Read Mizo Lushai KHUAA MITE HNENA TIRHKOH PAULA LEHKHATHAWN PAHNIHNA KORINTH 3 Bible Online

KHUAA MITE HNENA TIRHKOH PAULA LEHKHATHAWN PAHNIHNA KORINTH 3 - Mizo Lushai bible

KHUAA MITE HNENA TIRHKOH PAULA LEHKHATHAWN PAHNIHNA KORINTH 3

¹Mahni insawimawi kan ṭan leh ta em ni? A nih loh leh, mi dangte ang bawkin sawimawina lehkha kan rawn ken emaw, in hnên ata kan lâk emaw a ṭûl ta em ni?

²Nangni hi kan lehkha, kan thinlung chhûnga ziak, mi tin hriat leh chhiar chu in ni asin.

³Nangni hi Krista lehkha, keimahni min ziaktîr, lehkhatuia ziak ni lo, Pathian nung Thlarauva ziak, lung phêka ziak ni lo, tisa thinlung phêka ziak chu in ni tih a lang chiang a ni.

⁴Krista zârah chutiang tak chuan Pathian kan ring a ni.

⁵Keimahni ngawt chuan kan tlin lo va, keimahni tih anga sawi tûr eng mah a awm hek lo, kan tlin theihna chu Pathian min pek a ni zâwk.

⁶Ani chuan Thuthlung Thar rawngbâwl tlâkah min siam a, chu chu Dân, hawrawpa ziak ang kha a ni lo ve; Thuthlung Thar, Thlarauva ziak chu a ni zâwk. Dân, hawrawpa ziak khân thihna a thlen a, Thlarauva ziak erawh chuan nunna a thlen a ni.

⁷Mosia hmêl êng, reh leh mai tûr pawh Israel faten an en reng ngam loh khawpin a ropui a; lunga hawrawpa ziak, thihna thlentu rawngbâwlna mah khati taka ropui a nih chuan,

⁸Thlarau rawngbâwlna chu a ropui lehzual dâwn lâwm ni?

⁹Thiam loh chantîrna rawngbâwlna mah a ropui chuan, thiam chantîrna rawngbâwlna chu a va ropui dâwn êm!

¹⁰Chumi kawngah chuan, ropui taka kha, a aia ropui zâwk daih a lo awm tâk avângin a ropui reng tawh lo ve.

¹¹Reh leh ta mai mah kha chuti taka ropui a nih chuan, awm hlen tûr chu engti takin ropui ang maw!

¹²Chutiang beiseina chu kan neih avângin keini zawng kan huai êm êm a ni. Mosia tih ang khân kan ti lo ve.

¹³Ani chuan a hmêl êng a reh thlenga Israel faten an en reng loh nân, hmaikhuhnain a hmai a khuh a.

¹⁴An rilru pawh a chawlawl a ni, vawiin thleng hian Thuthlung Hlui bu an chhiar apiangin chu khuhna chuan a la khuh reng a ni: Kristaah chauh chu khuhna chu lâk bo a ni.

¹⁵Tûn thlengin Mosia lehkhabu an chhiar apiangin chu khuhna chuan an thinlung chu a la khuh reng a ni.

¹⁶Nimahsela, Lalpa Isua lam an hawi hun apiangah chu khuhna chu lâk bo a ni tawh ang.

¹⁷Lalpa chu Thlarau a ni a, Lalpa Thlarau awmna apiangah zalênna a awm ṭhîn.

¹⁸Chutichuan, keini, hmai khuh lohva awm zawng zawng hian Lalpa ropuina chu kan lantîr a, ropuina aṭanga ropui deuh deuh atân ama anpuia awm tûrin tihdanglam kan ni - chu chu Lalpa tih a ni a, ani chu Thlarau a ni.