Read Mizo Lushai KHUAA MITE HNENA TIRHKOH PAULA LEHKHATHAWN EPHESI 1 Bible Online

KHUAA MITE HNENA TIRHKOH PAULA LEHKHATHAWN EPHESI 1 - Mizo Lushai bible

KHUAA MITE HNENA TIRHKOH PAULA LEHKHATHAWN EPHESI 1

¹Pathian duhzâwnga Krista Isua Tirhkoh Paula chuan, mi thianghlim Efesi khuaa awm, Krista Isua mi rinawmte chibai ka bûk e.

²Pathian kan Pa leh Lalpa Isua Krista hnên ata khawngaihna leh remna in hnênah awm rawh se.

³Kan Lalpa Isua Krista Pa leh Pathian chu i fak ang u. Ani chuan Krista zârah vân hmunahte khian thlarau lam malsâwmna tinrêngin mal min sâwm a.

⁴Thianghlim leh sawisêlbova a hmaa kan awm theih nân leilung pian hma khân hmangaihnain Kristaah min thlang tawh a.

⁵Ama duhzâwng leh a tum dân ang taka Isua Krista zâra a fa ni tûrin min lo ruat lâwk tawh bawk a.

⁶Duh taka zâra a khawngaihna thil thlâwnpêk ropui tak min pêk avângin i fak ang u.

⁷Krista thisena tlan kan ni, kan bawhchhiatnate ngaihdamna chu. A khawngaihna chu a va thûk êm!

⁸Chu khawngaihna chu fing tak leh remhre takin min vûr ta ṭeuh a ni.

⁹Kristaa a ruat lâwk tawh ang taka tih a tum thurûk chu min hriattîr ta.

¹⁰A hun taka Kristaa tihhlawhtlin tûra Pathian thil rêl lâwk chu engkim, vâna thil awm te, leia thil awm te Kristaa fâwk khâwm hi a ni.

¹¹Ama remruat ang taka thil engkim tihlawhtlingtu duh dân ang ngeiin Krista zârah a mite ni tûrin keini hi min ruat lâwk a, min thlang chhuak tawh a ni.

¹²Keini Kristaa beiseina nghat hmasate hi a ropuina tilangtu tûr kan ni.

¹³Amahah chuan thutak, in chhandamna Chanchin Ṭha chu, in lo hria a, Krista chu in ring ve ta a; tichuan, Thlarau Thianghlim tiam chuan nangni pawh a chhinchhiah ta che u a ni.

¹⁴In Thlarau dawn kha a ta ni tûra min tlanna avânga kan rochan tûr zakhamna a ni. A ropuina chu fakin awm rawh se.

¹⁵Chuvângin, kei pawhin Lalpa Isua in rinna leh mi thianghlim zawng zawng in hmangaihna ka lo hriatin,

¹⁶ka ṭawngṭainaahte ka hre reng ṭhîn che u a, nangmahni avângin bâng lovin lâwmthu ka sawi ṭhîn.

¹⁷Kan Lalpa Krista Isua Pathian, ropuina Pa chuan, finna leh hriatthiamna thlarau pe che u rawh se.

¹⁸Tichuan, in thinlung mitte tihvârin awm sela, eng beisei tûrin nge a koh che u tih te, mi thianghlimte nêna in rochan tûr a khâwl tamzia te,

¹⁹keini ringtua a chakna thahrui thiltihtheihna tâwp chin nei lova a thawh nasatzia te in hre thei ang.

²⁰Chu chakna chuan Krista chu mitthi zîng ata a kaitho va, vân hmunahte a ding lamah a ṭhuttîr a;

²¹lalna te, thuneihna te, thiltihtheihna te, rorêlna zawng zawng te chungah, he khawvêl leh khawvêl lo la awm tûra hming sak zawng zawng chung daihah a dah ta a ni.

²²‘A ke hnuaiah chuan engkim a dah ta a, ani chu lu ber atân kohhran hnênah a pe ta a ni.

²³Kohhran chu Krista taksa a ni, engkim engkima tifamkimtu famkimna chu.