Read Mizo Lushai Josua 14 Bible Online

Josua 14 - Mizo Lushai bible

Josua 14

¹Jordan lui thlang lama Kanan ram chu Israel mite hnênah puithiam Eleazara te, Nuna fapa Josua te leh Israel hnam hruaitute chuan hetiang hian an sem a.

²LALPA thupêk angin hnam kua leh a chanve chan tûrin ṭhum an vâwr a, an sem a.

³Jordan chhak lama hnam hnih leh a chanve chu Mosian ram chanpual tûr a pe tawh a; an zîngah Levia chite ram a pe ve lo.

⁴Josefa thlahte kha hnam hnih, Manasea leh Efraim hnamah ṭhen an ni a; mahse, Levia thlahte chu ram chanpual a pe ve lo. Awmna khua erawh chu an bâwngte leh berâm leh kêl tlatna tûr ram nên an pe a.

⁵Mosia hnêna LALPA thupêk ang chuan Israel-te chuan ram chu an insem ta a.

⁶Gilgal-a an awm laiin Juda thlah zînga mi ṭhenkhat Josua hnênah an lo kal a. An zînga pakhat, Keniz mi, Jefunea fapa Kaleba chuan Josua hnênah, “Kades-barnea kan awm laia Pathian mi Mosia hnêna kan pahniha chungchâng LALPA sawi kha i hria a.

⁷LALPA chhiahhlawh Mosian he ram hi en thlithlai tûra min tirh khân kum sawmli-a upa ka ni a, thil ka hmuh dân ang chiah ka hrilh a nih kha.

⁸Ka kalpui, ka unaute khân, mipui an tilunghnûr a, kei erawh chuan ka Pathian, LALPA thu ka zâwm tlat a nih kha.

⁹Kan Pathian, LALPA thu i zawm tlat avângin i kein a rah ram chu in ram chanpual atân i nei ngei ang,’ tiin Mosian khami ni khân thu a tiam a nih kha.

¹⁰Khai le, tûnah khatia Mosia hnêna LALPA thu sawi kha kum sawmli leh panga lai a ni ta a, Israel-te thlalêra an tei an tei lai ata tûn thlengin LALPA chuan a sawi angin nungdamin min la zuah tâk rêng hi; en teh, kum sawmriat leh panga zu ni ta ia!

¹¹Mosian min tirh lai ang mai khân vawiinah pawh ka la chak a ni. Indonaah pawh kala, duh duha chhuakvâk theiin ka la chak a ni.

¹²Chuvângin, kan kalpuite nêna thu kan thlen laia LALPA sawi, he lai tlângram hi, min pe ta mai che, Anak mi, milianho chu kulh lian pui puiah an awm tiin kan hrilh che kha; LALPA chuan min awmpui ang a, LALPA thupêk angin ka luhchhuak vek mai thei asin,” a ti a.

¹³Josua chuan mal a sâwmsak a, Jefunea fapa Kaleba chu ram chanpual atân Hebron chu a pe ta a.

¹⁴Tichuan, Israel-te Pathian, LALPA thu chu a awih tak tak avângin tûn thlengin Hebron chu Jefunea fapa, Keniz mi Kaleba ram chanpual a ni ta a.

¹⁵Hebron chu tûn hma chuan Kiriat-arba tih a ni ṭhîn a, chu chu Arba khua tihna a ni. Arba chu Anak-ho zîngah chuan lal ropui ber a ni. Ram chu a râlmuang ta a.