Read Mizo Lushai Josua 10 Bible Online

Josua 10 - Mizo Lushai bible

Josua 10

¹Chutih lai chuan Jerusalem khaw lal chu Adoni-zedeka a ni a. Josuan Ai khua a lâk a, a tihchhiat vek thu te, Jeriko leh an lal a sawisak ang khân Ai khua leh an lal a sawisa tih thu te a lo hria a; Gibeon mite pawhin Israel-te nên inremna an nei a, an zîngah an tel ve ta tih te an lo hre bawk a.

²Chuvângin, Jerusalem mite chuan an hlau hle a; Gibeon khua phei chu lal nei khaw dang tluk bawka tam an ni a. Ai khua ai pawhin an tam, indo pawh an thiam hle a ni.

³Jerusalem lal Adoni-zedeka chuan Hebron lal Hohama te, Jarmut khaw lal Pirama te, Lakis lal Jafia te, Eglon lal Debira te chu thu a chah a.

⁴“Lo kal ula, Gibeon-ho hi i bei teh ang, Josua leh Israel-te nên inremna an lo siam reng alâwm,” a ti a.

⁵Amor-ho lal panga, Jerusalem lal te, Hebron lal te, Jarmut lal te, Lakis lal te, Eglon lal te chu an ṭang rual a, Gibeon khua chu an hual a, an bei ta a.

⁶Gibeon mite chuan Gilgal-ah Josua hnênah zualko an tlântîr a, “I chhiahhlawhte hi thlahthlam teh suh, lo chho vat la, min han pui rawh,” an ti a.

⁷Tichuan, Josua chu Gilgal aṭang chuan indo mi, mi huaisen rualte chu hruaiin a chho ta a.

⁸ LALPA chuan Josua hnênah, “Huphurh suh, anni chu ka pe tawh a che; tu mahin an lo dang hauh lo vang che,” a ti a.

⁹Gilgal aṭang chuan zankhuain Gibeon thlengin an kal a. Amor mite chu an bei ta thut a.

¹⁰Amor mite chuan Israel-te an hmuh chuan LALPAN a tizâm a, Gibeon-ah chuan Israel-te chuan an that chiam a, a ṭhen chu Beth-horon kalkawngah an ûm thla a, chhak lamah Azeka leh Makeda thleng zakin an ûm a.

¹¹Kalkawnga an tlân laiin LALPA chuan rial lian pui pui a dentîr a, Azeka thleng rawkin a dêng a. Israel-ho thah ai chuan rial dena thi chu an tam zâwk mah.

¹² LALPA chuan Israel mite chu Amor-ho a hnehtîr ni chuan Josuan LALPA chu a bia a, Israel-te hriatah: “Chungtûrni, ding reng rawh, Gibeon chungah Chhawrthlapui, nang pawh Aijalon ruamah ding ve rawh,” a ti a.

¹³Ni chu a ding a, thla chu a che bawk lo. An hmêlmate an sawisak nek hma chu. ‘Jasar lehkhabu’ an tihah chu thu chu ziak a ni. Vânlaizâwlah ni chu a ding a, ni khat hu lai a ding.

¹⁴Chutiang khawpa mihring thu mai LALPA chuan a zawm ni a la awm ngai lo, awm pawh a awm leh hek lo vang. LALPA chuan Israel-te chu a dopui a ni.

¹⁵Chûng hnu chuan Josua leh a hote chu an riahhmun Gilgal-ah an kîr leh ta a.

¹⁶Amor lal panga kha an tlânchhia a, Makeda pûkah an biru a.

¹⁷Josua hnênah, “Lal pangate kha kan hmu ta, Makeda pûkah an biru a ni,” an rawn ti a.

¹⁸Josua chuan, “Pûk kawngka chu lung lian pui puiin chhîn ula, mi ṭhenkhat vêng tûrin dah rawh u.

¹⁹Nangni erawh chuan hmêlmate chu tlân khalh ula, an khaw kulha an tlân lût tûr dang tlat rawh u, LALPA, in Pathian chuan a hnehtîr che u hi,” a ti a.

²⁰Josua leh Israel-te chuan an hmêlmate chu an that chiam a, an that fai a ni deuh mai, an thah bâng tlêm chu an khaw kulhahte an tlân lût a.

²¹Josua bûk khuarna Makeda-ah chuan a hote chu râlmuang takin an lo kal a; Israel-ho chu hnialkalh ngam rêng an awm lo.

²²Josua chuan, “Pûk kawngka kha hawng ula, lal pangate kha han hruai chhuak teh u,” a ti a.

²³Jerusalem lal te, Hebron lal te, Jarmut lal te, Lakis lal te leh Eglon lal te chu pûk ata an rawn hruai chhuak a.

²⁴Hêng lal pangate hi a hnêna an rawn hruai chuan Israel mite chu a ko khâwm a, a sipai hruai hotute hnênah chuan, “Lo kal ula, hêng lal pangate hi an nghâwngah rap rawh u,” a ti a. An lo kal a, an nghâwngah an rap a.

²⁵Josua chuan, “Hlau mah ta che u, zâm pawh zâm suh u, huai takin ṭang sauh sauh rawh u. LALPA chuan in do apiang hetiang hian a tihsak dâwn che u asin,” a ti a.

²⁶Chumi hnu chuan lalte chu Josua chuan a that a, thing pangaah a khai a; tlai thlengin an ruang chu a inkhai a.

²⁷Ni a tlâk dâwnah an ruang chu a lâk thlâktîr a, an bihrûkna pûkah chuan a paihtîr a, pûk kawngka chu lung lian pui puiin an chhîn a, tûn thlengin a la awm.

²⁸Chumi ni chuan Makeda khua chu Josua chuan a bei a, a la a, an lal pawh a man a, khuaa mi zawng zawng chu Jeriko lal a thah ang khân a that a.

²⁹Josua chu Makeda aṭang chuan Israel-hote nên Libna-ah an kal a, khua chu an bei a.

³⁰LALPA chuan chu khua leh an lal chu Israel-te kutah a pe a; khuaa mi zawng zawng chu an sât hlum a, tu mah nungdamin an chhuah lo. An lal pawh Jeriko lal an thah angin an that a.

³¹Libna khua aṭang chuan Josua leh Israel-te chu Lakis khuaah an kal a, an hual a, an bei a.

³²Israel-te kutah Lakis khua chu LALPAN a pe a, a ni hnih ni-ah an la ta mai a. Libna khua an tih ang bawk khân khuaa mi zawng zawng chu a sât hlum vek a.

³³Gezer khaw lal Horama chu Libna khua pui tûrin a lo chho va, Josua chuan ani chu a sipaite nên a lo hneh a, pakhat mah hmaih lovin a lo that a.

³⁴Josua leh Israel-te chu Libna aṭang chuan Eglon khuaah an kal a, an hual a, an bei a.

³⁵Chumi ni vêk chuan an la a, chumi ni chuan mi awm zawng zawng an sât hlum phiar a, Lakis an sawisak ang bawk khân an sawisa a.

³⁶Josua leh Israel-te chu Eglon aṭang chuan Hebron khuaah an chho va, an bei a.

³⁷Khua chu an la a, chuta awm zawng zawng chu an lal nên lam an sât hlum a, an chhehvêl khuaa awmte pawh an sât hlum a. Eglon khua an tih ang khân Hebron pawh chu an tichhe vek a, tu mah nungdamin an chhuah lo.

³⁸Josua leh Israel-te chu an kir a, Debir khua an bei a.

³⁹Khua chu an la a, an lal chu an man a; an chhehvêl khuate pawh an la a. Chûnga awm zawng zawng chu an sât hlum vêk a, Josua chuan Debir khua leh an lal chu Libna khua leh an lal an tih ang khân a ti a.

⁴⁰Josua chuan ram chu a la ta vek a. Tlângram te, khawchhak tlâng pang te, khawthlang tlâng bulṭhut phai te, chhim lam ramte nên lam a la a, an lalte chu a hneh vek a, tu mah a zuah lo. Israel-te Pathian, LALPA thupêk angin thaw thei tawh phawt chu a that vek a.

⁴¹Kades-barnea aṭangin Gaza inkâr ram zawng zawng, Gosen ram pawh, Gibeon thlengin Josua chuan a la a.

⁴²Chûng rama lal zawng zawng leh an ram chu, Israel-te Pathian, LALPA chuan a beihpui avângin ṭum khatah Josua chuan a la a ni.

⁴³Josua leh Israel-te chu an riahhmun Gilgal-ah chuan an haw leh ta a.