Read Mizo Lushai KHUAA MITE HNENA TIRHKOH PAULA LEHKHATHAWN PHILIPPI 3 Bible Online

KHUAA MITE HNENA TIRHKOH PAULA LEHKHATHAWN PHILIPPI 3 - Mizo Lushai bible

KHUAA MITE HNENA TIRHKOH PAULA LEHKHATHAWN PHILIPPI 3

¹A tâwp berah chuan ka unaute u, Lalpaah lâwm rawh u. Thu pângngai bawk ziak leh ṭhin hi keia tân ninawm a ni lo va, in tân a sâwt bawk si a.

²Ui lakah te, thil ṭha lo titu lakah te, serh tan uarho lakah te fîmkhur rawh u.

³Keini Pathian Thlarau zâra Pathian bia leh Krista Isua chhuanga, pâwn lam thila innghat lote hi serh tan dik tak kan ni zâwk si a.

⁴Duh ila chuan kei pawhin pâwn lam thil chhuan tûr chu ka nei asin. Miin pâwn lam thil chhuang theia an inhriat chuan kei ka inhre lehzual a ni.

⁵Ni riat nia serh tan, Israel thlaha mi, Benjamina chia mi, Hebrai nu leh pa kâra piang ka ni. Dân zawm lamah chuan Farisai ka ni a,

⁶ṭhahnemngaih lamah lah kohhran tiduhdahtu ka ni a. Dânin a phût ang hlen thu-ah pawh sawisêlbo ka ni.

⁷Nimahsela, chûng thil, ka tâna hlâwk tûr apiangte chu, Krista avângin hlohna zâwkah ka ngai a ni.

⁸Chu chang a ni lo, ka Lalpa Isua Krista hriatna hlu tak avângin thil engkim hi hlohnaah ka ngai a; Krista chu ka neih theih nân leh amah nên pumkhat kan nih theih nân, amah avângin engkim ka chân ta vek a, chûng chu bawlhhlawh ang lekah ka ngai a ni.

⁹Thiam chang ka nihna chu Dân zawm vâng ni lovin, Krista rin vâng zâwk a ni a, rin vânga Pathian hmaa thiam channa chu.

¹⁰Ka thil duh chu Krista hriat te, a thawhlehna thiltihtheihna chan te, a tuar anga tuar te, a thihna ṭâwmpui te hi a ni.

¹¹Tichuan, mitthi thawhlehna chu ka chang ve dâwn si a.

¹²Hêng hi ka chang tawh ka ti lo ve, famkim tawh pawh ka inti hek lo; Krista mi man chhan chu tihlawhtling ngei tûrin ka la bei zêl zâwk a ni.

¹³Unaute u, hlawhtling tawhah ka inngai lo ve, thil pakhat erawh chu ka ti ṭhîn, thil kal tawhte chu theihnghilha, hma lam thilte chu thlîr zâwkin,

¹⁴Krista Isuaa Pathian chung lam kohna lâwmman chu hmu tûrin, tiam chin lam chu ka pan ngat ngat a ni.

¹⁵Tichuan, keini puitling tawhte hian chutiang rilru chu i pu ang u. Ngaih dân dang nei in awm a nih pawhin Pathianin a la tihfiahsak ang che u.

¹⁶Eng pawh ni se, kan thlen chin aṭang khân hma i sâwn zêl ang u.

¹⁷Unaute u, ka awm dân hi zir zêl rawh u. Entawn tûr keini min nei a, kan awm dân anga awmte chu en berah neih rawh u.

¹⁸An khawsak dâna Krista kraws hmêlma tam tak an awm tih ka hrilh fo che u kha, tûnah pawh ṭap chungin ka hrilh nawn leh a che u.

¹⁹Chûngho tâwpna chu chhiatna a ni. Ei tûr hi pathianah an neih a, zahpui tûr thilte chu an la chhuang ta zâwk a, khawvêl thil chauh an ngaihtuah a ni.

²⁰Keini zawng vân khua-leh-tui kan ni si a, min chhandamtu Lalpa Isua Krista vân aṭanga lo kal tûr chu nghâkhlel takin kan thlîr a ni.

²¹Engkim a thuhnuaia dah theitu chuan kan taksa tlâwm tak hi ama taksa ropui anga awm tûrin a thiltihtheihna chuan a tidanglam dâwn a ni.