Read Mizo Lushai RAMA MITE HNENA TIRHKOH PAULA LEHKHATHAWN GALATIA 6 Bible Online

RAMA MITE HNENA TIRHKOH PAULA LEHKHATHAWN GALATIA 6 - Mizo Lushai bible

RAMA MITE HNENA TIRHKOH PAULA LEHKHATHAWN GALATIA 6

¹Unaute u, miin sual a ti lai phâwk ula, nangni thlarau mite chuan chu mi chu dimdawi takin tundin leh tum ṭhîn rawh u; nangni pawh mahni invêng ṭha ṭheuh ula, thlêmna in tâwk ve dah ang e.

²Phur inchhâwk tawn ṭhîn ula; tichuan, Krista dân chu in zâwm a ni ang.

³Eng mah ni si lo, mi lian tak nia inngai chu mahni a inbum mai a ni.

⁴Mi tinin mahni thiltih enfiah ṭheuh zâwk rawh se, mi dang nêna inteh lovin, mahni thawh tâwk tê têah lâwmna tûr in nei thei ang;

⁵mi tinin mahni pual phur kan nei ṭheuh si a.

⁶Zirtîrna thu dawngtu chuan a zirtîrtu chu thil ṭha a neih ang ang pe ve rawh se.

⁷Bumin awm suh u, Pathian chu ngaihnêp rual a ni lo ve. Miin a tuh chu a seng leh ngei dâwn a ni.

⁸Mahni tisa lam tâna tuhtu chuan tisaa mi chhiatna a seng ang a, Thlarau lam tâna tuhtu erawh chuan Thlarauva mi chatuan nunna a seng dâwn si a.

⁹Thil ṭha tih i ning suh ang u, kan inthlahdah loh zawngin a hun takah kan la seng ngei dâwn e.

¹⁰Chutichuan, remchâng kan hmuh apiangin mi tin hnênah thil ṭha ti ila, rinnaa kan chhûngte chungah phei chuan i uar zual ang u.

¹¹En teh u, hawrawp hraw pui puia ziak hi keima ziak ngei a nih hi.

¹²Tisa lama intih hmêl mawi tumte chuan serh tan luihtîr che u an tum a, Krista kraws avânga tihduhdah an tuar loh nân an ti a ni.

¹³Serh tante pawh hian Dân chu an zâwm kim bîk hlei nêm. In taksaa chhinchhiahna awm chu an uanpui theih nân serh tantîr che u an tum a ni.

¹⁴Kei zawng, kan Lalpa Isua Krista kraws chauh lo chu chhuan tûr rêng ka nei lo, chu krawsah chuan khawvêl hi ka tân khenbeh a ni a, kei pawh khawvêl tân khenbeh ka ni.

¹⁵Miin serh an tan nge tan lo a pawimawh lo, siamtharna hi a pawimawh ber chu a ni.

¹⁶He thu zâwmtu zawng zawng chungah remna leh zahngaihna awm rawh se, Pathian Israel-te chungah pawh.

¹⁷Tûn chinah tu mahin mi tibuai tawh suh se, ka taksaa ser awmte hi Krista bawih ka nih chhinchhiahna a nih hi.

¹⁸Unaute u, kan Lalpa Isua Krista khawngaihna chu in hnênah awm rawh se. Amen.