Read Mizo Lushai Josua 1 Bible Online

Josua 1 - Mizo Lushai bible

Josua 1

¹ LALPA chhiahhlawh Mosia thih hnuin Mosia puitu, Nuna fapa, Josua hnênah LALPA chuan,

²“Ka chhiahhlawh Mosia chu a thi ta a, Israel mi zawng zawng hi Jordan lui kânpui rawh, ka pêk tûr rama kal tûrin inpuahchah rawh u.

³Mosia hnêna ka hrilh tawh ang khân in kephaha in rah apiang, nangni, ka mite hi ka pe ang che u.

⁴Chhim lam thlalêr aṭanga hmâr lam Lebanon tlâng chhak lam Eufretis luipui aṭanga khawthlang lam Hit mite ram, Mediteranean tuipui thlengin in ram a ni ang.

⁵Josua, i dam chhûngin, tu man an chelh lo vang che. Mosia hnêna ka awm ang khân i hnênah pawh ka awm reng ang a, ka awmpui reng ang chia, ka thlahthlam tawp lo vang che.

⁶Huai takin ṭan la rawh; tichuan, an thlahtute hnêna pêk ka tiam tawh ram chu i luahpui dâwn nia.

⁷Huai takin ṭan la vak phawt mai rawh; Mosian ka dân a hrilh che kha zâwm vek la, pakhat tê mah ngaihthah suh; tichuan, kawng engkimah i hmuingîl ang.

⁸Eng lai mahin ka dân bu chhûnga thu ziakte chu chhiar theihnghilh suh, i zawm vek theih nân a chhûn a zânin sawi ṭhîn ang che; tichuan, kawng engkimah i tluang ngei ang.

⁹Huai takin ṭang rawh ka tih che kha hre reng rawh, hlau suh la, zâm hek suh; kei, LALPA hian i kalna apiangah ka awmpui zêl che a ni,” a ti a.

¹⁰Josua chuan Israel-ho hruaitute hnênah,

¹¹“Riahhmunah kal vek ula, mite hnênah, ‘Ni thum chhûngin, LALPA in Pathianin a pêk che u ram luah tûrin Jordan lui in kai dâwn a, ei tûrte buatsaih rawh u’ ti ang che u,” a ti a.

¹²Reuben-ho te, Gad-ho te leh Manase-ho zâtve te hnênah Josua chuan,

¹³“LALPA chhiahhlawh Mosian in hnênah hetiangin a sawi a nih kha hre reng rawh u, ‘In Pathian, LALPA chuan Jordan lui chhak lamah in ram chanpual tûr a pe ve ang che u;

¹⁴in nupui te, in fanau te, in ran vulh te chu he laiah hian an lo awm ang a, in zînga râlthuam kengte hi chuan lui in lo kai hmasa ang a, in unau Israel-te hi in pui tûr a ni.

¹⁵LALPA in Pathianin a pêk tûr che u ram, Jordan lui khawthlang lam chu an luah fel a, Israel hnamten an awmna tûr ṭheuhva him taka an awm hunah chauh in kîr thei ang a, Jordan chhak lam ram, LALPA chhiahhlawh Mosian a pêk che u-ah hian in awm thei ang,’ a tih kha,” a ti a.

¹⁶Josua chu an chhâng a, “Min hrilh apiang kan ti ang e, kal rawh u i tihna apiangah kan kal zêl ang.

¹⁷Mosia thu kan awih ṭhîn ang khân i thu pawh kan awih ang; LALPA i Pathian chuan Mosia a awmpui ṭhîn ang khân awmpui zêl che rawh se.

¹⁸I thu kalha, i thupêk zâwm duh lo chu tihlum mai ang che. Huai takin ṭan la sauh sauh phawt mai teh,” an ti a.