Read Mizo Lushai Josua 2 Bible Online

Josua 2 - Mizo Lushai bible

Josua 2

¹Nuna fapa Josua chuan Sitim ruam aṭang chuan enthlatu tûr mi pahnih a tîr a, “Ram chu a rûkin va en thlithlai teh u, Jeriko khua phei chu en chiang zual ang che u,” a ti a. Khua an va thlen chuan riah tumin nawhchizuar Rahabi in an pan a.

²Jeriko lal chuan, Israel-te tirh enthlatute chu chumi zân chuan an lo thleng tih a lo hriatin

³Rahabi hnênah, “I ina lo thlengte kha ram en thlithlai tûra lo kal an ni, han hruai rawh,” ti tûrin mi a tîr a.

⁴Chu nu chuan mikhual pahnihte chu a hruai a, a thukru a, “Mi pahnih chu an lo thleng ngei mai a, khawi lam mi nge an nih ka hre hauh lo.

⁵Khaw thim dâwn ṭêp, kulh kawngka khâr hma chiah khân an chhuak leh ta a nih kha: khawi lamah nge an kal dâwn ka hre miah lo; ûm thuai ula, in la ûm pha hman ang,” a ti a.

⁶Chu mite chu in chungah a hruai a, ziza kuang a pho zîngah chuan a thukru a ni.

⁷Lal mi tirhte chu Israel-te ûm tûr chuan an tlân chhuak a, kulh kawngkapui chu an khâr leh a, Jordan lui thlengin an ûm a.

⁸An mut hmain Rahabi chu in chungah a chho va.

⁹An hnênah, “LALPA chuan ram hi a pe tawh che u tih ka hria.

¹⁰Hêng lai mite hi hlau lo che u tu mah an awm lo, an zâm zo ta. Aigupta ram in chhuahsan a, LALPA chuan in hmaa Tuipui Sen a tihchah thu te kan lo hria a, Jordan chhak lama Amor lal Sihona leh Oga in thah dânte pawh kan lo hria a.

¹¹Chûng chu kan hriatin kan zâm chhia a, nangmahni hlauvin mu leh mal pawh kan nei tawh lo; in Pathian, LALPA hi lei leh vâna rorêltu a ni si a.

¹²Ka tih ṭhat che u ang bawkin kan chhûnga min ti ṭha ve tûrin in Pathian hming chhâlin thu tiam ula, chumi hriatna tûr chuan chhinchhiahna min pe ang che u.

¹³Ka pa te, ka nu te, ka nuṭate leh ka laizâwn te, an chhûngkuain zuah ang che u, min that lo tûrin thu tiam rawh u,” a ti a.

¹⁴Chûng mite chuan, “Min hum chuan kan hum ngei ang che; kan lo kal dân hi tu mah i hrilh loh chuan, ram hi LALPAN min pêk hunah, ṭha takin kan ti ang che u,” an ti a.

¹⁵Khaw kulh bang ringa in nei a ni a, tukverh aṭang chuan anni chu hruizênin a thlâk thla a.

¹⁶“Tlâng lamah in kal loh chuan ûmtuten an hmu mai ang che u, ni thum biru ula, a rawn ûmtu che u an lo kîr hunah in duh duhnaah in kal dâwn nia,” a ti a.

¹⁷Mite chuan, “I tih ang chuan thu kan tiam ang a, hetianga i tih ve loh erawh chuan a mawh kan phur lo vang.

¹⁸He ram kan lo thlen hunah he la sen hi min thlâkna tukverhah ṭâwn bet ang che. I pa te, i nu te, i nuṭate leh i pa chhûngte i inah hian ko khâwm la;

¹⁹khawlaiah tu mah chhuak suh se; chhuak an awm chuan an thisen mawh chu anmahniin an phur ang.

²⁰Kan thu hi tu mah i hrilh tûr a ni lo, i hrilh vaih chuan keini pawhin thu min tiamtîr ang hian kan ti bîk lo vang,” an ti a.

²¹Ani chuan, “In thu ang chuan ni rawh se,” a ti a. A kaltîr a, an chhuak ta a. La sen chu tukverhah chuan a ṭâwn bet a.

²²Tlâng lamah chuan an kal a, ni thum an biru a. Ûmtute chuan an rawn zawng haw zêl a; mahse, an hmu lo.

²³Chu mite pahnih chu tlâng lam ata an lo chhuak a, lui an kân a, Josua hnên an lo thleng a, an thil tawh zawng zawng chu an hrilh a.

²⁴Josua hnênah, “LALPA chuan ram chu min pe ngei a lo ni, kan thâwmah mi an zâm chhe zo vek mai,” an ti a.