Read Mizo Lushai Josua 13 Bible Online

Josua 13 - Mizo Lushai bible

Josua 13

¹Josua chu a lo upa a, a tar ta hle a; LALPA chuan a hnênah, “I lo upain i tar ta hle a, ram lâk tûr lah chu a la tam mai si a.

²Filistia leh Gesur-ho awmna ram te,

³chhim lam ram Avim-ho awmna te la lâk loh a ni. Aigupta ramri Sihor lui aṭanga hmâr lam Ekron thleng hian Kanan mite rama ngaih a ni. Filistia-ho chu Gaza-ah te, Asdod-ah te, Askelon-ah te, Gath-ah te lalah an ṭhu a ni.

⁴Kanan-ho ram leh Sidon-ho ram Meara chu Amor ramri Afek thlengin la lâk loh a ni.

⁵Gebal mite ram, Lebanon tlâng chhak lam Hermon tlâng bula Hamath kalkawng thleng lâk loh a la ni bawk.

⁶“Lebanon tlâng leh Misrefot-maim inkâr tlângrama awm zawng zawng Sidon mite chu, keiman Israel mite hmaah ka la ûm chhuak ang; thu ka pêk che angin an ram chanpual atân Israel-te chu pe phawt mai rawh.

⁷Khai le, ram hi Israel hnam kua leh Manasea thlah zâtve te hnênah, an ram chanpual atân sem rawh,” a ti a.

⁸Manasea thlah zâtve te nên Reubena thlah leh Gada thlahte chuan Jordan chhak lamah ram chanpual tûr LALPA chhiahhlawh Mosia pêk kha an nei a.

⁹Arnon luiruam ko chunga khua Aroer leh luidung khua aṭangin tlâng zâwl, Medeba leh Dibon inkâr,

¹⁰Amor mi, Hesbon khaw lal Sihona ram zawng zawng Amon-ho ramri thlengin a huam a.

¹¹Gilead ram huamin Gesur-ho leh Maakat-ho awmna nên, Hermon tlâng leh Basan rama Seleka a thleng a.

¹²Astarot leh Edrei lal Oga ram Basan te a huam a, ani chu Refaim la awmchhunte zînga mi a ni; Mosia khân chûngho chu a hneh a, a ûm chhuak a ni.

¹³Gesur mite leh Maakat mite chu Israel-te chuan an ûm chhuak lo, tûn thlengin Israel-ho zîngah an la awm ve a ni.

¹⁴Levia thlahte erawh chu ram chanpual an pe ve lo. Israel-te Pathian, LALPA hnêna an thilhlan hâl bâng chu an chanpual atân pe tûrin LALPA chuan Mosia chu a hrilh a nih kha.

¹⁵Mosian Reubena thlahte chu a chhûng chhûnga insem tûr ram a pe a nih kha.

¹⁶An ram chhim lam ri chu Arnon luiruam ko chung Aroer khua leh lui kama khaw awm kha a ni; Medeba tlâng zâwl te,

¹⁷Hesbon khua leh a chhehvêl khua, tlâng zâwla awm te, Dibon te, Mamoth-baal te, Beth-baal-meon te,

¹⁸Jahaz leh Kedemot te, Mefaat te;

¹⁹Kiriathaim te, Sibma te, Zereth-sahar, ruam zâwla awm te;

²⁰Beth-peor te, Pisga tlâng pang te, Beth-jesimot te a huam a.

²¹Tlâng zâwl khua zawng zawng leh Amor mi Hesbon lal Sihona ram zawng zawng a huam bawk a. Ani chu Mosian a hneh a, Midian hotu Evia te, Rekema te, Zura te, Hura te leh Reba te pawh a huam tel a; hêngho hi Sihona hnuaia rorêltu an ni.

²²Israel miten Beora fapa Balaama, aienthiam chu an that bawk.

²³Khawthlang lama an ramri chu Jordan lui a ni. Reubena thlahte neih atân khîng khawpuite leh an chhehvêl khuate khi an pe a.

²⁴Mosia chuan Gada thlahte chu a chhûng chhûnga insem atân an ram chanpual tûr a pe a.

²⁵An ram chuan Jahaz leh Gilead khawpui zawng zawng a huam a, Amon-ho ram zâtve, Raba chhak lama awm Aroer a huam thleng a.

²⁶Hesbon leh Ramat-mizpa leh Betonim inkâr ram te, Mahanaim aṭanga Lo-debar ri inkâr te a huam bawk a.

²⁷Jordan luidungah chuan Beth-haram te, Beth-nimra te, Sukot te, Zafon te leh Hesbon lal Sihona ram ṭhînte a huam tel bawk a. Khawthlang lama an ramri chu Jordan lui, Galili dîl thlengin a ni.

²⁸Gada thlahte neih atân khîng khawpuite leh a chhehvêl khuate khi an pe a.

²⁹Mosia chuan Manasea thlah zâtve tân a chhûng chhûnga insem atân ram chanpual an neih tûr a pe a.

³⁰An ram chuan Mahanaim aṭanga Basan ram, Basan lal Oga ram zawng zawng a huam a, Basan ram Jair bial khaw sawmruk pawh a huam a ni.

³¹Gilead bial zâtve, Astarot te, Edrei te, Oga ram Basan khawpuite chu a pe tel bawk a. Manasea fa Makira thlahte hnênah khîng ramte khi a pe a ni.

³²Moab phaia an awm lai khân, Jeriko khaw chhak lam ram chu khitiang khian Mosian a sem a.

³³Mosian Levia thlahte chu ram a ruatsak ve lo. Israel-te Pathian, LALPA hnêna thilhlan chu an chanpual atân a ruat a ni.