Read Mizo Lushai Josua 15 Bible Online

Josua 15 - Mizo Lushai bible

Josua 15

¹Juda thlahte, a chhûng chhûnga an insem tûr ram chuan chhim tâwpa Edom ram leh Zin thlalêr a thleng a.

²Chhim lam ramri chu Tuipui Thi chhim lam kil tâwpah a inṭan a.

³Chhim lam panin Akrabim kalkawng a kal a, Zin thlalêrah a lût a, Kades-barnea chhim lamah Hezron thlengin a kal a, Adar-ah a chho va, Karka lamah a inher a,

⁴Azmon-ah a kal zêl a, Aigupta ramri luiah a chhuk a, lui chu zuiin Mediteranean tuipui a zu chhun a. Hei hi Judai ram chhim lam ri chu a ni.

⁵Khawchhak lam ri chu Tuipui Thi a ni, Jordan lui chhuah thlengin a ni.

⁶Hmâr lam ramri chu Jordan lui chhuahah a inṭan a, Beth-hogla-ah a chho va, Beth-araba hmâr lamah a kal a, Bohana lung a chhun a. Bohana hi Reubena fa a ni.

⁷Akor ruam aṭangin Debir khuaah a chho va, hmâr lam panin chumi ram chhim tâwpa Adumin kalkawng hawi zâwnga awm Gilgal a thleng a. En-semes tuikhurah a kal zêl a, En-rogel-ah a kal a.

⁸Jebus-ho khua Jerusalem awmna chhim lam ruam Hinom chu a thleng a. Hinom thlang lam tlângah ri chu a kal zêl a, Refaim ruamah a chhuk a:

⁹Neftoa tuikhurah a kal a, Efron tlânga khuaahte chuan a kal tlang a; Baala khaw lamah a inher a; chu khua chu Kiriat-jearim an ti bawk.

¹⁰Thlang lam hawiin Baala a kal hual a, Seir tlâng a thleng a, Jearim tlâng hmâr lam pangah a kal a, Beth-semes-ah a chhuk a, Timna a kal pêl a,

¹¹Ekron khaw hmâr lam tlâng a zui a, Sikeron lamah a inher a, Baala tlâng pêlin Jamnia khua a thleng a, chuta ṭangin Mediteranean tuipuiah a tâwp a.

¹²Tuipui zau tak chu khawthlang lama a ramri a ni. Chu ramri chhûng chu Juda thlahte awmna tûr chu a ni.

¹³ LALPA thupêk angin Josua chuan Jefunea fapa Kaleba chu Juda thlahte ram chan zîngah ram chanpual a pe ve a. Hebron khua, Kiriat-arba an tih, Arba khua chu a nei a, Arba chu Anaka pa a ni.

¹⁴Kaleba chuan Anaka fate pathum Sesaia te, Ahimana te, Talmaia te chu a ûm chhuak a.

¹⁵Tûn hmaa Kiriat-sefer an tih ṭhin Debir khua chu a han bei zui a.

¹⁶Kaleba chuan, ‘Kiriat-sefer han beia latu chu ka fanu Aksaii nupuiah ka pe ang,’ a ti a.

¹⁷Kenaz mi, Kaleba nau, Othniela chuan khua chu a la a, Aksaii chu nupuiah a nei ta a.

¹⁸A lawi ni chuan a pa hnêna ram dîl tûrin a lo fuih a. A sabengtung ata a chhuk a; Kaleba chuan a hnênah, “Eng nge i duh ang?” a ti a.

¹⁹“Min khawngaih la, i ram min pêk hi ram ro a ni a, tui awmna min pe tel ta che,” a ti a. Chuanchung leh chuanhnuai tuihna awmna chu a pe ta a.

²⁰A chhûng chhûnga an insem tûr Juda thlahte chan chu hêng hi a ni:

²¹A chhim berah Edom ramri bâka an neihte chu hêng hi a ni: Kabzeel, Eder, Jagur,

²²Kina, Dimona, Adada,

²³Kedes, Hazor, Itnan,

²⁴Zif, Telem, Bealot;

²⁵Hazor-hadata, Kiriot-hezron, Hazor an ti bawk,

²⁶Amam, Sema, Molada;

²⁷Hazar-gada, Hesmon, Beth-pelet;

²⁸Hazar-sual, Beer-seba, Biziothia;

²⁹Baala, Iim, Ezem;

³⁰Eltolad, Kesil, Horma;

³¹Ziklag, Madmana, Sansana,

³²Lebaot, Silhim, Ain, Rimon leh an chhehvêl khuate nên, a vaiin khawpui chu sawmhnih leh pakua a ni.

³³Tlâng bulṭhuta awmte chu: Estaol, Zora, Asna,

³⁴Zanoa, En-ganim, Tapua, Enam;

³⁵Jarmut, Adulam, Soko, Azeka;

³⁶Saaraim, Adithaim, Gedera, Gederothaim leh an chhehvêl khuate nên, khawpui chu sâwm leh pali a ni.

³⁷Hêng khuate pawh hi a ni: Zenan, Hadasa, Migdalgad,

³⁸Dilean, Mizpa, Joktheel,

³⁹Lakis, Boskat, Eglon,

⁴⁰Kabon, Lahmam, Kitlis,

⁴¹Gederot, Beth-dagon, Naama, Makeda leh an chhehvêl khuate nên, khawpui sâwm leh paruk a ni.

⁴²Hêng khuate pawh hi a tel: Libna, Ether, Asan,

⁴³Ifta, Asna, Nezib,

⁴⁴Keila, Akzib, Maresa leh an chhehvêl khuate nên khawpui pakua a ni.

⁴⁵Ekron pawh a chhehvêl khuate nên a tel.

⁴⁶Asdod bula khawpui leh a chhehvêl khuate, Ekron leh Mediteranean tuipui inkâra khuate pawh a tel.

⁴⁷Asdod leh Gaza, an chhehvêl khuate nên, Aigupta ramri lui nêna an inkâr Mediteranean tuipui kama khaw awmte a tel bawk.

⁴⁸Tlângramah hêng khuate hi a tel bawk: Samir, Jatir, Soko,

⁴⁹Danna, Kiriat-sana, Debir tih a ni bawk;

⁵⁰Anab, Estemo, Anim,

⁵¹Gosen, Holon, Gilo leh an chhehvêl khuate nên, khawpui sâwm leh pakhat a ni.

⁵²Hêng khuate pawh hi a tel: Arab, Duma, Esan,

⁵³Janim, Beth-tapua, Afeka,

⁵⁴Humta, Hebron, Zior leh an chhehvêl khuate nên, khawpui pakua a ni.

⁵⁵Hêng khuate pawh hi a tel: Maon, Karmel, Zip, Juta,

⁵⁶Jezreel, Jokdeam, Zanoa,

⁵⁷Kain, Gibea, Timna leh an chhehvêl khuate nên, khawpui sâwm a ni.

⁵⁸Hêng khuate pawh hi a tel: Halhul, Beth-zur, Gedor,

⁵⁹Maarat, Beth-anot, Eltekon leh an chhehvêl khuate nên, khawpui paruk a ni.

⁶⁰Hêng khuate pawh hi a tel: Kiriat-baal, Kiriat-jearim an ti bawk, Raba leh an chhehvêl khuate nên, khawpui pahnih a ni.

⁶¹Thlalêrah hêng khuate hi a awm: Beth-araba, Midin, Sekaka,

⁶²Nibsan, chi khawpui (Ir-hmalak), Engedi leh an chhehvêl khuate nên, khawpui paruk a ni.

⁶³Juda thlahte chuan Jebus-ho, Jerusalema awmte chu an hnawt chhuak zo lo. Juda thlahte nên, Jebus-ho chu tûn thlengin an la awm ho ta reng a ni.