Read Mizo Lushai Josua 11 Bible Online

Josua 11 - Mizo Lushai bible

Josua 11

¹Hêng thu hi Hazor lal Jabinan a lo hriat chuan Madon khaw lal Jobaba te, Simron khaw lal te, Aksaf khaw lal te,

²hmâr lam tlângram lal te, Galili dîl chhim Araba khaw lal te, Mediteranean tuipui kam Dor khaw lal te,

³khawchhak lam leh khawthlang lama Kanan lal awm te, Amor-ho lal te, Hit-ho lal te, Periz-ho lal te, tlângrama Jebus-ho lal te, Mizpa ram Hermon tlâng bula Hiv-ho lal te chu a pun khâwm a.

⁴An sipaite nên an lo thawk a, tuipui kama ṭiau zât hiala tam an ni. Sakawr te, sakawr-tawlailîr te pawh an rawn keng ṭeuh va.

⁵Hêng lalte hi an ṭangrual a, Israel-te bei tûrin Merom lui kamah ṭanhmun an khuar a.

⁶ LALPA chuan Josua hnênah, “Hêngho hi huphurh suh, naktûk hetih hunah hian tihlum vekin Israel-te hnênah ka hlân ang, an sakawrte chu an tha chhahsak la, an tawlailîrte hâl ang che,” a ti a.

⁷Josua leh a hruai ṭhin indo mite chu an thawk chhuak a, Merom luiah chuan an va bei thut a.

⁸LALPA chuan Israel-te kutah a pe a, an bei a, an thah zawh vek hma chu Misrefotmaim leh Sidon thleng rawkin an ûm a, chhak lamah Mizpa ruam thlengin an ûm bawk a.

⁹LALPA thupêk angin Josua chuan an sakawr tha te chu a chhahsak a, an tawlailîrte chu a hâl a.

¹⁰Josua chu a kîr a, Hazor khua a la a, an lal chu a sât hlum a, tûn hma chuan hêng lai khuaah Hazor hi khaw lian ber a ni ṭhîn.

¹¹Khuaa mi zawng zawng chu a sât hlum vek a, thaw thei tawh phawt chu zuah rêng a nei lo. Hazor khua chu a hâl a.

¹²Josua chuan hêng khua zawng zawng hi a la vek a, an lalte pawh a man a, LALPA chhiahhlawh Mosia thu ang khân a tihlum vek zêl a.

¹³Hazor khua, Josua hâl tih loh chu, Israel-te chuan an khaw tihchhiata in la dingte chu an hâl lo.

¹⁴Hêng khuaa an râllâk sum leh rante chu Israel-te chuan mahni tân ṭheuh an nei a, mihring erawh chu an sât hlum vek a ni; thaw thei tawh phawt chu hmaih rêng an nei lo.

¹⁵A chhiahhlawh Mosia hnênah LALPA chuan thu a pe a. Mosia chuan chutiang bawkin Josua chu thu a pe a; chutiang tak chuan Josua chuan a ti a. Mosia hnêna LALPA sawi, thil bawlhhlawh rêng rêng chu, tihbo loh eng mah a nei lo.

¹⁶Josuan ram zawng zawng chu a la a, Negeb leh tlângram te, Gosen ram phai te, tlâng bulṭhut phai te, Jordan ruam te, Israel tlângram te, a vêl tlâng bulṭhut phai te chu a la vek a.

¹⁷A ram lâk chuan chhim lamah Halak tlâng, Seir bul aṭangin hmâr lamah Baalgad, Lebanon ruam Hermon tlâng bul a thleng a. An lalte chu a hneh a, a man a, a that a.

¹⁸Josua leh hêng lal zawng zawng hi rei tak an indo a ni.

¹⁹Gibeon khuaa awm Hiv-ho chauh lo chu Israel-te nêna inbe rem khaw pakhat mah an awm lo, a lâkin an la vek a ni.

²⁰LALPA chuan Israel-te bei tûrin hêngho hi a tiluhlul a ni; Mosia hnêna LALPA thupêk angin lainat miah lova tihmang vek an nih phah ta a.

²¹Josua chu a kal zêl a, tlângrama Hebron khuaah te, Debir khuaah te, Anab khuaah te, milian Anak an tih la awmte chu a that vek a. Judai leh Israel tlângrama awmte pawh an zavaiin, an khuate nên a tiral vek a.

²²Israel mite ramah chuan milian rêng an awm tawh lo. Gaza khuaah te, Gath khuaah te, Asdod khuaah te erawh chuan an la awm pheuh pheuh.

²³Mosia hnêna LALPA thupêk ang khân Josua chuan ram a lâka a lâk vek hnuin an ramro atân Israel-te chu a hnam hnamin a sem ta a. Ramah chuan indona a awm ta lo va.