Read Mizo Lushai RAMA MITE HNENA TIRHKOH PAULA LEHKHATHAWN GALATIA 1 Bible Online

RAMA MITE HNENA TIRHKOH PAULA LEHKHATHAWN GALATIA 1 - Mizo Lushai bible

RAMA MITE HNENA TIRHKOH PAULA LEHKHATHAWN GALATIA 1

¹Kei Paula, tirhkoh, mihring tirh ni lo, mihring ruat pawh ni lo, Isua Krista leh mitthi zîng ata amah kaithotu Pa Pathian ruata hian,

²kan hnêna unau awm zawng zawngte nên hian, Galatia rama kohhrante chibai kan bûk a che u.

³Pathian, kan Pa leh Lalpa Isua Krista hnên ata khawngaihna leh remna in hnênah awm rawh se.

⁴Pathian, kan Pa duhzâwng zâwmin, tûn hun ṭha lo laka min chhan chhuak tûr leh kan sualte min tlen faisak tûrin, Krista chu amah a inpe ta si a.

⁵Pathian hnênah chuan ropuina chatuan chatuanin awm rawh se. Amen.

⁶Krista khawngaihnaa kotu che u chu kalsanin, ‘Chanchin Ṭha’ chi dang in pawm leh ta thut mai hi mak ka va ti êm!

⁷Chanchin Ṭha chi dang a awm lo asin, nangmahni tibuaitute khân Krista Chanchin Ṭha tihdanglam an tum mai a ni zâwk.

⁸Keini pawh ni ila, vân ata lo chhuk vântirhkoh pawh ni sela, kan hrilh tawh che u ni lo, ‘Chanchin Ṭha’ an rawn hrilh che u chuan ânchhe dawngin awm rawh se.

⁹Ka hrilh tawh che u a, tûnah pawh ka hrilh nawn leh a che u: in pawm tawh ni lo, ‘Chanchin Ṭha’ dang rawn hrilhtu apiang che u chu ânchhe dawngin awm rawh se.

¹⁰Tûnah hian mihring nge tihlâwm ka tum Pathian? Mihring lâwmzâwng sawi tum angin ka lo lang ṭhîn em ni? Mihring tihlâwm tum ni ila Krista bawih ka ni lo vang.

¹¹Unaute u, ka hrilh a che u, Chanchin Ṭha ka hril hi mihring laka chhuak a ni lo.

¹²Tu hnên aṭang maha dawng ka ni lo va, tu man mi zirtîr hek lo; Isua Krista ngei chuan ka hnêna a puan a ni.

¹³Juda fîr ka nih laia ka awm dân in hria e, Pathian Kohhran nasa takin ka tiduhdah a, nuai bo ka tum ṭhîn a nih kha.

¹⁴Kan sakhaw biakna lama thlahtute thu hlan chhâwn vawn chungchângah pawh ka rualpui Juda-te zîngah a firfiak ber ka ni ṭhîn.

¹⁵Nimahsela, Pathian chuan ka nu pum chhûng aṭangin mi serh hrang a, a khawngaihnain mi ko ta a.

¹⁶Jentail-te zînga a Chanchin Ṭha ka hril theih nân a Fapa chu ka hnêna rawn puan ṭha a tih thu mi hriattîr lai khân mi dang tu mah ka râwn lo;

¹⁷ka nih ve hmaa tirhkoh lo ni tawh Jerusalem-a mite hnênah ka kal hek lo. Arabia ramah ka kal ta daih zâwk a; tin, Damaska khuaah ka lo kîr leh ta chauh a ni.

¹⁸Kum thum hnuah erawh chuan Jerusalem-ah Kifa hmêlhriat tûrin ka han kal a, a hnênah ni sâwm leh panga ka châm a.

¹⁹Nimahsela, Lalpa unau Jakoba tih loh chu tirhkoh dangte tu mah ka hmu lo.

²⁰Ka thu ziak hi a dik a ni, Pathian hmaah pawh ka daw lo ve.

²¹Chumi hnu chuan Suria leh Kilikia ramah te ka kal leh ta a.

²²Judai rama Kristian Kohhrante phei chuan mi la hmêlhriat lo va,

²³“Hmâna min tiduhdahtu khân rinna thu nuai bo a tum ṭhin kha a hril ve ta thung,” tih thâwm chauh an hria a;

²⁴ka chunga thil thleng avângin Pathian an fak a.