Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA KORINTH 8 Bible Online

KHUAA MITE HNENA TIRHKOH PAULA LEHKHATHAWN PAKHATNA KORINTH 8 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA KORINTH 8

¹Milem biakna thil ei thu chu: Kan za-in ‘hriatna’ kan nei ṭheuh tih kan hria a, chutiang ‘hriatna’ chuan mi a tichapo ṭhîn a, hmangaihna erawh chuan mi a siam ṭha ṭhîn.

²Tu pawhin thil hria nia a inngaih chuan a hriat tûr ang a la hre lo va ni.

³Miin Pathian a hmangaih erawh chuan Pathian mi hriat a ni.

⁴Chutichuan, milem biakna thil hlan ei thu-ah chuan - khawvêlah hian milemte hi eng mah an nih lohzia leh, Pathian pakhat chauh lo chu a dang rêng rêng an awm lohzia kan hria.

⁵Vânah emaw, leiah emaw pathian anga ngaih tam tak an awm thei a, chutiangin pathian tam tak leh lalpa tam tak an awm rêng a ni.

⁶Nimahsela, keini tân zawng Pathian pakhat chauh, Pa, engkim siamtu chu a awm a; keini pawh ama tâna awm kan ni; tin, Lalpa pakhat chauh, Krista chu a awm bawk a; thil engkim hi ama zâra siam a ni a, keini pawh ama zâra awm kan ni.

⁷Amaherawhchu, chu hriatna chu mi zawng zawngin an nei vek lêm lo, tûn thlengin mi ṭhenkhat milem be ṭhang an nih avângin an thil ei chu milem hnêna inthawina anga ngaiin an ei ṭhîn a; an chhia leh ṭha hriatna a chak si lo va, bawlhhlawhin an inhre ṭhîn.

⁸Eng pawh ni se, kan thil ei hian Pathian mit min tluntîr chuang lo; ei lo mah ila kan chhe chuang lo va, ei mah ila kan ṭha chuang hek lo.

⁹Amaherawhchu, fîmkhur rawh u, in zalênna hi engti kawngin emaw rinnaa chak lote tân tlûkna a lo ni hlauh dah ang e.

¹⁰Nang, chutiang hriatna nei, milem biakna ina i chaw ei lai, mi, a chhia leh ṭha hriatna chak lovin hmu ta che sela, milem hnêna thil hlante ei a ngam phah ve dâwn lâwm ni?

¹¹Chuti a nih chuan i hriatna chu ringtu chak lo tân chhiatna a ni ang asin; ani tân pawh Krista chu a thi si a.

¹²Chutianga unaute chunga in tihsuala, an chhia leh ṭha hriatna chu a chak loh nâk alaia, in hliam lehnghâl chuan Krista chunga thil tisual in ni.

¹³Chuvângin, ei leh inin ka unau a tihtlûk si chuan, ka unau chu ka tihtlûk loh nân kumkhuain sa rêng ka ei tawh lo vang.