Read Mizo Lushai KHUAA MITE HNENA TIRHKOH PAULA LEHKHATHAWN EPHESI 4 Bible Online

KHUAA MITE HNENA TIRHKOH PAULA LEHKHATHAWN EPHESI 4 - Mizo Lushai bible

KHUAA MITE HNENA TIRHKOH PAULA LEHKHATHAWN EPHESI 4

¹A kohna che u phua awm tûrin kei, Lalpa avânga tâng hian ka ngên a che u.

²Kawng tinrêngah inngaitlâwm leh thuhnuairawlh takin awm ula, inphahhniam takin hmangaihna nên indawh tawn rawh u.

³Inrem taka awm hovin Thlarauva inpumkhatna hi vawng tlat rawh u.

⁴Beisei hmun khat nei tûra koh in ni ang bawkin, taksa pakhat leh Thlarau pakhat chauh a awm a.

⁵Lalpa pakhat, rinna hmun khat, baptisma hmun khat,

⁶mi zawng zawng Pa, Pathian pakhat chauh a awm a ni. Ani chu engkim chungah a awm a, engkim a fang chhuak a, engkimah a awm bawk a ni.

⁷Tichuan, Krista khawngaihna thilthlâwnpêk chu tâwk a tih ang zêlin min pe ṭheuh a ni.

⁸Lehkha Thu-ah pawh: “Chung lama a chhoh khân Râl a man tâkte tam tak chu salah a hruai a, Mihringte hnênah pawh thilpêk a sem,” tih a nih kha.

⁹(Chung lama chho tih hi eng tihna nge? Lei hmun hnuai berah a lo chhuk hmasa tihna a ni.

¹⁰Engkim a tihfamkim theih nân, lo chhuka ngei kha vân chung daiha han chho leh ta-a chu a ni.)

¹¹Tichuan, mi ṭhenkhat chu tirhkoh atân, ṭhenkhat zâwlnei atân, ṭhenkhat Chanchin Ṭha hriltu atân, ṭhenkhat kohhran enkawltu leh zirtîrtu atân a ruat a.

¹²Chutiang chuan mi thianghlimte tihpuitlin nân rawngbâwl hna thawk tûr leh Krista taksa tiṭhanglian tûrin a ruat a ni.

¹³Chu chu kan zaa rinna hmun khat kan vawna, Pathian Fapa hriatna kan neiha, mi puitling, Krista famkimna tluka mi famkim kan lo nih theihna tûr a ni.

¹⁴Fing vervêka thiam taka mi hruai bo an tumna, zirtîrna chi tinrênga lehlam lehlama hruai kawi theih naupangchhia ang kan ni tawh lo vang a,

¹⁵hmangaihnaa thu dik sawiin, engkimah Krista lamah kan ṭhang lian thei ang; Krista chu Lu a ni si a.

¹⁶Taksa pum chu amahah a innghat a, tha leh zungin a phuar khâwm a, taksa pêng tin chu an tih tûr ang ti ṭheuhvin an ṭhang tlâng a, hmangaihnain an inchâwm lian ṭhîn a ni.

¹⁷Chutichuan, hei hi ka sawi duh a, Lalpa hmingin ka hrilh a che u; rilru mumal nei lo Jentail-te awm dân angin awm ve tawh suh u.

¹⁸An rilru a thim zo va, hriatna an nei lo va, an thinlung an tihchawlawl tawh avângin Pathian nunna lak ata ṭhenin an awm ta.

¹⁹Zah nachâng pawh an hre tawh lo va, suahsualnaah an inpumpêk a, duhâm takin thil bawlhhlawh tinrêng an ti a.

²⁰Nangni zawng Krista zirtu in ni a, chutianga awm ve tûr in ni lo.

²¹A thu in zawma, thutak, Kristaa awm kha zirtîr in nih takzet chuan,

²²tisa châknain a tihkhawloh tawh in awm dân hmasa, mihring hlui kha hlîp rawh u.

²³In rilru leh thinlung chu tihthar ni sela,

²⁴thutaka chhuak, dikna leh thianghlimnaa Pathian anga siam mihring thar chuan inthuam rawh u.

²⁵Chutichuan, dâwt sawi bânsan ula, Krista taksa pêng kan nih ṭheuh avângin mahni ṭhenawmte chu thu dik chauh hrilh rawh u.

²⁶Thinrim mah ula, thil sual ti suh u, ni tlâk thleng thlengin thinrim suh u.

²⁷Diabola chu hun remchâng pe suh u.

²⁸Rûkhmang chuan ru tawh suh se, tlachham hnêna pêk tûr a neih theih nân mahni kut ngeia hna thawkin rim zâwk rawh se.

²⁹Ṭawng mawi lo rêng rêng hmang suh u, mi siam ṭha thei tûr chauh in ka aṭangin chhuak rawh se; chutichuan, a ngaithlatute tân a lâwmawm bawk ang.

³⁰Pathian Thlarau Thianghlim chu tilungngai suh u, tlanna ni atân ama ta ngei in nihzia Pathianin a chhinchhiahna che u a ni e.

³¹Huatna te, thinurna te, tauhna te, ânna te, sawichhiatna zawng zawng te nangmahni aṭangin paih bo rawh u, sualna zawng zawng nên.

³²Inkhawngaih tawnin inlainat tawn ula, Pathianin Kristaa a ngaidam che u ang hian inngaidam tawn rawh u.