Read Mizo Lushai KHUAA MITE HNENA TIRHKOH PAULA LEHKHATHAWN EPHESI 6 Bible Online

KHUAA MITE HNENA TIRHKOH PAULA LEHKHATHAWN EPHESI 6 - Mizo Lushai bible

KHUAA MITE HNENA TIRHKOH PAULA LEHKHATHAWN EPHESI 6

¹Naupangte u, Lalpaah chuan in nu leh in pate thu zâwm rawh u, chu chu thil dik tak a ni.

²“I nu leh i pa chawimawi rawh,” tih hi thupêk zînga tiam tel nei hmasa ber a ni.

³“I tân a ṭha ang a, leiah hian i dam rei bawk ang,” tih a nih kha.

⁴Tin, nangni pate u, in fate tithinur suh ula, Lalpa zirtîrnaah leh thununnaah enkawl zâwk rawh u.

⁵Bawihte u, Krista thu in zâwm angin rilrua tihtakzetin, hlau leh khûr chungin tisaa in pute thu zâwm rawh u.

⁶Mihring tihlâwm tumtute ang maia an hmuh lai chauhva thawk lovin, Krista bawih ni âwm rêngin rilru takin Pathian duhzâwng ti ula,

⁷mihring rawngbâwl mai ni lovin Lalpa rawngbâwl in nih zâwk avângin hlim takin thawk ṭhîn rawh u.

⁸Bawih pawh, bawih lo pawh, mi tinin an thil ṭha tih lâwmman Lalpa hnên ata an hmu ṭheuh dâwn tih in hre si a.

⁹Tin, nangni hotute u, chutiang bawkin an chungah ti ve rawh u. In bawihte nêna in hotu, thlei bîk nei lo chu, vânah a awm tih hre rengin invau chîng suh u.

¹⁰A tâwp berah chuan Lalpa leh a chakna aṭang chuan thiltihtheihna la ṭhîn rawh u.

¹¹Diabola thlêmna in dan theih nân Pathian râlthuam kimin inthuam rawh u.

¹²Mihring râl do kan ni lo ve, lalna te leh thuneihna te, he khawvêl thim chunga rorêltute leh vân hmuna thlarau sual awmte kan do a nih zâwk hi.

¹³Chuvângin, Pathian râlthuam kim chuan inthuam ula, ni ṭha lo a thlen hunah hmêlma in dang tlat thei ang a, in dan zawhah pawh in ding reng thei ang.

¹⁴Tichuan, nghet takin ding ula, thutaka in kâwng hrêngin, dikna chu âwmphawah ha rawh u.

¹⁵Remna Chanchin Ṭha puang tûra inpeih rengna chu pheikhawkah bun ula,

¹⁶mi sualpa thal alh theite chu in tihmih zêl theih nân rinna hi phawah hmang rawh u.

¹⁷Chhandamna chu lukhumah hmang ula; Thlarau khandaih, Pathian thu chu pai rawh u.

¹⁸Ṭawngṭai fo ula, Pathian chu in mamawh apiang dîl ula, Thlarau hruai ang zêlin eng hunah pawh ṭawngṭai rawh u. In ṭawngṭainaah chuan mi thianghlim zawng zawng tân bâng lovin dîl rawh u.

¹⁹Chanchin Ṭha thu ril huai taka puang tûra thu ka dawn theih nân kei pawh mi dîlsak ula.

²⁰Chanchin Ṭha palai lung in tâng ka ni a, ka sawi tûr huai taka ka sawi theih nân min dîlsak ang che u.

²¹Lalpaa unau duh tak leh rawngbâwltu rinawm tak Tukika hian, ka chanchin in hriat theih nân engkim a hrilh ang che u.

²²Ka chanchin hrilh tûr che u leh thlamuan tûr che uin ani hi ka rawn tîr a ni.

²³Pa Pathian leh Lalpa Isua Krista hnên ata remna te, hmangaihna te leh rinna te chu unaute hnênah awm rawh se.

²⁴Kan Lalpa Isua Krista chuai lova hmangaihtu zawng zawng hnênah khawngaihna awm rawh se.