Read Mizo Lushai KHUAA MITE HNENA TIRHKOH PAULA LEHKHATHAWN KOLOSSA 4 Bible Online

KHUAA MITE HNENA TIRHKOH PAULA LEHKHATHAWN KOLOSSA 4 - Mizo Lushai bible

KHUAA MITE HNENA TIRHKOH PAULA LEHKHATHAWN KOLOSSA 4

¹Hotute u, nangni pawhin vânah Hotu in nei tih hriain, in bawihte chungah dik tak leh ṭha takin engkim ti rawh u.

²Ṭawngṭai fan fan ula, in ṭawngṭainaah lâwmthu hril chungin ngaihven rawh u.

³Keini pawh min ṭawngṭaisak rawh u, Pathianin a thu hrilna kawng min hawnsak nân te, ka lung in tân chhan, Krista thu ril puan hi ka chhunzawm theih nân te,

⁴ka sawi tûr ang taka ka sawi theih nân te mi ṭawngṭaisak bawk rawh u.

⁵Ring lote lakah fing takin awm ula, in hun chu hmang ṭha rawh u.

⁶Eng lai pawhin ṭha tak leh hawihhâwm takin ṭawng ṭhîn ula; tichuan, mi tin engtia chhân tûr nge in hre thei dâwn nia.

⁷Lalpaa ka bawihpui, rawngbâwltu rinawm tak, kan unau duh tak Tukika hian ka chanchin zawng zawng a rawn hrilh ang che u.

⁸Kan chanchin in hriata, rilru hlim taka in awm theih nân ka rawn tîr a ni.

⁹Ama rual hian nangmahni mi, unau duh tak Onesima, ringtu nghet tak hi ka rawn tîr ve a. Hêng lam chanchin hi an rawn hrilh vek ang che u.

¹⁰Kan tânpui Aristarka hian chibai a bûk a che u. Marka, Barnaba tupa pawh hian chibai a bûk a che u (Ani hi in hnêna a lo kal hun chuan lo lâwm tûrin ka hrilh tawh che u kha).

¹¹Isua, Justa an tih hian chibai a bûk a che u. Juda Kristiante zîngah chuan anni pathum chauh hi Pathian ram tâna min thawhpuitu an ni a, min tithlamuang hle a ni.

¹²Epafra, nangmahni mi, Krista Isua bawih hian chibai a bûk a che u. A ṭawngṭai apiangin nghet taka in dina, in lo puitlina, Pathian duhzâwng anga ringtu tak in nih theih nân ṭhahnemngai takin a dîlsak ṭhîn che u a ni.

¹³Nangniho tân te, Laodikei khuaa mite leh Hierapolis khuaa mite tân ani hian a thawk nasa êm êm tih kei pawhin ka hria a ni.

¹⁴Luka, daktor duh tak leh Dema hian chibai an bûk a che u.

¹⁵Laodikei khuaa unau awmte leh Numfii leh a ina kohhran inkhâwm kha chibai min bûksak ang che u.

¹⁶Ka lehkha hi in zînga in chhiar zawhah Laodikei kohhran chhiartîr ve ula, chutiang bawkin Laodikei kohhran lehkha pawh kha lo chhiar ve ang che u.

¹⁷Tin, Arkipa hnênah khân, “Rawngbâwl hna Lalpa hnên ata i dawn kha hlen tûrin fîmkhur rawh,” ti ang che u.

¹⁸Kei Paulan hei hi keima kut ngeia chibai ka bûkna che u a nih hi, ka kawl bunte hi hre reng rawh u. Khawngaihna in hnênah awm rawh se.