Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA THESSALONIKA 2 Bible Online

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 2 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 2

¹Unaute u, in hnêna kan lo kal kha a thlâwn lo tih nangmahni ngeiin in hria e.

²In hriat angin Filipi khuaah khân zahthlâk taka sawisak tuar mah ila, dodâlna tam tak kârah in hnêna Chanchin Ṭha hril tûrin kan Pathianin min tihuai ta hlauh zâwk a nih kha.

³Kan thu hrilh che u hi thu dik lo emaw, thu bawlhhlawh emaw, bumna thu emaw a ni lo va.

⁴Chanchin Ṭha kawltîr tlâka Pathianin min ruat ang ngeiin, mihring tilâwm tûr ni lovin, kan thinlung fiahtu Pathian tilâwm tûr zâwkin thu kan hril thîn a ni.

⁵Eng lai mahin mi kan fak der ngai lo va, duhâm khuh nân thu kan sawi ngai hek lo tih in hria, Pathian pawhin a hria.

⁶Mi min fak kan phût lo va, nangnin emaw, mi dangin emaw min fak kan ngiat hek lo.

⁷Krista tirhkoh kan nih avângin in tân hautak zet ni thei mah ila, nuin a fate a duat angin kan duat zâwk che u kha.

⁸Chuti taka kan ngainat che ua, kan hmangaih êm êm che u avângin, Pathian Chanchin Ṭha chauh ni lovin, keimahni nun lam pawh pêk hial che u kan peih kha.

⁹Unaute u, kan thawh hahzia leh rimzia kha in hria e, in zîngah tu mah kan tihhautak lohna tûrin a chhûn a zâna hna rim taka thawk chungin Chanchin Ṭha kan hrilh ṭhin che u kha.

¹⁰Thianghlim leh fel leh demawm lo takin ringtute lakah kan awm ṭhîn tih hretute nangni in ni a, Pathian pawhin min hriatpui a ni.

¹¹Pain a fate chunga a tih angin in zaa chungah kan ti ṭhîn tih in hria.

¹²A ram leh a ropuina chang ve tûra kotu che u Pathian mi ni tlâka awm tûrin kan ngênin kan fuihin kan hriattîr ṭhîn che u a nih kha.

¹³Hemi avâng hian bâng lovin Pathian hnênah lâwmthu kan sawi bawk ṭhîn, kan thu rawn hril in pawm lai khân, mihring thu anga pawm lovin, Pathian thutak pawma in pawm zâwk avâng khân. Pathian thu ngei a ni rêng a, nangni ringtuteah pawh a thawk bawk a ni.

¹⁴Unaute u, nangni pawh Judai rama Pathian kohhranho Krista Isuaa awmte ang in ni, annin Juda-te laka an tuar angin nangni pawhin in mite lakah in tuar kha.

¹⁵Chûng Juda-te chuan Lalpa Isua leh zâwlneite an that a, keini pawh min tiduhdah a, Pathian an tilâwm lo va, mi dang pawh dodâl loh an nei lo.

¹⁶Jentail-te chhandam an nih vena tûra Chanchin Ṭha an hnêna kan hrilh min khap a, an sual vâwrtâwp an thleng a, Pathian thinurna an chungah a lo thleng ta nge nge a ni.

¹⁷Unaute u, thinlung lamah ni lovin, taksa lamah hun eng emaw chhûng kan inṭhen rih a; chuvângin, in hmêl hmuh leh kan châk takmeuh a, hmuh tum che uin kan bei nasa a ni.

¹⁸Rawn tlawh che u kan tum ṭhîn a, kei Paula ngei pawh hian vawi hnih vawi thum ka tum tawh a; mahse, Setanan min dâl ṭhîn a ni.

¹⁹Kan Lalpa Isua lo kal leh hunah, a hmaa hmuh kan beisei tûr, kan hlimna tûr, chawimawina chhuanawm kan khum tûr chu nangni lo tu dang nge ni ang?

²⁰Nangni hi kan ropuina tûr leh kan hlimna tûr chu in ni asin.