Read Mizo Lushai Josua 18 Bible Online

Josua 18 - Mizo Lushai bible

Josua 18

¹Israel mite chu Silo-ah an lo pung khâwm a, Inbiakna bûk kha an zâr a, ram chu an la tawh a.

²Israel zîngah hnam sarih an chan tûr sem ve loh an la awm a.

³Josua chuan an hnênah, “LALPA, in pate Pathianin ram a pêk che u hi in va luah har ve?

⁴Hnam tinin mi pathum thlang chhuak ula, anni chu ram fang chhuak tûrin ka lo tîr ang e; hnam tin chanpual tûr ruat sela, ka hnênah rawn thlen rawh se.

⁵Ram chu hmun sarihah ṭhen sela, Juda leh Josefa thlahte chu an chan ram chhûngah an awm mai ang.

⁶Ram hmun sariha ṭhen dân tûr chu an ziak chhuak ang a, an rawn keng ang a, keiin LALPA, kan Pathian hmaah ṭhum ka lo vâwrsak ang che u.

⁷Levia chite chu sem ve suh u, LALPA puithiam hna hi an chanvo ve tûr chu a ni si a. Reubena te, Gada te leh Manasea thlah zâtve te lahin Jordan chhak lamah, Pathian chhiahhlawh Mosia khân an chan tûr chu a pêk tawh kha,” a ti a.

⁸Josua sawi anga ti tûr chuan mite chu an thawk chhuak a, an hnênah, “Ram pum fang chhuak ula, chhinchhiah vek ang che u; chutah in lo haw leh dâwn nia. Keiin LALPA hmaah ṭhum ka lo vâwrsak ang che u,” a ti a.

⁹Chûng mite chu an chhuak a, ram chu an fang vek a, khawpui awmte chhinchhiah vekin hmun sarihah an sem a, an ziak chhuak a. Silo khuaa riahhmunah Josua hnênah an ziakna bu chu an rawn hâwn a.

¹⁰Silo khuaah chuan Josuan LALPA hmaah ṭhum a vâwr a, Israel mite chu a hnam hnamin ram chu a sem ta a.

¹¹Benjamin thlahte chan tûr, a chhûng chhûnga insem tûr chu ruat hmasak ber a ni a, Juda leh Josefa thlahte inkârah an awm ta a.

¹²An hmâr lam ramri chu Jordan lui aṭangin Jeriko ep tlâng pangah a chho va; khawthlang zâwngin Beth-aven thlalêr a thleng a.

¹³Luz khuaah (Bethel an ti bawk) a kal zêl a, chhim lam zâwngin a kal a, Atarot-adar, Beth-horon tlâng chuanhnuaia khua chu a thleng a.

¹⁴He tlâng thlang lamah, chhim zâwngin ramri chu a inher a, Kiriat-baal khua, Kiriat-jearim an tih bawk chu a thleng a; he khua hi Juda thlahte chan khawpui a ni. Hei hi khawthlang lama a ramri chu a ni.

¹⁵Chhim lam ramri chu Kiriat-jearim aṭangin a inṭan a, chhak lam panin Nefto tuikhurah a kal a.

¹⁶Hinom chhuntu tlângdunga kalin Refaim phai luhnaah a chhuk a, Hinom ruam a pan a, Jebus-ho khaw chhim lamah a kal a, En-rogel a thleng a.

¹⁷Hmâr lamah a inher a, En-semes a thleng a; Adumin kalkawng epa Gelilot khuaah a kal a, Bohana lungah (Bohana chu Reubena fapa a ni) a kal zêl a.

¹⁸Jordan dep tlâng hmâr lama kalin ruamah a chhuk a,

¹⁹Beth-hogla tlângdung hmâr lamah a kal zêl a, Jordan lui chhuah Tuipui Thiah a chhuak a ni.

²⁰Hei hi Benjamina thlah chhûng tin ram chan tûr ramri chu a ni.

²¹Benjamina thlah, a chhûng chhûnga an insem tûr khuate chu hêng hi a ni: Jeriko, Beth-hogla, Emek-kezia;

²²Beth-araba, Zemaraim, Bethel;

²³Avim, Para, Ofra;

²⁴Kefaramoni, Ofni, Geba leh an chhehvêl khuate nên khawpui sâwm leh pahnih a ni.

²⁵Gibeon te, Rama te, Beerot te,

²⁶Mizpa te, Kafira te, Moza te,

²⁷Rekem te, Irpeel te, Tarala te,

²⁸Zela te, Haelef te, Jebus te (Jerusalem an ti bawk), Gibea te, Kiriat-jearim te leh an chhehvêl khua te nên, khawpui sâwm leh pali a ni. Hêng hi Benjamin thlah chhûng tin chan tûr khua chu a ni.