Read Mizo Lushai KHUAA MITE HNENA TIRHKOH PAULA LEHKHATHAWN PAHNIHNA KORINTH 6 Bible Online

KHUAA MITE HNENA TIRHKOH PAULA LEHKHATHAWN PAHNIHNA KORINTH 6 - Mizo Lushai bible

KHUAA MITE HNENA TIRHKOH PAULA LEHKHATHAWN PAHNIHNA KORINTH 6

¹Pathian khawngaihna in dawn chu ṭangkaipui ngei tûrin, keini amah thawhpuitute hian kan ngên a che u:

²“A hun takah ka ngaithla che a, Chhandamna ni-ah ka ṭanpui che,” a ti si a. Ngai teh u, tûn hi a hun tak chu a ni a, tûn hi chhandamna ni chu a ni.

³Kan rawngbâwl hna hi miten an dem loh nân an ngaimawh zâwng eng mah kan ti lo.

⁴Kan tih apiangah Pathian rawngbâwltute ni âwm rêngin mi mittlungin kan awm zâwk ṭhîn. Tihduhdahna te, hrehawm te, nêkchêp te chhel takin kan tuar a.

⁵Vuak kan tuar a, lung inah kan tâng a, tlâng chîl kan tâwk a, mutmu pawh tuah thei lovin kan thawk rim a, chaw kan tlachham a;

⁶thianghlimnaah te, hriatnaah te, ṭhatnaah te, ngilneihnaah te, Thlarau Thianghlimah te, hmangaihna tak takah te,

⁷thu dik sawiah te, Pathian thiltihtheihna kan hman dânah te, Pathian rawngbâwltute ni âwm rêngin kan awm a: felna râlthuam chu ding lam leh vei lama kengin kan ṭang ṭhîn.

⁸Ngaih ropui kan hlawh a, ngaih nêp kan hlawh bawk a; min fak a, min dem bawk a; thu dik kan sawi a, bumtu-ah min ngai bawk si;

⁹tu khaw hriat tham kan ni lo va; mahse, mi tinin min hre bawk si. Thi ang kan ni a; mahse, kan nung si; thunun kan tâwk a, tihhlum kan ni si lo;

¹⁰lungngaihna kan tawhin lâwmna tûr kan nei zêl si; pachhe hle mah ila mi dang kan tihausa si; eng mah kan nei lo va, engkim kan ta a ni bawk si.

¹¹Aw Korinth mite u, thinlung inhawng takin in hnênah thu kan sawi hi.

¹²Eng mah zêp kan nei lo va, nangmahni in inhawng lo a ni zâwk e.

¹³Fate hnêna thu sawi angin sawi ta ila, nangni pawh keimahni angin inhawng ve rawh u.

¹⁴Ring lo mite thurualpui suh u. Dikna leh sualnain inṭâwm theih eng mah an nei lo, êng leh thim pawh a inkawp thei em ni?

¹⁵Krista leh Beliara pawhin inlaichînna eng nge an neih? Ringtu leh ring lovin eng nge chan dun an neih?

¹⁶Pathian Tempul leh milemte pawhin eng nge inzawmna an neih? Keini zawng Pathian nung Tempul kan ni si a. Pathianin, “Anmahniah ka awm ang a, ka chên chilh ang; An Pathian ka ni ang a, anni pawh ka mite an ni ang,” a tih ang khân.

¹⁷Chuvângin, “ ‘An zîng ata lo chhuak ula, a hrangin awm rawh u, Thil bawlhhlawh pawh khawih suh u,’ Lalpan a ti.” Chutichuan, “ ‘Ka lâwm ang che u a,

¹⁸In tân Pa ka ni ang a, Nangni pawh ka tân fanu fapa in ni ang,’ Lalpa Engkimtitheia chuan a ti.”