Read Mizo Lushai KHUAA MITE HNENA TIRHKOH PAULA LEHKHATHAWN PAHNIHNA KORINTH 4 Bible Online

KHUAA MITE HNENA TIRHKOH PAULA LEHKHATHAWN PAHNIHNA KORINTH 4 - Mizo Lushai bible

KHUAA MITE HNENA TIRHKOH PAULA LEHKHATHAWN PAHNIHNA KORINTH 4

¹Chutichuan, khawngaihna zâra he rawngbâwl hna hi kan hmuh avângin kan zâm lo ve.

²Thil zahpuiawm, a rûka an tih ṭhinte chu kan hnâwl a. Fin vervêk thawhin Pathian thu a dik lo zâwnga sawi kan chîng ve hek lo. Thutak kan târlang a, Pathian hmaah mi tin chhia leh ṭha hriatna mittlunga awm kan tum zâwk ṭhîn a ni.

³Kan Chanchin Ṭha hril hi khuh a nih pawhin, boral mêkte tân chauh khuh a ni ang.

⁴Krista chu Pathian anpui ngei a ni a; mahse, Krista ropuina Chanchin Ṭha êng chu hmu lo tûrin tûnlai khawvêl pathian hian ring lote rilru mit chu a tihdelsak a ni.

⁵Keimahni chanchin kan hril lo va, Isua Krista chu Lalpa a nih thu kan hril zâwk ṭhîn, keini pawh Isua avânga in bawih kan nih thu kan hril bawk ṭhîn.

⁶Pathian ropuina Isua Krista hmêla lo lang chu kan hriat chian theih nân, “Thimah êng lo awm rawh se,” titu Pathian chuan kan thinlungte hi a chhun êng ta a ni.

⁷Nimahsela, he thiltihtheihna ropui tak hi keimahnia chhuak ni lovin, Pathiana chhuak a ni zâwk tih a lan chian theih nân, chu ro chu hlumbêlah kan vawng a ni.

⁸Kawng tinrêngah nêk chêpin kan awm a, nêk beh zawng kan ni si lo; tihmanganin kan awm a, kan bei a dawng hek lo;

⁹tihduhdahin kan awm a; mahse, kalsan kan ni si lo; vuak thlûkin kan awm a; mahse, tihhlum zawng kan ni lo.

¹⁰Isuaa nunna chu kan taksaah hian a lan theih nân, a thihna pawh kan taksaah hian kan pu reng a ni.

¹¹Isua nunna chu kan taksa thi theiah hian a lan theih nân, keini nungdama awmte pawh hi Isua avânga thi tûra tih kan ni fo a ni.

¹²Chutichuan, keimahniah hian thihnain a thawk ṭhîn a, nangmahniah erawh chuan nunnain a thawk ṭhîn a ni.

¹³Lehkha Thu-in, “Ka ring a, chuvângin ka sawi a ni,” a ti a; chutiang rinna thinlung chu puin keini pawhin kan ring a, thu kan sawi ṭhîn a ni.

¹⁴Lalpa Isua kaithotu chuan keini pawh Isua nên min kaitho ve ang a, nangniho nên a hmaah min dintîr dâwn tih kan hria.

¹⁵Hêng zawng zawng hi in ṭhatna tûr a ni a; tichuan, mi tam tak zîngah Pathian khawngaihna a pung ang a, Pathian ropuina tûrin lâwmthu sawina pawh nasa takin a pung ang.

¹⁶Chumi avâng chuan kan zâm lo ve, kan pâwn lam mihring hi awngrawp telh telh mah sela, kan chhûng lam mihring chu ni tin siam tharin a awm zâwk a ni.

¹⁷Rei lo te chhûnga kan hrehawm tuar nêp tak hian chatuan ropuina, khaikhin rual loh khawpa nasa chu min siamsak a ni.

¹⁸Thil hmuh theihte chu kan thlîr lo va, thil hmuh theih lohte chu kan thlîr zâwk si a. Thil hmuh theihte chu a ral mai dâwn a, thil hmuh theih lohte erawh chu chatuanin a awm ang.