Read Mizo Lushai KHUAA MITE HNENA TIRHKOH PAULA LEHKHATHAWN PAKHATNA THESSALONIKA 5 Bible Online

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 5 - Mizo Lushai bible

KHUAA MITE HNENA TIRHKOH PAULA LEHKHATHAWN PAKHATNA THESSALONIKA 5

¹Amaherawhchu, unaute u, a hun leh a ni thute ziaksak in ngai lo ve.

²Lalpa Nî chu zâna rûkru lo kal angin a lo thleng dâwn tih nangmahni ngeiin chiang takin in hre si a.

³“A him e, a muanawm e,” an tih laiin hmeichhe nau vei angin chhiatna an chungah a lo thleng thut ang a, an pumpelh tawp lo vang.

⁴Unaute u, nangni erawh chu thimah in awm loh avângin chumi ni chuan rûkru angin a nang lo vang che u.

⁵In vaiin êng fate leh ni fate in ni vek si a. Zâna mi kan ni lo va, thima mi kan ni hek lo.

⁶Chuvângin, mi dangte angin i muhîl suh ang u khai, mengin i ngaihven zâwk ang u.

⁷Muhîlte chu zânah an muhîl ṭhîn a, zu ruite pawh zânah a ni an ruih ṭhin.

⁸Keini zawng chhûna mi kan nih avâng hian, rinna leh hmangaihna âwmphaw chu ha-in, chhandam beiseina chu lukhuma hmangin, harhfîm takin i awm zâwk ang u.

⁹Pathianin thinurna tuar tûr ni lovin, kan Lalpa Isua Krista zâra chhandam ni tûrin min ruat zâwk a ni.

¹⁰Kan dam emaw, kan thi emaw, amah nên kan nun tlân theih nân ani chu kan tân a thi si a.

¹¹Chuvângin, inthlamuan tawnin, intichak tawn rawh u, in tih fo ṭhin ang hian.

¹²Unaute u, in tân rim taka thawktu, Lalpaa nangmahni enkawltute leh zilhtute chu hre reng tûrin kan ngên a che u.

¹³Anni chu an hna thawh avânga ngaisâng êm êmin hmangaih ula, inngeih dial dial rawh u.

¹⁴Tin, unaute u, ka ngên a che u, mi dâwngdahte zilh ula, mi beidawngte chu thlamuan ula, mi chak lote ṭanpui ula, mi zawng zawng dawhthei rawh u.

¹⁵Tu sual mah suala thungrûl lo tûrin fîmkhur ula, eng lai pawha thil ṭha intihsak tawn zâwkin mi zawng zawng chungah thil ṭha ti zêl rawh u.

¹⁶Lâwm fo ula,

¹⁷bâng lovin ṭawngṭai ula,

¹⁸engkimah lâwmthu hril fo rawh u. Hei hi Krista Isuaah chuan Pathianin in tih a duh chu a ni.

¹⁹Thlarau chu timit suh u.

²⁰Thuhrilte pawh hmusit suh u.

²¹A enga pawh chu fiah hmasa ula, a ṭha chu pawm tlat ula,

²²a ṭha lo apiang tlânsan rawh u.

²³Remna Pathian ngei chuan in pumin tithianghlim che u sela, kan Lalpa Isua Krista lo kal hunah chuan in thlarau leh in rilru leh in taksa a puma sawisêlbovin awmtîr rawh se.

²⁴A kotu che u chu a rinawm a, tih pawh a ti ngei ang.

²⁵Unaute u, min ṭawngṭaisak rawh u.

²⁶Unau zawng zawng kha kut vuanin chibai mi bûksak ṭheuh rawh u.

²⁷He lehkha hi unau zawng zawng hriata chhiar tûrin Lalpa hmingin ka ngên a che u.

²⁸Kan Lalpa Isua Krista khawngaihna chu in hnênah awm rawh se.