Read Mizo Lushai KHUAA MITE HNENA TIRHKOH PAULA LEHKHATHAWN PAHNIHNA KORINTH 1 Bible Online

KHUAA MITE HNENA TIRHKOH PAULA LEHKHATHAWN PAHNIHNA KORINTH 1 - Mizo Lushai bible

KHUAA MITE HNENA TIRHKOH PAULA LEHKHATHAWN PAHNIHNA KORINTH 1

¹Pathian duhzâwnga Krista tirhkoh Paula leh kan unaupa Timothea chuan, Korinth khuaa Pathian kohhran leh Akaia ram pum puia mi thianghlim awm zawng zawng chibai kan bûk e.

²Pathian, kan Pa leh Lalpa Isua Krista hnên ata khawngaihna leh remna in hnênah awm rawh se.

³Kan Lalpa Isua Krista Pa leh Pathian, khawngaihnaa khat, thlamuanna petu Pa Pathian hnênah chuan lâwmthu i sawi ang u.

⁴Pathianin min thlamuannain hrehawm tinrêng tuarte kan thlamuan ve theih nân, ani chuan kan hrehawm tuar zawng zawngah min thlamuan ṭhîn.

⁵Krista tuar anga kan tuar tam poh leh Krista zâra kan thlamuanna chu a pung ṭhîn a,

⁶Kan tuarna hi in thlamuanna tûr leh in chhandamna tûr a ni. Kan thlamuanna hi nangni pawhin hrehawm kan lo tuar tawh ang chu chhel tak leh thlamuang taka in tuar ve theihna tûr a ni.

⁷Hrehawm min tuarpuitu in ni angin thlamuanna min chanpuitu tûr pawh in ni tih kan hria e; chuvângin, in chungah beiseina nghet tak kan nei a ni.

⁸Unaute u, Asia rama hrehawm kan tuar kha in hriat loh kan duh lo ve; khatia tuar zawh rual loh phurritin min delh a, dam rêng kan inbeisei tawh lohzia kha.

⁹Thi ngei tûra tih niin kan inhria a; mahse, mahni inring lova, mitthi kaithotu Pathian chu kan rin zâwkna tûr a lo ni a.

¹⁰Chutia thih hlauhawm taka kan awm chu min chhan chhuak a, min chhan chhuak leh bawk ang a; min la chhan chhuak zêl ang tih kan ring tlat a ni.

¹¹Ṭawngṭaiin min ṭanpui ula, mi tam tak ṭawngṭaina avângin khawngaihna kan dawng ang a, keimahni avângin mi tam takin Pathian hnênah lâwmthu an la sawi ang.

¹²Hei hi ka chhuang a ni: Mihring finna vâng ni lovin, Pathian finna vâng zâwkin Pathian hmuhah nun tlang leh rilru ngîl tak puin mi zîngah kan awm ṭhîn a, nangni zîngah phei chuan chutiangin kan awm lehzual ṭhîn tih ka chhia leh ṭha hriatna pawhin mi hriatpui a ni.

¹³Kan lehkhaah khân, in chhiara in hriatthiam loh tûr eng mah kan ziak lo va, in la hriatthiam vek ka ring.

¹⁴Tûnah in la hrethiam vek lo na a, Lalpa Isua Nî-a kan chhuan tûr in ni ang bawkin in chhuan tûr kan ni asin.

¹⁵Chu chu ka rin tlat avângin hlâwkna thuah hnih in chan theih nân tlawh hmasak phawt che u ka tum a,

¹⁶chuta ṭangin Makedonia ram ka fang zêl ang a, chumi zawhah Makedonia aṭanga Judai ram pana ka kal pahin rawn tlawh leh che u ka tum a, ka kalna tûra min puih ka beisei a ni.

¹⁷Hei hi ka tum dân chu a ni a, tum mumal nei lo ka ni em ni? A nih loh leh mihring taka a chânga, “Ni e, ni e,” tia a châng leh, “Ni lo ve, ni lo ve,” ti mai mai ka ni em ni?

¹⁸Pathian chu a rinawm avângin in hnêna kan thu pawh a chânga, “Ni e,” a chânga, “Ni lo ve,” tih ang hi a ni lo.

¹⁹Kei leh Silvana leh Timothean in hnêna a chanchin kan hril, Isua Krista, Pathian Fapa chu, “A ni,” leh “A ni lo,” a ni kawp ve si lo. Chutih ahnêkin amahah chuan “A ni,” tih chauh a awm.

²⁰Pathian thutiam zawng zawng chu amahah chuan, “A ni,” tih vek a ni; chuvângin, keimahni avânga Pathian a ropuina tûrin Isua Krista zârah, “Amen,” kan ti ṭhîn a ni.

²¹Kristaa keini leh nangni min tichaktu leh min serh hrangtu chu Pathian a ni.

²²A ta-a min chhinchhiahtu leh kan thinlunga zakhamna Thlarau min petu pawh Pathian bawk a ni.

²³Ka nunna chhâlin thuhretu atân Pathian ka lam a ni, nangmahni zuah tûr che uin a ni Korinth khuaa ka lo kal tâk loh ni.

²⁴In rinna chungah intihlal kan tum lo ve, in lâwmna atân nangni nên kan thawk tlâng a ni zâwk, rinnaa ding in ni si a.