Read Mizo Lushai KHUAA MITE HNENA TIRHKOH PAULA LEHKHATHAWN PHILIPPI 2 Bible Online

KHUAA MITE HNENA TIRHKOH PAULA LEHKHATHAWN PHILIPPI 2 - Mizo Lushai bible

KHUAA MITE HNENA TIRHKOH PAULA LEHKHATHAWN PHILIPPI 2

¹Krista zârah thlamuanna in nei ta a, a hmangaihna chuan a tilâwm che u a, Thlarau pâwlna in chang a, inlainatna leh inkhawngaihna in nei ta a.

²Chuvângin, lungrual taka inhmangaih tawnin, inthuruala rilru hmun khat puin, ka lâwmna tikim rawh u.

³Mahni hmasial tak leh inngaihlu taka eng mah ti lovin, tu pawhin inngaitlâwm takin mi dangte ṭha zâwkah dah rawh u.

⁴Mahni ṭhatna tûr chauh zawng lovin, mi dang ṭhatna tûr pawh zawng rawh u.

⁵Krista Isua rilru ang hi nangni pawhin pu zêl rawh u.

⁶Ani chu Pathian anpui ni mah sela, Pathian tluka awm chu tum tlat tûrah a ngai lo va,

⁷mahni intitlâwmin bawihah a insiam a, mihringa lo piangin mihring a lo ni ngei na a,

⁸a inngaitlâwm a, thi khawp hialin thu a zâwm a, krawsah a thi ta a.

⁹Chuvâng chuan, Pathianin ani chu a chawimawi nasa ta ber a, hming zawng zawnga hming chungnung ber a pe ta a.

¹⁰Tichuan, Isua chawimawiin mi tin, vâna mi te, leia mi te, lei hnuaia mi te a hmaah an ṭhingṭhi ang a,

¹¹Pa Pathian ropui nân mi tinrêngin, “Isua Krista chu Lalpa a ni,” tiin an puang ang.

¹²Tichuan, ka duh takte u, ka awm laia ka thu in awih ang khân, tûna ka awm loh hlân pawh hian in awih lehzual a ṭûl a ni. Pathian hlau leh ṭih tak chungin in chhandamna tifamkim tûrin thawk zêl rawh u.

¹³Ama duhzâwng tih tum tûr leh ti thei tûra nangmahnia thawktu chu Pathian a ni si a.

¹⁴Phunnawi lo leh hnial lovin engkim ti rawh u.

¹⁵Tûnlai mi bengtla lo leh tihmawhte zîngah hian Pathian fa, sual nei lo, nun tlang, sawisêlbo in nih theihna tûr leh, khawvêl tiêngtute in nih theihna tûrin,

¹⁶nunna thu chu vuan zêl rawh u; tichuan, Krista Nî-ah chuan ka chhuan tûr in ni ang a, ka tlân thlâwn lova, ka thawkrim thlâwn lo tih a lang dâwn nia.

¹⁷In rinna rawngbâwlna leh inthawinaah chuan kei hi hlanin awm dâwn pawh ni ila ka lâwm ang, nangni pawh ka lâwmpui bawk ang che u.

¹⁸Chutiang bawkin nangni pawh lâwm ula, mi lâwmpui bawk rawh u.

¹⁹In chanchin hriaa ngaihṭha taka ka awm theih nân, Lalpa Isuan rem a tih chuan in hnênah Timothea rawn tirh thuai theih ka inbeisei.

²⁰Tihtakzeta kei anga ngaihtuah ve che u chu ani chauh hi a ni.

²¹Mi dang zawngin Isua Krista tân ngaihtuah lovin, mahni tân an zawng si ṭhîn a.

²²Ani erawh hi chu a ṭangkaizia in hre tawh a, pa leh fa thawk dûn angin Chanchin Ṭha rawng kan bâwl dun ṭhin kha.

²³Chutichuan, ka chanchin tûr ka hriat veleh ani hi ka rawn tirh nghâl theih ka beisei.

²⁴Lalpan rem a tih chuan keimah ngei pawh hi lo kal thuai theih ka inring.

²⁵Tin, ka unaupa, ka sipaipui, ka rawngbâwlpui, ka mamawh phuhrûk tûra in rawn tirh Epafrodita hi in hnêna rawn tirh ṭûlin ka hria.

²⁶In za-in a ngai êm êm che u a, a na tih in lo hria chu pawi a ti hle a ni.

²⁷Thih ngama nâ zawng a ni ngei a; mahse, Pathianin a khawngaih a, ani chang ni lovin, kei mi khawngaih pawh a ni bawk ang chu, lungngaih lehzualna tâwk lovin mi siam ta a.

²⁸Chutichuan, amah in lo hmuha in lâwm nân leh, ka mangan a reh theih nân ani hi ka rawn tîr vat a ni e.

²⁹Ani hi Lalpa hmingin hlim takin lo lâwm ula, hetiang mi hi ngaihlu rawh u.

³⁰Nangmahni ngeiin kuta min ṭanpui phâk si loh avângin thih dâwn lovin Krista hna a thawk a, a thih phah ṭhelh nghe nghe a ni.