Read Mizo Lushai RAMA MITE HNENA TIRHKOH PAULA LEHKHATHAWN GALATIA 4 Bible Online

RAMA MITE HNENA TIRHKOH PAULA LEHKHATHAWN GALATIA 4 - Mizo Lushai bible

RAMA MITE HNENA TIRHKOH PAULA LEHKHATHAWN GALATIA 4

¹Ka sawi tum chu han sawi zêl ila: Fapa chu ro zawng zawng khâwmtu tûr ni mah se, naupang a la nih chhûng chu a neitu tak a ni chungin bawih ang leka cheibâwl a ni;

²a pa hun tiam a thlen hma chu enkawltute hnuaiah a awm ṭhîn.

³Keini pawh chutiang chuan kan awm - naupang kan nih lai khân khawvêl zirtîrna dik lo hnuaiah bawih kan ni a.

⁴A hun tak a lo thlen meuh chuan Pathianin a Fapa chu a rawn tîr a.

⁵Ani chu Dân hnuaia awmte min tlan tûr leh fapa dinhmuna min dintîr tûrin, hmeichhe laka piangin Dân hnuaiah a rawn seilentîr a.

⁶Fa in ni tih a chian nân Pathian chuan a Fapa Thlarau chu kan thinlung chhûngah a rawn tîr a, “Abba, ka Pa,” tiin a au chhuak ṭhîn.

⁷Tichuan, bawih in ni tawh lo va, fa in ni ta zâwk a, fa in nih chuan Pathian zâra roluahtu tûrte in ni.

⁸Tûn hma khân Pathian in la hre ngai lo va; chuvângin, an pianphung rêng pawha Pathian ni hlei lote bawihah in awm ṭhin kha.

⁹Tûnah zawng Pathian in lo zawm ta a - Pathianin a zawm ta che u tih tûr a ni zâwk mah ang chu; engtizia nge khawvêl zirtîrna dik lo mai mai, eng mah ni hlei lote lam in hawia, an bawih nih leh in duh tâk mai?

¹⁰Ni te, thla te, hun te, kum te serh bîk in neih leh tâk hi!

¹¹In tân tha ka sêng thlâwn ang tih ka hlau a ni.

¹²Unaute u, keimah anga awm tûrin ka ngên a che u, nangmahni ang maiin kei pawh ka awm a, tu man mi tihchhiat ngai loh kha.

¹³In hnêna Chanchin Ṭha ka rawn hril hmasak ṭum kha ka bawrhsâwm vâng a ni tih in hria e;

¹⁴ka taksa chu in tân buaipuiawm tak ni mah se, mi hmusit lo va, mi ten hek lo; Pathian vântirhkoh ang maiin, Isua Krista ni hial âwmin mi lo lâwm a.

¹⁵Theih ni phei se in mitte kher chhuakin mi pêk in huam tih ka hria; nihlawh in intih tehlul nên, engtizia nge ni ta?

¹⁶In hnêna thu dik tak ka sawi avângin in hmêlma ka ni ta em ni?

¹⁷Mi dodâltute hian a ṭha lam zâwnga rawn ngaihsak che u an ni lo va, lâk hran che ua, anmahni in hlutsak an duh vâng mai a ni.

¹⁸In zînga ka awm loh pawhin a ṭha lam zâwnga rawn ngaihsak che u mi dang an awm phawt chuan a lâwmawm zêl e.

¹⁹Naute u, Krista anna in neih hma chu nau veiin ka vei leh che u hi.

²⁰Tûnah in zînga chêng ni ila ka va ti êm, ka aw ki pawh a dang tûr! A tihngaihna tak ka hre lo va che u.

²¹Dân hnuaia awm duhte u, mi hrilh rawh u, Dân thu chu in hre lo vem ni?

²²“Abrahama chuan fapa pahnih a nei a, pakhat chu bawihnu fa, pakhat chu chhûngpuinu fa,” tih ziak a nih kha.

²³Bawihnu fa chu mihring dân pangngai anga hrin a ni a, chhûngpuinu fa erawh chu Pathian thutiam vânga hrin a ni.

²⁴Hêng hi tehkhinna a ni; chûng nu pahnihte chu thuthlung pahnih entîrna an ni - pakhat chu Sinai tlâng aṭanga lo chhuak kha a ni a, chu chu Hagari a ni a, a fa hrinte chu bawih an ni.

²⁵Hagari chu Arabia rama Sinai tlâng entîrna a ni a; tûnlai Jerusalem khua nên angkhat a ni, a chhûnga chêngte nên bawih an ni hlawm si a.

²⁶Chung lam Jerusalem erawh chu bawih a ni lo, chu chu keini nu hi a ni:

²⁷“Nang ching, fa hrin nei lo, lâwm la, Nang nau vei ngai lo, hlim takin au rawh, Pasal nei ai chuan hrin nei lo nu chuan Fa a ngah zâwk si a,” tih ziak ang khân.

²⁸Tichuan, unaute u, Isaka ang bawka Pathian thutiam fate in ni.

²⁹Mihring dân pangngai anga hrin khân Thlarau thiltihtheihnaa hrin chu a tiduhdah ang khân tûnah pawh a nih zêl hi.

³⁰Lehkha Thu-ah engtia ziak nge ni kha? “Bawihnu chu a fapa nên hnawt chhuak rawh, bawihnu fapa chuan chhûngpuinu fapa chu ro a luahpui tûr a ni lo,” tih a nih kha.

³¹Tichuan, unaute u, bawih fa kan ni lo va, chhûngpuinu fate kan ni.