Read Mizo Lushai KHUAA MITE HNENA TIRHKOH PAULA LEHKHATHAWN PAHNIHNA KORINTH 9 Bible Online

KHUAA MITE HNENA TIRHKOH PAULA LEHKHATHAWN PAHNIHNA KORINTH 9 - Mizo Lushai bible

KHUAA MITE HNENA TIRHKOH PAULA LEHKHATHAWN PAHNIHNA KORINTH 9

¹Mi thianghlimte rawngbâwlsak thu hi in hnêna ziak tam a ngai lo ve,

²ṭanpui in peihzia ka hre si a. “Nikum khân Akaia ram chu an inpuahchah tawh,” tiin, nangmahni chhuang takin Makedonia rama mite ka hrilh ṭhîn a, in ṭhahnemngaihna chuan mi tam tak a tiharh ta a.

³He thilah hian ka fak sual loh nân che u leh ka sawi ang ngeia in lo inpeih theih nân unaute hi ka rawn tîr a ni.

⁴Makedonia rama mite kan rualin lo kal ve ta sela, in la inpeih lo tih an rawn hmuh chuan, kan rin tehlul che u vei nên, in tân chauh ni lovin, kan tân pawh a zahthlâk hle dâwn asin.

⁵Thawhlâwm in tiam tawh sate kha lo ching fel diam tûrin unaute hi rawn tirh hmasak ṭûlin ka hria a; in lo inpeih chuan in thil pêkte chu lâk luihsak che u ang ni lovin, nangmahni thu ngeia pêk a ni tih a lang chiang dâwn a ni.

⁶Hre rawh u, hetiang kawngah hian tuh tlêm chuan a seng tlêm ang a, tuh tam erawh chuan a seng tam ang.

⁷Mi tinin an rilrua an tum sa ang chu ui lovin, tih luih ang ni hek lovin pe ṭheuh rawh se; Pathian chuan lâwm taka petu a ni a hmangaih ni.

⁸Pathian chuan in mamawh thil ṭha tinrêng a pe ṭeuh thei che u a, in mamawh aia tam pawh thil ṭha in tih theih nân a pêk belhchhah thei che u a ni:

⁹“A sem darh a, tlachhamte a pe a, a ngilneihna chu kumkhuain a pângngai reng a ni,” tih ziak ang khân.

¹⁰Tuh atâna chi petu leh ei atâna chaw petu chuan chi a pe ṭeuh vang che u, a ṭhantîr ang a, in thilphalna rah chu a tipung bawk ang.

¹¹Kawng tinrênga thilphal hle tûrin a tihausa ang che u; tin, keimahni hmanga in thil pêk vâng hian Pathian hnênah lâwmthu an la sawi ang.

¹²In chhawmdâwl rawngbâwl hna hian mi thianghlimte mamawh a phuhrûksak chauh ni lovin, Pathian hnêna lâwmthu sawina pawh nasa takin a tipung bawk ang.

¹³He in rawngbâwl hna hian Krista Chanchin Ṭha in pawma in zawmzia te, an tân leh mi dang zawng zawng tân in thilphalzia te a tilang a, chu chuan Pathian a chawimawitîr ngei ang.

¹⁴Anni pawhin Pathian khawngaihna in dawn nasat êm avâng hian duhsak takin in tân an ṭawngṭai ngei ang.

¹⁵A thilpêk sawi hleih theih loh avâng hian Pathian hnênah lâwmthu awm rawh se.