Read Mizo Lushai Josua 20 Bible Online

Josua 20 - Mizo Lushai bible

Josua 20

¹ LALPA chuan Josua hnênah

²“Israel mite hrilh rawh, Mosia ka hrilh ang khân inhumhimna tûr khua ruat rawh u.

³Tihpalh emaw, hmuh loh avâng emawa mihring tihlum palhte thisen phuba latu laka an tlân a, an him theih nân.

⁴Chûng khuaah chuan an tlân ang a, khawpui luhnaah an ding ang a, chu khaw upate hnênah chuan an lo tlân chhan an hrilh tûr a ni; anni chuan hmun an lo ngaihtuahsak ang a, an zîngah an awmtîr ang.

⁵Thisen phuba latuin an rawn ûm pawhin an lo hum tûr a ni; an tihpalh a ni a, huat vânga tihlum an ni lo.

⁶Chu khuaah chuan Israel pungkhâwmin a chungthu an rêl fel hma emaw, puithiam lalber ṭang lai a thih hma emaw a awm tûr a ni; chumi zawhah chuan mi that palhtu chu a lo kalna, an khuaah, ama inah ngei a haw leh thei tawh ang.

⁷Hêng khuate hi Israel mite tân leh an zînga awm hnam dangte tân inhumhimna tûra an ruatte chu a ni; Kades khua, Naftali ram tlângram Galili bialah; Sekem khua, Efraim-ho ram tlângramah; Kiriat-arba khua (Hebron an ti bawk), Juda thlahte ram chhûng tlângramah.

⁸Jordan chhak lamah: Bezer khua, Reuben-ho ram tlâng zâwl thlalêr khuaah; Ramot khua, Gad-ho bialah; Golan khua, Manasea-ho ram Basan bialah.

⁹Khîng khi a ni Israel mite leh an zînga hnam dang awmte tâna inhumhimna tûr khua an ruatte chu. Tu pawhin mi tihlum palh sela, hêng khuaah hian an tlân thei ang; an chungthu Israel pung khâwmin an rel fel hma chu thisen phuba latu kutah an thi mai dâwn lo nia.