Read Mizo Lushai Josua 21 Bible Online

Josua 21 - Mizo Lushai bible

Josua 21

¹Levia chi hruaitute chu, puithiam Eleazara te, Nuna fapa Josua te leh Israel hnam hruaitute hnênah,

²Kanan ram Silo khuaah chuan an lo kal a, “LALPA chuan kan awmna tûr, khawpuite leh a chhehvêl ran tlatna tûr ram âwl pe tûrin Mosia chu a hrilh kha,” an rawn ti a.

³Israel mite chuan, an ram chan chhûngah hêng khawpuite hi, a chhehvêl ram âwl, ran tlatna tûr nên, LALPA thu angin Levia chite chu an pe a.

⁴Levia thlah zîngah Kohata thlahte chu khawpui an sem hmasa ber a. Arona thlah puithiamho chu Juda thlah te, Simeona thlahte leh Benjamina thlahte ram chan aṭangin khawpui sâwm leh pathum an pe a.

⁵Kohata thlahte chu Efraim te, Dan te leh khawthlang lama Manase thlah zâtve ram aṭangin khawpui sâwm an pe a.

⁶Gersona thlahte chu Isakar te, Naftali te, khawthlang lama Manase te chan aṭangin khawpui sâwm leh pathum an pe a.

⁷Meraria thlahte chu Reuben te, Gad te leh Zebulun ram aṭang tein khawpui sâwm leh pahnih an pe a.

⁸Mosia hnênah LALPA thupêk angin Israel mite chuan ṭhumvâwrin hêng khuate hi a chhehvêl ram âwl, ran tlatna tûr nên Levia chite chu an pe a.

⁹Juda leh Manasea thlahte ram aṭangin hêng khawpuite hi

¹⁰Levia thlah Kohata fa Arona thlahte hnêna an pêk chu a ni a; anni hi khua an sem dawng hmasa ber an ni.

¹¹Juda tlângram khawpui Anaka pa, Arba khua, Hebron an tih bawk chu, a chhehvêla ram âwlte nên an pe a.

¹²A khawpui chhehvêla ram leh khuate chu Jefunea fapa Kaleba hnêna pêk a nih tawh kha.

¹³Inhumhimna tûr khuaa ruat Hebron khaw bâkah hêng khawpuite hi puithiam Arona thlahte tân an ruat: Libna,

¹⁴Jatir, Estemoa,

¹⁵Holon, Debir,

¹⁶Ain, Juta, Beth-semes, an chhehvêl ram âwlte nên Juda leh Simeona thlahte ram chan aṭangin khawpui pakua an pe a.

¹⁷Benjamin ram aṭangin hêng khawpui pali hi an pe bawk: Gibeon, Geba,

¹⁸Anathot, Almon leh an chhehvêl ram âwlte nên.

¹⁹A vaiin khaw sâwm leh pathum, an chhehvêl ram âwl, ran tlatna tûr nên puithiam Arona thlahte chu an pe a.

²⁰Levia fa Kohata thlah dangte hnênah Efraim-ho ram aṭangin khaw ṭhenkhat an pe bawk.

²¹Khawpui pali an pe; inhumhimna tûra ruat Efraim tlângrama khawpui Sekem te, Gezer te,

²²Kibzaim te, Beth-horon te leh an chhehvêl ram âwlte nên.

²³Dan ram aṭangin khaw pali an pe bawk: Elteke te, Gibethon te,

²⁴Aijalon te, Gath-rimon te leh an chhehvêl ram âwlte nên.

²⁵Thlang lama awm Manasea thlahte ram aṭangin khawpui pahnih an pe: Taanak leh Gath-rimon leh an chhehvêl ram âwlte nên.

²⁶Kohata thlah dangte hnênah chuan hêng khaw sâwm leh an chhehvêl ram âwl; ran tlatna tûr te nên an pe a.

²⁷Levia chi, pâwl khat, Gersona thlahte chu chhak lam Manasea thlahte rama mi khawpui pahnih an pe a; inhumhimna tûra ruat Basan biala Golan leh Beestera te leh an chhehvêl ram âwl, ran tlatna tûr nên.

²⁸Isakara thlahte ram aṭangin khawpui pali - Kision te, Daberat te,

²⁹Jarmut te, En-ganim te, an chhehvêl ram âwl, ran tlatna tûr nên an pe a.

³⁰Aser-ho ram aṭangin khawpui pali - Misal te, Abdon te,

³¹Helkat te, Rehob te leh an chhehvêl ram awl, ran tlatna tûr nên an pe a.

³²Naftali-ho ram aṭangin khawpui pathum - inhumhimna tûra ruat Galili rama Kedes te, Hamot-dor te, Kartan te leh an chhehvêl ram âwl ran tlatna tûr nên an pe a.

³³Gersona thlah chhûngkaw hrang hrang chuan khawpui sâwm leh pathum leh a vêl ram âwl ran tlatna tûr nên an chang.

³⁴Levia chi mi dang, Meraria thlahte chu Zebulun-ho ram aṭangin khawpui pali - Jokneam te, Karta te,

³⁵Dimna te, Nahalal te leh an chhehvêl ram âwl, ran tlatna tûrte nên an pe a.

³⁶Reuben-ho ram aṭangin khawpui pali - Bezer te, Jahaz te,

³⁷Kedemot te, Mefaat te leh an chhehvêl ram âwl; ran tlatna tûr nên an pe a.

³⁸Gad-ho ram aṭangin khawpui pali - inhumhimna tûra ruat Gilead biala Ramot te, Mahanaim te,

³⁹Hesbon te, Jazer te, an chhehvêl ram âwl; ran tlatna tûr te nên an pe a.

⁴⁰Meraria thlahte chu a vaiin khawpui sâwm leh pahnih an pe.

⁴¹Israel mite ram chhûnga Levia chite khawpui atâna ruat chu khaw sawmli leh pariat a ni, an chhehvêl ram âwl, ran tlatna tûr nên.

⁴² LALPA chuan an thlahtute hnêna ram pêk a tiam tlat ram zawng zawng chu Israel mite hnênah chuan a pe ta a. An lâk hnu chuan an luah ta a.

⁴³An thlahtute hnêna pêk a lo tiam tawh ram chu LALPA chuan Israel-te chu a pe a, an lâk hnu chuan awmhmun an khuar ta a.

⁴⁴LALPA chuan a tiam angin ram pum chu a tirâlmuang a; an hmêlmate a hnehtîr zêl ṭhin avângin tu mahin an lo dang zo lo.

⁴⁵Israel-te hnêna thu a tiam tawh phawt chu LALPA chuan a hlen zêl a ni.