngṭai tûra in inpêk theih nân rei lo tê atân rem in tih dun chauh loh chuan, a tua mah intidâwng suh u; chumi hnuah chuan in awm dân pangngaiin awm leh thuai ula, chuti lo zawng insûm zawh loh avângin Setanan a thlêm dah ang che u.

⁶Amaherawhchu, a thu pe zâwnga sawi ka ni lo va, a phal zâwnga sawi ka ni zâwk e.

⁷Mi zawng zawng keimah ang hian awm vek se ka duh a; mahse, mi tinin Pathian hnên ata thilpêk bîk kan dawng ṭheuh va, pakhatin kawng khatin, a dangin kawng dangin.

⁸La innei lote leh hmeithaite chu keimah angin awm sela a ṭha.

⁹An insûm theih loh erawh chuan nupui pasal nei mai rawh se, hur aiin inneih a ṭha zâwk si a.

¹⁰Innei tawhte chu ka thu ni lovin, Lalpa thupêk ka hrilh a che u - nupui chuan a pasal ṭhen suh se.

¹¹A ṭhen vêk chuan mi dang nei tawh suh se, a nih loh leh a pasal nên an inrem leh tûr a ni; pasal pawhin a nupui ma suh se.

¹²Mi dang hnênah chuan Lalpa thu ni lovin, keimahin sawi tûr ka nei. Ringtuin ring lo mi nupuiah nei sela, a nupui chuan a hnêna awm zêl a duh chuan ṭhen suh se.

¹³Ringtu hmeichhia pawhin ring lo mi nei sela, a pasal chuan a hnêna awm zêl a duh chuan a ṭhen kher tûr a ni lo.

¹⁴Ring lo pa chu a nupui zârah tihthianghlim a ni a, ringlo nu pawh a pasal zârah tihthianghlim a ni bawk. Chuti ni suh se, in fate chu an thianghlim lo vang; nimahsela, an thianghlim a ni.

¹⁵Amaherawhchu, ring lo zâwkin ṭhen a duh chuan ṭhen mai rawh se; chutiang thilah tawh chuan ringtu chu, a hmei a pain phuar in ni lo ve; Pathian erawh chuan inrem tûrin a ko che u a ni.

¹⁶Nute u, in pasalte in chhandam dawn lo tih engtin nge in hriat? Pate u, in nupuite in chhandam dâwn lo tih engtin nge in hriat?

¹⁷Mi tin hi Lalpan an hnêna a sem ang ṭheuh leh, Pathianin a koh laia an awm dân ang ṭheuhvin awm zêl rawh se; chutianga awm tûrin kohhran zawng zawng ka hrilh ṭhîn a ni.

¹⁸Serh tan tawh koh an awm chuan tihbo tum suh se, serh tan loh koh an awm chuan tan suh se.

¹⁹Serh tan hi eng mah a ni lo va, tan loh pawh eng mah a ni hek lo, a pawimawh chu Pathian thupêk zawm hi a ni.

²⁰Mi tin koh an nih laia an dinhmun ngaiah awm rawh se.

²¹Bawih i nih laiin koh i ni em? Engto tehchiam suh; chhuak thei i nih erawh chuan chhuak mai rawh.

²²Bawih, Lalpa koh chu, Lalpa bawih chhuah a ni; bawih ni lo Lalpa koh chu, Krista bawih a ni.

²³Mana lei in ni tawh e, mihring bawihah awm tawh suh u.

²⁴Unaute u, mi tin kohva in awm laia in dinhmun ngaiah ṭheuh Pathianah awm rawh u.

²⁵Nula leh tlangvâl chungchâng thu-ah chuan Lalpa thupêk eng mah ka nei lo va; amaherawhchu, a ngilneihna azâra Lalpa ngaiha rinawm ka nih hi chhuangin ka ngaih dân ka sawi a ni.

²⁶Hun harsain min nan tâk avângin mahni awm pangngai anga awm mai ṭha ka ti.

²⁷Nupui nei i nih chuan ṭhen tum suh, nei lo i nih chuan nupui zawng suh.

²⁸Nupui i neih pawhin thil i tisual lo ve; nula pawhin pasal a neih chuan thil a tisual lo. Amaherawhchu, nupui pasal neiten harsatna tam tak an tâwk ang, keiin chûng chu pumpelhtîr che u ka duh a ni.

²⁹Unaute u, hun a tawi tâk êm avângin hei hi ka ti a ni; tûn chinah chuan nupui neite chu nei lo angin,

³⁰lusûnte chu sûn lo angin, lâwmte chu lâwm lo angin, leitu chu nei lo angin,

³¹khawvêl thila inhmangte chu inhmang lo angin awm sela ka duh a ni. He khawvêl awm dân hi a boral mêk a ni.

³²Lungkham nei lova in awm ka duh a ni. Nupui nei lo chuan Lalpa tilâwm tûrin Lalpa hna a engto va.

³³Nupui nei erawh chuan a nupui tihlâwm nân khawvêl thil a engto va,

³⁴a rilru a phîr ṭhîn. Pasal nei lo hmeichhia leh nula thianghlim chuan an taksa leh an thlarau vawng thianghlim tûrin Lalpa hna chauh an engto va; pasal nei erawh chuan a pasal tihlâwm nân khawvêl thil a engto ṭhîn.

³⁵Hei hi in tâna sâwt tûr a nih avângin ka sawi a ni; khuahkhirh ka tum che u a ni lo ve, mawi taka in awm theih nân leh Lalpa rawngbâwl tûra in inpumpêk theihna tûrin ka sawi zâwk a ni.

³⁶Mi tu pawhin a nupui hual lakah tidik lova a inhriata, lêngṭûl mai tûr a niha, inneih ṭûla a hriat bawk si chuan, a duh ang chuan ti sela, nei mai rawh se, thil a tisual lo ve.

³⁷Amaherawhchu, nupui nei lo tûra nawr luih ni lova, ama duh thu ang ngeia neih loh tum tlat thei a nih chuan, a duh anga a tih chu a ṭha a, a nupui hual a nei lo chu a ti ṭha e.

³⁸Chutichuan, a nula hual nupuia neitu chuan a ti ṭha e, nei lotu chuan a ti ṭha lehzual a ni.

³⁹Nupui chu a pasal dam chhûng chuan phuar a ni a; a pasal a thih erawh chuan a duh apiang a nei thei ang; amaherawhchu, Lalpaa awm mi a ni tûr a ni.

⁴⁰Nei lova a awm ngaia a awm zêl chu a nihlawh zâwk ka ring. Kei pawh Pathian thlarau neiah ka inngai a ni.