Read Mizo Lushai RAMA MITE HNENA TIRHKOH PAULA LEHKHATHAWN GALATIA 2 Bible Online

RAMA MITE HNENA TIRHKOH PAULA LEHKHATHAWN GALATIA 2 - Mizo Lushai bible

RAMA MITE HNENA TIRHKOH PAULA LEHKHATHAWN GALATIA 2

¹Kum sâwm leh pali a vei hnuin Barnaba nên Jerusalem-ah kan han kal leh a, Tita pawh kan hruai bawk a.

²Pathianin mi tirh avânga kal ka ni. Hruaitu lian deuh deuhte chauh a fâlin ka hmu a, Jentail-te hnêna Chanchin Ṭha ka tlângaupui ṭhin hi ka hrilh hlawm a, tûn hma leh tûna ka rawngbâwl zêlna hi hahthlâk thlâwn mai a nih lohna tûrin.

³Nimahsela, ka mi hruai Tita pawh chu Grik mi a ni na a, serh an tan luihtîr chuang lo.

⁴Ringtu der, Isua Kristaa zalênna kan neih enthla tûra an zînga lût ru vete erawh chuan bawiha luhtîr leh min tum a.

⁵Amaherawhchu, Chanchin Ṭha thu dik chu in tân an tihdanglam loh nân an thu chhe tê pawh zawm kan duh lo.

⁶Hruaitu pawimawh nia langte chu an nih tak tak leh tak tak loh ka tân a dang chuang lo, Pathianin pâwn lam lan dân mai a ngaisâng lo ve, hêng mite ngei pawh hian sawi tûr eng mah an nei chuang lo.

⁷Neih ahnêkin Petera chu serh tante zînga Chanchin Ṭha hrilh hna kawltîr a ni ang bawkin, serh tan lohte hnêna Chanchin Ṭha hrilh hna ka hnênah kawltîr a ni tih an hmu a.

⁸Serhtante tâna tirhkoh ni tûra Petera thuamtu chuan, Jentail-te tâna tirhkoh ni tûrin kei pawh mi thuam a ni.

⁹Tichuan, kohhran bana an ngaih ber Jakoba te, Kifa te leh Johana te pawh chuan he chanvo ka dawn hi an hmuhin, thawk ho kan nih entîr nân Barnaba nên inpâwlna kut ding lam min pe ta zâwk a; keinin Jentail-te zîngah rawng kan bâwl ang a, anniin serh tante zîngah.

¹⁰An zînga retheite erawh chu hre reng tûrin mi phût a, chu lah chu ka lo tum sa rêng a ni si a.

¹¹Tin, Kifa chu Antiokei khuaa a lo kal lai khân demawm takin a awm a, a langin hmai chhanah ka khak a.

¹²Jentail-te zîngah chaw a ei ve ṭhîn a; mahse, Jakoba tirh mi ṭhenkhat Jentail serhtantîr tumtute chu a hlau va, an lo thlen hnu chuan a tîm a, a inthiarfihlîm ta a.

¹³Juda dangte pawh chuan a tih dân chu an zui ve a, Barnaba meuh pawh an tih dân chuan a hruai kawi ta a.

¹⁴An thiltih dân chu Chanchin Ṭha thu nên a inhmeh lo tih ka hmuhin, an zaa hmaah Kifa hnênah chuan, “Nang Juda i ni a, Juda anga awm lovin Jentail-te angin i han khawsa a, chuti chung chuan engtizia nge Jentail-te chu Juda mi anga awmtîr i tum?” ka ti a.

¹⁵Keini zawng Juda mi rênga piang kan ni a, ‘Jentail mi sual,’ an tih ṭhinte kan ni lo.

¹⁶Amaherawhchu, Dân zawm vâng ni lovin, Isua Krista rin avâng chauhvin miin Pathian hmaah thiam an chang thei a ni tih kan hria; Dân zawm vâng ni lova, Krista rin avânga Pathian hmaa thiam kan chan theih nân, keini ngei pawh hian Kristaah chuan rinna kan nghat a ni. Tu man Dân zawm avângin Pathian hmaah thiam an chang zo lo vang.

¹⁷Krista rin avânga Pathian hmaa thiam chan tum keiniho hi, ‘Jentail mi sualte ang chiaha ngaih kan nih si chuan, Krista chuan sual rawng a lo bâwl tihna em ni?’ Ni awkawng lo ve.

¹⁸Ka lo ṭhiat tawh Dân vêk chu din thar leh ka tum si chuan, a bawhchhetu ka ni tih a chiang a ni.

¹⁹Kei chuan Dân avângin Dân chu ka thihsan tawh a ni; Pathian lama ka nun theih nân Krista hnênah krawsa khenbeh ka ni tawh.

²⁰Keima nun pangngaia nung ka ni tawh lo va; keimahah hian Krista chu a nung tawh zâwk a ni. Tûna tisaa ka nung hi, mi hmangaiha ka tâna nun petu, Pathian Fapa ringa nung ka ni.

²¹Pathian khawngaihna hi ka hnâwl dâwn lo. Dân zawm avânga Pathian hmaa thiam chan theih a nih chuan, Krista thihna hi a thlâwn mai a ni ang.