Read Mizo Lushai KHUAA MITE HNENA TIRHKOH PAULA LEHKHATHAWN EPHESI 2 Bible Online

KHUAA MITE HNENA TIRHKOH PAULA LEHKHATHAWN EPHESI 2 - Mizo Lushai bible

KHUAA MITE HNENA TIRHKOH PAULA LEHKHATHAWN EPHESI 2

¹Hmânah chuan in bawhchhiatnate leh in sualte avângin thi in ni a.

²Chutih lai chuan he khawvêl dân ang hian in khawsa a, boruaka thuneitute lal, awih lote chunga tûna thawk mêk thlarau thu thu-a in awm kha.

³An zîngah chuan keini pawh kan tel vek a, kan tisa châkzâwng ûmin kan tisa duhzâwng leh ngaihtuahzâwng kan ti ṭhîn a, mi dangte ang bawkin Pathian thinurna tuar tûr rênga piang kan nih kha.

⁴Nimahsela, Pathian khawngaihna chu a nasain, a mi hmangaihna chu a thûk êm a,

⁵kan bawhchhiatnate avânga thi kan nih lai khân Krista nên min tinung ta hlawm a. A khawngaihna avânga chhandam in ni.

⁶Krista Isuaah chuan min kaithovin, vân hmunahte min ṭhuthotîr ta a.

⁷Krista Isuaa kan chunga a ngilneihna hian hun lo thleng leh zêl tûr atân pawh khawngaihna a ngah nasatzia a rawn tilang ta a ni.

⁸Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni.

⁹Thil ṭha tih avângin a ni lo, chuti ni se miin an chhuang dah ang e.

¹⁰Krista Isuaah chuan thil ṭha ti tûrin min siam a, a kut chhuak ngei kan nih tâk hi, thil ṭha tih chu kan awm dân tûra Pathian buatsaih lâwk a ni.

¹¹Nangni hi piannaa Jentail, tisa kuta serhtanten ‘serh tan loh’ an tih ṭhin che u kha;

¹²khatih lai khân Krista in la nei lo va, Israel chhûngkaw lakah mi hrang in ni a, Pathian thutiamah thuthlung pâwna mi in ni bawk a, khawvêlah hian beiseina rêng nei lo leh Pathian tak hre lova in awm kha hre reng rawh u.

¹³Tûnah erawh chuan Krista Isuaah, nangni hmâna hla taka awmte kha, Krista thisen chuan tihhnaih in ni ta.

¹⁴Krista chu kan inremna a ni. Ani chuan Jentail-te leh keini Juda-te hi pumkhatah min siam a, min daidang ṭhîn intaina bang chu a tisa khân a tibo ta.

¹⁵Dân thupêkte leh tih tûr awmte chu a titâwp a, keini leh nangni hi amahah chuan mihring thar, pumkhatah min siam a, inremna a rawn thlen ta a.

¹⁶Krawsah chuan intaina chu a tibo va, Jentail-te leh Juda-te chu pumkhata lo awmin, Pathian nên kan inrem ta a.

¹⁷A lo kal khân hla taka awm nangni hnênah remna Chanchin Ṭha a hril a, hnai zâwka awm keini hnênah pawh remna Chanchin Ṭha bawk chu a hril a.

¹⁸Ama zârah Thlarau hmun khatin Pa hnênah kan lût thei ve ve ta a ni.

¹⁹Tichuan, tûnah hian ram dang mi leh mikhual châm mai in ni tawh lo va, mi thianghlimte nên chuan tualkhat leh Pathian chhûngkua in ni ta zâwk a.

²⁰Tirhkohte leh zâwlneite lungphûm chunga rem in ni, chu lungphûma a kil lung pawimawh ber chu Krista Isua hi a ni.

²¹Chu in chu a pumin amahah chuan rem khâwm a ni a, Lalpa tân Tempul thianghlim a lo ni ta a ni.

²²Nangni pawh amahah chuan mi dangte nên, Thlarauva Pathian chênna in atân rem khâwm in ni.