Read Mizo Lushai Josua 17 Bible Online

Josua 17 - Mizo Lushai bible

Josua 17

¹Josefa fa tîr, Manasea thlahte ram chan chu hei hi a ni: Josefa fapa upa zâwk Manasea fapa Makira, Gileada pa chu, mi huaisen a ni a. Jordan chhak lama Gilead leh Basan ram chu a chanpualah an pe a.

²Jordan thlang lamah Manasea fa dangte tân ram an pe bawk a, chûng mite chu: Abiazera, Heleka, Asriela, Sekema, Hefera leh Semida te an ni. Hêngho hi Josefa fapa Manasea fa, mipaho chhûngkaw lute chu an ni.

³Hefera fapa Zelofehada chuan fapa nei lovin fanu chauh a nei a. A pu chu Makira, Manasea fa a ni. Zelofehada fanute chu, Mahlaii te, Novaii te, Hoglaii te, Milkaii te, Tirzaii te an ni.

⁴Puithiam Eleazara te, Nuna fapa Josua te leh Israel hnam hotu te hnênah an lo kal a, “LALPA chuan kan unau mipate ang bawkin ram min pe ve tûrin Mosia a hrilh kha,” an rawn ti a. LALPA thupêk ang chuan an unau mipate ang bawkin ram chu an chang ve ta a.

⁵Jordan chhak lama Gilead leh Basan ram telin Manasea thlahte chan sâwm an nei bîk a ni.

⁶Mipa ang bawka an fa hmeichhiaten ram an chan ve tâk avângin Gilead ram chu Manasea thlah dangten an chang ta a ni.

⁷Manasea thlahte ram chan chu Aser-ho ram chan aṭangin Sekem khaw chhak lam Mikmethat khaw inkâr chu a ni. Chhim zâwngin ramri chu a kal a, Entapua-a awmte chu a huam a.

⁸Tapua ram hi Manase-ho chan a ni, a khawpui Tapua erawh hi chu Efraim-ho ta a ni.

⁹Ramri chu Kana luitêah a chhuk a. Luite kam chhim lama khuate chu Efraim-ho ta a ni, Manase-ho ram chhûnga awm ni mah se; ramri chu luite hmâr lam kamah a kal zêl a, Mediteranean tuipuiah a chhuak a.

¹⁰Chhim lamah Efraim-ho an awm a, hmâr lamah Manase-ho an awm a nih chu; Aser-ho chu hmârthlang lamah an awm a, an ram hmârchhak lamah Isakar-ho an awm a.

¹¹Aser-ho leh Isakar-ho chan chhûngah Manase khua Beth-sean leh Ibleam khawpui, an chhehvêl khuate nên a awm. Tuipui kama Dor khua te, Endor te, Taanak te, Megido te leh an chhehvêl khuate pawh a awm.

¹²Hêng khuaa awmte hi Manasea thlahte chuan an ûm chhuak thei lo; chuvângin, Kanan-ho chu an la awm ta zêl a ni.

¹³Israel-ho an lo chak hle hnu pawh khân an hnawt chhuak chuang lo, hna thawk tûr erawh chuan an phût lui ṭhîn.

¹⁴Josefa thlahte chuan, “LALPA chuan mal min sâwm a, kan rual ta hle si a, hmun khat chauh engati nge min pêk le?” an ti a.

¹⁵Josua chuan, “In rual viau a, Efraim tlângram hi a zîm deuh a nih chuan Periz leh Refaim-ho awmna ram ngâwte han tu-dar mai rawh u,” a ti a.

¹⁶Anni chuan, “A tlângram ngawt chu a zîm deuh vang; phaia Kanan-ho lahin thîr-tawlailîr an nei a; Jezreel phaia awmte leh Beth-sean khawpui leh a chhehvêl khuate chuan indo thîr-tawlailîr an nei vek a ni,” an ti a.

¹⁷Josua chuan Efraim leh Manasea thlahte chu a chhâng a, “In parual hle a, in chak hle bawk alâwm. Chan khat mai ni lo in nei dâwn nia.

¹⁸Tlângram khi in chan tûr a ni ang. Ngaw hlîr ni mah se, tu-dar ula, a pumin hneh ang che u, Kanan-ho chu an thîr-tawlailîrte nên chak hle mah se, in ûm chhuak mai ang,” a ti a.