Read Mizo Lushai KHUAA MITE HNENA TIRHKOH PAULA LEHKHATHAWN KOLOSSA 2 Bible Online

KHUAA MITE HNENA TIRHKOH PAULA LEHKHATHAWN KOLOSSA 2 - Mizo Lushai bible

KHUAA MITE HNENA TIRHKOH PAULA LEHKHATHAWN KOLOSSA 2

¹Nangni leh Laodikei khuaa mi leh tisaa ka hmêl hmu lote pawhin, engti kauva rimin nge in tân ka thawh ṭhin in hriat ka duh a ni.

²An thinlung a thlamuan theih nân hmangaihnaa an insuih khâwma, kawng tinrênga thinlungah hriat chianna an ngaha, Pathian thurûk, Krista chu, an hriat theih ka duh a ni.

³Kristaah chuan finna leh hriatthiamna ro hlu zawng zawng chu a inphûm si a.

⁴Tu man, thu dik ni âwm taka lang, dik si lova an bum mai loh nân che u hei hi ka sawi a ni.

⁵Tisain in hnênah awm lo mah ila, thlarau zawngin in zîngah ka awm a, in invawn felzia leh Krista rinnaa in nghehzia ka hmuhin ka lâwm a ni.

⁶Chutichuan, Krista Isua chu Lalpaa in pawm tâk avângin amahah awm rawh u.

⁷Amahah chuan zung kaiin inrem chho ula, zirtîrna in dawn ang khân rinnaah chuan ding nghet ula, lâwmthu sawi uar rawh u.

⁸Fîmkhur rawh u, Krista aṭanga chhuak ni lo, khawvêl zirtîrna ramhuai aṭanga chhuak, khawvêl finna an tih, mihring inzirtîr chhâwn mai mai hmangin tuten emaw an bum dah ang che u.

⁹Kristaah chuan Pathian famkimna tinrêng chu taksain a awm si a.

¹⁰Ani chu lalna leh thuneihna zawng zawng lu a ni a, amahah chuan nangni pawh tihfamkim in ni.

¹¹Amahah serh tan in ni ta, kuta tisa vun tan ni lovin, Kristaah chuan serh tan in ni.

¹²Baptisma-ah chuan a hnênah phûm ve in ni a, mitthi zînga ata amah kaithotu Pathian thiltihtheihna rin avângin amahah chuan kaihthawh in ni.

¹³In bawhchhiatnate leh tisaa serh tan loh in nih avângin thi in ni a; nimahsela, Krista nên a tinung ta che u a; kan bawhchhiatna zawng zawng min ngaidam ta a,

¹⁴thupêk, kuta ziak, min dâl ṭhîntu, zawm kan bat si chu a thai chhia a, krawsah chuan khêngbetin a tibo ta.

¹⁵Krawsah chuan boruaka rorêltute leh thuneitute chu hnehin, chûngte chu mipui hmuhah chiang takin a tilang ta.

¹⁶Chutichuan, ei leh in thu-ah emaw, kût hman thu-ah emaw, thla thar kût hman thu-ah emaw, sabat serh thu-ah emaw tu man thu neihsak che u suh se.

¹⁷Chûng chu thil lo la awm tûr hlimthla mai a ni, a tak chu Krista hi a ni.

¹⁸Taksa ngaihnêp tûr, vântirhkohte pawh biak tûr tia, inlârna danglam bîk hmua insawi, tisa tak rilru pua, engmahlova inhâmpuarho hi in chungah thu neihtîr suh u.

¹⁹Lû, Krista chu, an vuan tawh lo. Amahah chuan taksa pum hi tha leh ruangâma phuar khâwmin châwm a ni a, Pathian duhzâwng angin taksa pum chu a ṭhang ṭhîn a ni.

²⁰Khawvêl zirtîrna dik lote chu Kristaah in thihsan tawh si chuan, engtizia nge khawvêl mi la ni fo anga,

²¹‘tawk suh, tem suh, dek suh,’

²²tia mihring thil an intuk chawp leh phuah chawp hnuaia in kûn leh tâk mai? Chûngte chu hman zawha ral mai thil a ni.

²³Hêng vântirhkoh biak tih te, taksa ngaih nêp tihte hi ṭha âwm takin a lang a; mahse, tisa châkna hneh tûrin a ṭangkai si lo.