Read Mizo Lushai KHUAA MITE HNENA TIRHKOH PAULA LEHKHATHAWN PHILIPPI 1 Bible Online

KHUAA MITE HNENA TIRHKOH PAULA LEHKHATHAWN PHILIPPI 1 - Mizo Lushai bible

KHUAA MITE HNENA TIRHKOH PAULA LEHKHATHAWN PHILIPPI 1

¹Paula leh Timothea, Krista Isua bawihte chuan, Krista Isuaa mi thianghlim Filipi khuaa awm zawng zawng leh, Kohhran hotute leh rawngbâwltute chibai kan bûk e.

²Pathian kan Pa leh Lalpa Isua Krista hnên ata khawngaihna leh remna in hnênah awm rawh se.

³In chanchin ka ngaihtuah apiangin ka Pathian hnênah lâwmthu ka sawi ṭhîn a,

⁴eng hunah pawh in zavaia tân ka ṭawngṭai apiangin hlim takin ka ṭawngṭai ṭhîn a ni,

⁵in hriat tirh ni aṭangin tûn thlenga Chanchin Ṭha hril hna mi thawhpui ṭhin avângin.

⁶Nangmahnia he thil ṭha tichhuaktu chuan Krista Ni-a a puitlin thlengin a thawh zêl ka ring tlat a ni.

⁷Ka ngai êm êm ṭhîn che u a, Pathianin he chanvo mi pêk Chanchin Ṭha tâna ka beihnaah te, tihngheh hna ka thawhnaah te leh ka kawl bunah te min ṭanpuitu in nih avângin ka thinlungah in awm reng a, in zaa chungah chutiang rilru pu âwm rêng pawh ka ni.

⁸Krista Isua rilru ka ṭâwmpui avângin in zain ka ngai êm êm che u a ni tih Pathianin a hria.

⁹In hmangaihna chu hriatnaah te, thil hmuh fiah thiamna tinrêngah te ṭhang liana a pun deuh deuh theih nân ka ṭawngṭai a ni.

¹⁰Tichuan, thil ṭha bîkte chu in thlang thiam ang a, Krista Nî-ah chuan thianghlim leh sawisêlbo in lo ni ang a,

¹¹Pathian ropui nân leh fak nân Krista zâra felna rah chuan in lo khat dâwn nia.

¹²Unaute u, ka thil tuarte kha chanchin Ṭha tihdarhna tûr a lo ni ta hlauh zâwk tih in hriat ka duh a ni.

¹³Ka kawl bunte hi Krista vâng a ni tih lal in vêngtuho leh mi dang zawng zawng pawhin an hre ta.

¹⁴Unau tam zâwkte pawhin ka kawl bun avângin Lalpa an ring nghet sauh va, hlau lovin Pathian thu pawh an hril ngam ta.

¹⁵Mi ṭhenkhat chuan îtsîkna leh elrelna avângin Krista thu an hril ve ṭhîn a, ṭhenkhat erawh chuan rilru ṭha takin an hril ṭhîn.

¹⁶Chanchin Ṭha ṭan tûra ruat ka nih hriain hmangaih avânga hril an ni;

¹⁷ṭhenkhat zawngin ti tak tak lovin, inerna avâng leh ka chungthu hi rip zual se an tih avânga hril an ni.

¹⁸A pawi lo ve, a derin emaw, a takin emaw, engti kawng emaw tala Krista thu hrilh a ni hi a lâwmawm e, ka lâwm zêl ang.

¹⁹Min ṭawngṭaisakna avâng leh Isua Krista Thlarau ṭanpuina avângin chhan chhuah ka ni dâwn tih ka hre si a.

²⁰Ka duhthusâm ber leh ka beisei tlat chu, engah mah ka mualpho lohva, huai taka eng hunah pawh, tûn ṭumah ngei pawh hian, damin emaw, thîin emaw ka taksaa Krista chawimawi hi a ni.

²¹Kei zawng Krista tâna nung ka ni a, thi mah ila ka tân chuan a hlâwk zâwk ang.

²²Dam zêl ila ṭangkaina ka la nei dâwn bawk si a; a eng nge thlan zâwk tûr ka hre lo.

²³A ngaihna tak pawh ka hre lo ve, kal chhuaha Krista hnêna awm châkna ka nei a, chu chu a ṭha zâwk tih ka hria.

²⁴Amaherawhchu, nangmahni avângin la dam reng a ṭûl bawk si.

²⁵In zaa rinna tiṭhang tûr leh in lâwmna tipung tûrin ka dam zêl dâwn tih ka hria.

²⁶Ka lo kal leh hunah chuan keimah avângin Krista in la fak lehzual dâwn a ni.

²⁷Mi dangte nêna in khawsak ho dân chu Krista Chanchin Ṭha nên inmawi phawt sela, ka lo kal emaw, kal lo emaw, thlarau hmun khata ding nghetin, rilru hmun khat puin Chanchin Ṭha rinna chu in ṭan tlâng tih ka hre thei ang. Tichuan, dotute chu engti kawng maha hlau lovin huai takin awm ula; chu chu an hneh dawn lo che u a, in hneh zâwk dâwn tih tichiangtu a ni ang. Chu chu Pathian tih a ni si a.

²⁹Krista ring tûr chauh ni lovin, a tâna tuar tûr pawhin rawngbâwl hna hi in chang a ni si.

³⁰Indona ka tawh in hmuh ṭhin, tûnah pawh ka tâwk zêl tih in hriat ang kha in tâwk ve ta a nih hi.