Read Mizo Lushai RAMA MITE HNENA TIRHKOH PAULA LEHKHATHAWN GALATIA 3 Bible Online

RAMA MITE HNENA TIRHKOH PAULA LEHKHATHAWN GALATIA 3 - Mizo Lushai bible

RAMA MITE HNENA TIRHKOH PAULA LEHKHATHAWN GALATIA 3

¹Aw Galatia rama mi â-te u, tu nge dawi che u? In mit ngeia hmu ve ang maia chiangin Krista khenbeh thu hrilh in nih kha.

²Min hrilh teh u, Thlarau in dawn kha Dân in zawm vâng nge, Chanchin Ṭha in hriata in rin tâk vâng?

³Chuti êma â in lo ni maw? Thlarauva ṭan tawh siin tisa thilah in tâwp dâwn em ni?

⁴In chunga thil thleng zozai kha engmah lo mai mai em ni? Ni âwm lo tak le!

⁵Phal taka thlarau pe che ua, in zînga thil mak ti ṭhîntu Pathian khân, Dân in zawm avânga ti nge a nih, Chanchin Ṭha in hriat in awih tâk avângin?

⁶“Abrahama chuan Pathian a ring a, thiam changah pawm a ni ta,” tih ang khân a ni zâwk asin.

⁷Abrahama fa dik takte chu ringtute hi an ni tih hre ta che u.

⁸Tin, Lehkha Thu chuan Jentail-te pawh rinna avângin Pathian chuan thiam a chantîr dâwn tih a lo hmu lâwk a; tichuan, Abrahama hnênah, “Nangmahah chuan hnam tin malsâwmin an awm ang,” tiin Chanchin Ṭha chu a lo hril diam tawh a ni.

⁹Tichuan, Abrahaman a rin anga ring ve apiangin malsâwmna chu an dawng ta a ni.

¹⁰Dân zawm innghah nâna hmangte chu ânchhe dawng mai an ni; “Dân lehkha thu-a chuang zawng zawng zâwma ti vek lo chu ânchhe dawng an ni,” tih ziak a ni si a.

¹¹Dân zawm avângin Pathian hmaah tu mah thiam chang zo an awm lo tih a chiang a ni, “Rinna avânga thiam chang chu a nung ang,” tih a ni si a.

¹²Dân chuan, “Thupêk zâwm vektu chu a nung ang,” a ti mai a, rinna a sawi tel lo.

¹³“Thinga khai chu ânchhe dawng a ni,” tia ziak ang khân, Krista chuan kan tân ânchhia chu phurin, Dân ânchhe lak ata min chhan chhuak ta a.

¹⁴Tichuan, Pathianin Abrahama mal a sâwmna chu Jentail-te hnênah Kristaah chuan a lo thleng ta a, keini hian Thlarau pêk tiam chu rinna avângin kan lo dawng ta a ni.

¹⁵Unaute u, entîr nân mihring tih dân han sawi ta ila - Miten thu an lo thlun fel tawh chuan, mihring thuthlung mai a ni nain tu man an phelh leh ngai lo, belh pawh an belh ngai lo.

¹⁶Abrahama leh a chi thlah hnênah chauh Pathianin thu a tiam a nih kha; mi tam tak chungchâng a sawi lo, chi thlahte ti lovin, mi mal thu sawiin, “I chi thlah,” a ti zâwk a ni, chu mi chu Krista hi a ni.

¹⁷Ka sawi tum chu hei hi a ni - Kum zali leh sawmthum hnua dân lo awm ta khân Pathian thuthlun chu a ṭhiat chuang lo, a thutiam pawh chu a tidanglam chuang hek lo.

¹⁸Dân zawm avângin roluahtu nih theih se, Pathian thutiam vâng a ni lo vang; Pathian erawh chuan a thutiam avângin a ni Abrahama hnênah roluahtu tûr a pêk tâk ni.

¹⁹Chuti ni se, Dân hi engati nge pêk a nih? Bawhchhiatna hi eng ang tak nge tih tilang tûrin vântirhkohte palaia hmangin pêk a ni; Abrahama hnêna Fa a tiam kha a lo lan hma atân chauh a ni.

²⁰Mi pakhat tân palai awm a ṭûl lo ve, Pathian chu pakhat chauh a ni si.

²¹Chuti ni se, Pathian thutiam hi Dân hian a kalh em ni? Kalh teh suh e! Mi tinung thei Dân pêk ni sela, chu Dân zawm avâng chuan Pathian hmaah tu pawh thiam chan theih a ni ang chu.

²²Nimahsela, Lehkha Thu chuan, “Engkim hi sual thuhnuaiah a awm tawh,” a ti a; tichuan, Isua Krista rin avânga dawn tûr thiltiam chu a ring apiangte hnêna pêk a ni.

²³Rinna thu a lo thlen hma kha chuan Dânin mi a khuahkhirh a;

²⁴rinna thu tihlan fiah a nih hma chuan min kaihruai a. Tin, rinna avânga thiam kan chan theihna tûrin

²⁵Dân chu Krista lama min kaihruaitu a ni a; mahse, rinna thu chu a lo thlen tâk avângin kaihruaitu hnuaiah kan awm tawh lo ve.

²⁶Tichuan, Krista Isua in rinna avângin in za-in Pathian fate in ni ta;

²⁷Kristaa baptisma chang apiangte chu Krista chuan in inthuam ta a ni.

²⁸Juda leh Jentail, bawih leh bawih lo, mipa leh hmeichhia a awm chuang tawh lo, Isua Kristaah chuan in za-in pumkhat in ni.

²⁹Krista mi in nih tawh chuan Abrahama thlahte in ni, thutiam anga roluahtu tûrte chu.