Read Mizo Lushai KHUAA MITE HNENA TIRHKOH PAULA LEHKHATHAWN KOLOSSA 3 Bible Online

KHUAA MITE HNENA TIRHKOH PAULA LEHKHATHAWN KOLOSSA 3 - Mizo Lushai bible

KHUAA MITE HNENA TIRHKOH PAULA LEHKHATHAWN KOLOSSA 3

¹Krista hnênah kaihthawh in ni ta a; chuvângin, Pathian ding lama Krista ṭhutnaa awm, chung lam thilte chu zawng rawh u.

²Chung lam thilah in rilru nghat tlat ula, lei lam thilah chuan nghat suh u.

³In thi tawh a, in nunna chu Krista hnênah Pathianin a vawng ṭha a ni.

⁴In nunna bul, Krista chu, a lo lan hunah nangni pawh a hnênah ropui takin in lang ve ang.

⁵In khawvêl nun sual - inngaihna te, bawlhhlawhna te, hurna te, châkna sual te, duhâmna te (chu chu milem biakna a ni) hêngte hi tihlum rawh u.

⁶Chûng thil avâng chuan ring lote chungah Pathian thinur a lo thleng dâwn a ni.

⁷Hmânah chuan nangni pawh chutiang chuan in awm a, in duhzâwng ber a ni ṭhîn a.

⁸Tûnah zawng thinrim te, thinchhiat te, inhuat te bânsan ula, insawichhiat te leh zahmawh sawi te in ka aṭangin chhuak suh se.

⁹Dâwt inhrilh tawn chîng suh u, mihring hlui chu a thiltihte nên in hlîp tawh a;

¹⁰mihring thar chuan in inthuam tawh si a; Pathian hre chiang tûrin chu mihring thar chu a siamtu anga awm tûra siam tharin a awm mêk a ni.

¹¹Chu nun tharah chuan Grik leh Juda, serh tan leh tan loh, awzia leh hnam dang mi, bawih leh bawih lo a awm theih loh, Krista chauh hi engkim a ni a, engkimah a awm a ni.

¹² Chutichuan, Pathian mi thlan, mi thianghlim leh duh takte ni âwm rêngin, thinlung taka inlainatna te, ngilneihna te, inngaihtlâwmna te, thuhnuairawlhna te, dawhtheihna te chuan inthuam rawh u.

¹³Indawh tawn ula, mi dang laka thu pawi in neih pawhin inngaidam tawn rawh u, Lalpan a ngaidam che u ang bawk hian ngaidam ve rawh u.

¹⁴Chûng zawng zawng chungah chuan hmangaihna inbel ula, chu chu engkim rem taka phuar khâwm theitu a ni.

¹⁵Kristaa chhuak remna chuan in thinlungah ro rêl rawh se, taksa pumkhata awm tûra koh in ni si a. Lâwm nachâng hre bawk rawh u.

¹⁶Krista thu chu, a hausakna zawng zawng nên nangmahniah chêng rawh se. Fakna hla te, Pathian hla te, Thlarau lam hla te nên finna tinrêngin inzirtîr ula, infuih tawn rawh u. In thinlung taka Pathian chawimawiin hlim takin zai rawh u.

¹⁷Krista zâra Pathian hnêna lâwmthu hril chungin in tih apiang, thu sawiah emaw, thiltihah emaw, Lalpa Isua hmingin ti vek rawh u.

¹⁸Nute u, in pasalte thu awih rawh u, chu chu Lalpa mite tih âwm rêng a ni si a.

¹⁹Pate u, in nupuite khawngaih ula, an lakah sual suh u.

²⁰Naupangte u, engkimah in nu leh pate thu zâwm rawh u, chu chu Lalpa lâwmzâwng a ni si a.

²¹Pate u, in fate tithinur suh u, an beidawng dah ang e.

²²Bawihte u, engkimah in pute thu zâwm ula, mihring tihlâwm tumtute anga an hmuh lai chauhva thawk lovin, thinlung taka Lalpa ṭih chungin an hmuh lohvah pawh thawk rawh u.

²³In tih apiangah mihring rawngbâwl ang ni lovin, Lalpa rawngbâwl ang zâwkin tih tak zetin ti ang che u.

²⁴Lâwmman atân ro luah tûr Lalpa hnên aṭangin in hmu dâwn tih hre reng rawh u. Lalpa Krista rawng in bâwl a ni e.

²⁵Thil dik lo titute chuan thil dik lo an tih man an hmu ang, Pathian chuan tu mah a thlei bîk si lo.