Read Mizo Lushai Josua 12 Bible Online

Josua 12 - Mizo Lushai bible

Josua 12

¹Jordan chhak lam Arnon lui aṭanga Hermon tlâng thlengin Jordan luiruam ramte chu Israel-te chuan an hneh a, an neihsak tawh a.

²Amor mi, Hesbon lal Sihona leh Basan lal Oga an hneh a. Sihona ram chuan Gilead chanve a huam a ni; Arnon luiruam ko chunga Aroer khua leh Arnon lui kama khua aṭangin Jabok lui a thleng a, chu chu Amon-ho nêna an inrina a ni.

³An ram chuan Jordan kam chhak lam, Galili dîl aṭanga chhim lam lui phai zawng zawng, Beth-jesimot, Tuipui Thi chhak lam Pisga thlengin a huam bawk.

⁴Basan lal Oga chu milian, Refaim an tih la dam awmchhun zînga mi a ni, Astarot leh Edrei khuaah a lal a.

⁵A ram chuan Hermon tlâng te, Seleka te leh Basan ram zawng zawng, Gezer leh Maaka ramri thleng a huam a; Gilead ram zâtve leh Hesbon lal Sihona ramri thlengin a huam bawk.

⁶Hêng lal pahnihte hi Mosia hovin Israel-te chuan an hneh a, LALPA chhiahhlawh Mosia chuan Reubena thlah leh Gada thlahte leh Manasea thlah zâtve te hnênah an ram chanpual atân a pe a.

⁷Hmâr lama Baal-gad, Lebanon ruama awm leh chhim lam Seir tlâng bula Halak tlâng inkâr ram zawng zawng, Jordan lui khawthlang lama awm leh an lalte chu Josua leh Israel-te chuan an hneh a. Chûng ram chu Josuan Israel hnamte hnênah ram chanpual atân a sem a.

⁸Hei hian hêngte hi a huam: tlângram te, khawthlang lam tlâng bulṭhut te, Jordan luiruam te, a dawt tlâng bulṭhut zâwl te, chumi chhak tlâng te leh Negeb thlalêr te hi. Chûng rama lo awmte chu Hit mi te, Amor mi te, Kanan mi te, Periz mi te, Hiv mi te leh Jebus mi te an ni.

⁹Lal an hneh, an thahte chu hêng hi an ni: Bethel khaw bula Ai khaw lal, Gezer lal;

¹⁰Jerusalem lal, Hebron lal,

¹¹Jarmut lal, Lakis lal;

¹²Eglon lal, Gezer lal;

¹³Debir lal, Geder lal;

¹⁴Horma lal, Arad lal;

¹⁵Libna lal, Adulam lal;

¹⁶Makeda lal, Bethel lal;

¹⁷Tapua lal, Hefer lal;

¹⁸Afek lal, Saron lal;

¹⁹Madon lal, Hazor lal,

²⁰Simron-meron lal, Aksai lal;

²¹Taanak lal, Megido lal;

²²Kades lal, Karmel tlânga Jokneam lal;

²³Mediteranean tuipui kam Dor lal, Gilgal-a Goim lal;

²⁴Tirza lal te hi. An lal thah zawng zawng chu an vaiin sawmthum leh pakhat an ni.