Read Mizo Lushai KHUAA MITE HNENA TIRHKOH PAULA LEHKHATHAWN PHILIPPI 4 Bible Online

KHUAA MITE HNENA TIRHKOH PAULA LEHKHATHAWN PHILIPPI 4 - Mizo Lushai bible

KHUAA MITE HNENA TIRHKOH PAULA LEHKHATHAWN PHILIPPI 4

¹Chuvângin, ka unau duh tak leh ngaih êm êm, ka lâwmna leh mi chawimawitu duh takte u, chutiang chuan Lalpaah ding nghet rawh u:

²Lalpaa rilru hmun khat pu tûrin Euodii leh Suntuki kha ka ngên e.

³A ni, nang, ka nghâwngkawl bahpui rinawm tak, khâng hmeichhiate kha ṭanpui tûrin ka sâwm a che; anni chuan, Klemena leh Nunna Bû-a hming chuang dangte nên Chanchin Ṭha hrilh hnaah mi thawhpui nasa si a.

⁴Lalpaah chuan lâwm fo rawh u, ka sawi nawn leh ṭhîn ang, lâwm rawh u.

⁵In dawhtheihzia mi zawng zawng hriat ni rawh se. Lalpa chu a hnai e.

⁶Engah mah mangang suh u, eng thilah pawh ṭawngṭaiin, in mamawh chu Pathian hnênah thlen ula, lâwmthu hril zêl chungin dîl rawh u.

⁷Tichuan, mihring hriat sên rual loh Pathian thlamuanna chuan, in thinlung leh in rilrute chu Krista Isuaah chuan a vênhimsak ang che u.

⁸A tâwp berah chuan unaute u, a dik leh zahawm apiang, a fel leh thianghlim apiang, a duhawm leh thangmawi apiang, a ṭhata, fak tlâk a nih phawt chuan, chûng chu ngaihtuah rawh u.

⁹Ka hnên aṭanga in thil zir leh dawn te, in thil hriat leh hmuhte kha ti zêl rawh u. Tichuan, thlamuanna Pathian chuan a awmpui ang che u.

¹⁰In mi ngaihtuahzia tûn hnaia in rawn tihlan leh theih tâk avângin Lalpaah chuan ka lâwm takmeuh a ni. Chutiang tih chu in tum reng a, remchâng in la hmu rih lo mai a ni.

¹¹Ka tlâkchham thu sawi zawng ka ni lo ve; eng ang pawhin awm ila lungawi ka zir tawh si a.

¹²Rethei taka awm dân ka thiam a, hausa taka awm dân pawh ka thiam bawk a; engkimah tlai leh rilṭâma awm dân, hausa leh retheia awm dân thurûk ka zir tawh.

¹³Mi tichaktu avângin eng pawh tâwk tûrin chakna ka nei ta a ni.

¹⁴Eng pawh ni sela, ka mangannate mi lo hriatpui ṭhîn hi in ti ṭha e.

¹⁵Tin, Chanchin Ṭha ka hrilh ṭan laia Makedonia ka chhuahsan hnu khân nangni Filipi-ho chauh lo chuan kohhran dang pakhat mahin sum hman tûr mi ngaihtuahpui an awm lo tih in hria e,

¹⁶Thesalonika khuaa ka awm lai pawhin ka tlâkchham phuhrûk tûrin vawi khat chang ni lovin, vawi hnih lai thilpêk mi rawn thawn kha.

¹⁷Thil pêk ka zawng lo ve, in tâna thlarau lam rah tûr chu ka zawng zâwk a ni.

¹⁸In thilpêk zawng zawng ka lo dawng a, ka ngah ta e. Epafrodita kuta in thil rawn thawnte pawh ka lo hmu a, ka phuisui ta e. Chu chu thilhlan rimtui pawm tlâk, Pathian lâwm zawng a ni.

¹⁹Ka Pathian chuan Krista Isuaa a hausakna ropui tak aṭangin in mamawh tinrêng a pe ang che u.

²⁰Kan Pathian leh kan Pa chu chatuanin ropui rawh se. Amen.

²¹Mi thianghlim zawng zawng Krista Isua hmingin chibai ka bûk e. Ka hnêna unau awmte hian chibai an bûk a che u.

²²Mi thianghlim zawng zawngin chibai an bûk a che u, Kaisara ina awmte hian an bûk deuh bîk a che u.

²³Lalpa Isua Krista khawngaihna chu in hnênah awm rawh se.