Read Mizo Lushai RAMA MITE HNENA TIRHKOH PAULA LEHKHATHAWN GALATIA 5 Bible Online

RAMA MITE HNENA TIRHKOH PAULA LEHKHATHAWN GALATIA 5 - Mizo Lushai bible

RAMA MITE HNENA TIRHKOH PAULA LEHKHATHAWN GALATIA 5

¹Krista chuan min zalêntîr ta a, in zalênnaah hian ding tlat ula, bawih nghâwngkawl bât leh tawh suh u.

²Ngai teh u, kei Paula ngei hian ka hrilh a che u - serh in tan chuan Krista chu in hlâwkpui lo tawp ang.

³Serh tan apiang hnênah hei hi ka sawi duh a ni - Dânin a phût zawng zawng chu an ti law law tûr a ni.

⁴Dân zawm avânga thiam chan tumte u, Krista hnên ata in intan fithla a, khawngaihna chu in chhuahsan ta a ni.

⁵Keini zawng Thlarau zârah rinna avânga thiam channa chu beiseiin kan nghâkhlel takmeuh a ni.

⁶Isua Kristaa kan awm phawt zawngin serh tan emaw, tan loh emaw a danglam chuang lo; hmangaihnaa thuam rinna hi a pawimawh ber mai.

⁷Hma in sâwn ṭhat ṭhin vei nên, tu ber kherin nge thutak tlûksan tûra hruai bo ta che u!

⁸He hruai kawina hi a kotu che u laka chhuak a ni lo ve.

⁹Dawidim tlêm têin chhang hlâwm lian pui pawh a fan chhuak thei tih a ni.

¹⁰Lalpa pakhata awm za kan nih avângin rilru hrang in la put loh kei chuan ka ring tlat a ni; nangmahni chawk buaitu chu tu pawh ni se, hrem a la tuar ang.

¹¹Unaute u, kei hian serh tan a ṭûl tiin lo hril ṭhîn ila, engah nge mi tihduhdah ang? Chuti ni se, kraws thu kan hril hian buaina a siam lo tûr.

¹²Nangmahni tibuaitute hi in zîng ata intan fithla law law ang hmiang.

¹³Unaute u, nangni zawng zalênna nei tûra koh in ni a, in zalênna hi tisa tâna remchângah hmang lul suh u; inhmangaih tawnin rawng inbâwlsak zâwk rawh u.

¹⁴“Nangmah i inhmangaih angin i vêngte pawh hmangaih rawh,” tih thu kam khat hi in zawm chuan Dân zawng zawng in zâwm a ni mai.

¹⁵Ran ang maia inbeih leh intihnat in chîn chuan fîmkhur rawh u, in intiboral tawn mai dah ang e.

¹⁶Ka sawi tum chu hei hi a ni: Thlarauvah awm ula, tisa châkna chu in zâwm tawp lo vang.

¹⁷Tisa duhzâwng chuan thlarau lam thil a kalh tlat a, Thlarau lahin tisa lam thil chu a kalh tlat bawk a, an inkalh tawn tlat avângin in tih duh eng mah in ti thei ṭhîn lo va ni.

¹⁸Thlarau hruaia in awm zawngin Dân hnuaiah in awm lo ve.

¹⁹Tisa mite thiltih chu a lang chiang a ni - inngaihna te, bawlhhlawhna te, hurna te,

²⁰milem biakna te, dawi te, inhuat te, innghirngho te, thîkna te, thinchhiat te, mahni hmasial te, intihdarh te, inṭhen te,

²¹inîtsîk te, zu ruih chîn te, zu hmuna nuam tâwl te leh chutiang chi chu. Chutiang ti mite chuan Pathian ram an luah tawp lo vang tih ka hrilh tawh che u angin ka hrilh nawn leh a che u.

²²Thlarau rah zawng hmangaihna te, lâwmna te, remna te, dawhtheihna te, ngilneihna te, ṭhatna te, rinawmna te,

²³nunnêmna te, insûm theihna te a ni. Chutiang kalh zâwng Dân a awm lo ve.

²⁴Isua Kristaa awmte chuan an tisa châkna te leh duhna te chu an khêngbet tawh a ni.

²⁵Thlarauva nung kan nih tawh chuan Thlarau hruai ang zêlin i awm ang u.

²⁶Incho tawna, inîtsîk tawnin mahni i inngaihlu suh ang u.