Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA THESSALONIKA 3 Bible Online

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 3 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 3

¹In chanchin hre lova awm kan theih tâk loh avângin keini chauh hi Atheni khuaah awm hnufual ila ṭha kan ti a;

²tichuan, kan unaupa Timothea, Krista Chanchin Ṭha hrila Pathian rawng kan bâwlpui hi in rinna tinghet tûr leh,

³hêng tihduhdahnate avânga in zînga mi tu mah in nghîn loh nân fuih tûr che u-in kan rawn tîr a ni. Nangni pawhin hêng hi kan tuar ngei tûr a ni tih in hriat kha.

⁴In hnêna kan awm lai khân tihduhdahna kan tuar dâwn tih kan hrilh lâwk che u kha, chutiang ngei chuan a lo thleng ta tih in hria e.

⁵Rinnaa in ngheh zêl leh zêl loh hre lova awm reng kan theih loh avângin Timothea kha kan rawn tîr a ni; thlêmtuin thlêm thlu che u-in, kan hna thawh a thlâwn mai dah ang e tih hlauva rawn tîr kan ni.

⁶Timothea chu in hnên ata a lo thleng leh ta a, chanchin lâwmawm tak, in rin nghehzia te, hmangaihna in ngahzia te, keinin hmuh che u kan châk êm êm ang bawka min hmuh in châk ve thu te, eng lai pawhin min hre reng a ni tih te min rawn hrilh a.

⁷Chuvâng chuan, unaute u, in rinna a ngheh avângin kan manganna leh kan hrehawmna zawng zawngah thlamuang takin kan awm thei ta a ni.

⁸Lalpaa in ngheh zêl avâng hian tûnah chuan kan tân dam man a awm ta e.

⁹Nangmahni zâra Pathian hmaa kan hlimna zawng zawng avâng hian a hnênah lâwmthu hrilh kan va ba nasa êm!

¹⁰In hmêl kan hmuh theihna tûr leh rinna lama in tlâkchham kan phuhrûksak theihna tûr che uin Pathian hnênah chhûn leh zân ṭhahnemngai takin kan dîl ṭhîn a ni.

¹¹Kan Pa Pathian ngei leh kan Lalpa Isua chuan in hnêna kan lo kalna tûr kawng min siamsak rawh se.

¹²Kan hmangaih che u ang taka nasaa in inhmangaih theih nân leh mi zawng zawng in hmangaih theih nân, in hmangaihna chu Lalpan tiṭhangin tihpunsak che u rawh se.

¹³Tichuan, kan Lalpa Isua chuan, a mi thianghlim zawng zawng nên a lo kal hunah, Pathian kan Pa hmaah chuan thianghlim leh sawisêlbova awm thei tûrin in thinlung tinghet rawh se.