Read Mizo Lushai Josua 22 Bible Online

Josua 22 - Mizo Lushai bible

Josua 22

¹Josua chuan Reubena thlah te, Gada thlahte leh Manasea thlah zâtve te chu a ko va,

²an hnênah, “LALPA chhiahhlawh Mosia thu in awih a, ka hrilh apiang che u in zâwm zêl a;

³in unaute chu hun rei tak chhûng hâwnsan mai lovin in Pathian, LALPA thupêk in zâwm thlap zêl a.

⁴Tûnah zawng, LALPA, in Pathianin a tiam angin in unau Israel-te chu râlmuang takin a awmtîr tâk hi. Chuvângin, LALPA, in Pathian chhiahhlawh Mosian Jordan râla ram a pêk che u-ah haw tawh rawh u le.

⁵LALPA chhiahhlawh Mosian dân a pêk che u kha zâwm ngei ula, in Pathian, LALPA chu hmangaihin a thupêkte chu awih ula, a duhzâwng ti ṭhîn ula, amah chu vuan tlatin, tihtak zet leh ṭhahnemngai takin a rawng bâwl ang che u,” a ti a.

⁶Tichuan, Josuan mal a sâwm a, a hawtîr a; in lamah an haw ta a.

⁷Mosia khân Manasea thlah zâtve chu Jordan chhak lamah Basan ram a pe a, a zâtve dang hnênah Josuan Jordan thlang lamah ram a pe bawk a. Josuan a hâwntîr khân mal a sâwm a,

⁸“Berâm leh kêl te, tangka leh rangkachak te, dâr leh thîr te leh thawmhnaw tam tak nên, hausa hnawkin in haw dâwn a, in hmêlmate thil in lâksakte chu in unau dangte sem ve ang che u,” a ti a.

⁹Reubena thlah te, Gada thlah te leh Manasea thlah zâtve te chu Silo khua aṭang chuan an haw ta a. Israel dangte chu Kanan rama Silo khuaah chuan an kalsan a. Mosia hnêna LALPA thupêk angin an ram chan Gilead ram chu an pan ta a.

¹⁰Reubena thlah te, Gada thlahte leh Manasea thlah zâtve te chuan Jordan thlang lama awm, Kanan rama Galilot chu an thleng a, lui kamah chuan hmuhnawm tham taka ropuiin maichâm an siam a.

¹¹Israel mi dangte chu, “Reuben-ho te, Gad-ho te leh Manase-ho te chuan Kanan ram Jordan lui kamah, Israel mite ram lamah chuan maichâm an siam luah mai,” tiin an rawn hrilh a.

¹²Israel pungkhâwmhovin an lo hriatin beih an tum a, Silo-ah an lo kal khâwm a.

¹³Reuben-ho te, Gad-ho te, Manase-ho zâtve te chu Gilead-a an awm laiin Israel mite chuan puithiam Eleazara fapa Finehasa chu,

¹⁴Israel hnam sâwm hruaitute, khawthlang lam hnam sâwm hruaitu ber pakhat zêl nên an tîr a.

¹⁵Gilead an lo thleng a, Reuben-ho te, Gad-ho te leh Manase-ho zâtve te hnênah chuan,

¹⁶“Pungkhâwmho, LALPA mite chuan, he thil sual tak hi Israel-te Pathian chungah engtiziaa ti nge in nih? He maichâm in siam hi LALPA chungah in hel ta tihna a ni, a thu in awih ta lo a nih hi.

¹⁷Peor hmuna thil sual kan tih kha in la hre reng lâwm ni? LALPA chuan ama mite ngei pawh hri a veitîr a, a hrem a nih kha.

¹⁸LALPA chu engtizia nge in zui duh loh? Vawiina LALPA chunga in hel avângin naktûkah chuan Israel pungkhâwmho chungah a thinur dâwn asin.

¹⁹In ram hi amah biakna tlâk loh khawpa bawlhhlawh a nih chuan LALPA bûk, Inbiakna bûk awmna lamah lo kal ula, kan zîngah ram in nei ve mai tûr alâwm; LALPA lakah leh kan laka helin kan Pathian maichâm lo chu maichâm dang siam teh suh u.

²⁰Zera fapa Akana khân thil serh a bawhchhia a, Israel pungkhâwmho chungah thinurna a thleng a, amah mai ni lovin mi dang pawh an thih kha,” an ti a.

²¹Reuben-ho te, Gad-ho te, Manase-ho zâtvete chuan Israel hotute chu an chhâng a,

²²“LALPA chu pathiante Pathian a ni. Pathiante Pathian, LALPA chuan kan tih chhan a hria alâwm; nangni pawhin hre ve ula kan duh asin. LALPA laka hel kan niha, a laka rinawm lo kan nih chuan, min zuah lo mai rawh u.

²³LALPA thu awih lovin hâlral thilhlan te, buhbâl thilhlan te, remna thilhlante kan hlanna tûr keimahni maichâm kan siam a nih hrim chuan LALPA ngei chuan min hrem rawh se.

²⁴Chutiang a ni lo; nakinah in thlahten kan thlahte hnênah hetiang hian an la ti ang tih kan hlau a ni zâwk:

²⁵‘LALPA, Israel-te Pathian chu be ve tûr em in nih? Jordan lui chu Reuben leh Gad-ho nêna kan inri atân a siam a, LALPA hi be ve tûr in ni lo’ tiin in thlahte chuan kan thlahte an la khap mai ang.

²⁶Tichuan, hâlral thilhlan leh inthawina chi dang hlan nân maichâm hi siam kan ni lo.

²⁷In mite leh kan mite, ṭhangthar zêlten, LALPA hnênah ngei kan hâlral thilhlan te, remna thilhlante leh inthawinate kan hlân ṭhîn tih an hriat theih nân leh in thlahten kan thlahte hnênah, ‘LALPA rawn be tûr in ni lo,’ an tih loh nâna siam kan ni.

²⁸Chuvângin, chutianga kan thlahte hnêna an tih tâkin ‘Min thlahtute hian LALPA maichâm ang chiahin he maichâm hi an lo siam a ni, hâlral thilhlan emaw, inthawina emaw kan hlanna tûr a ni lo,’ tia an chhân theih nân siam kan ni.

²⁹LALPA lakah hel kan tum awzâwng lo, amah hawisanin kan thilhlan hâlna, kan buhbâl thilhlan leh inthawinate hlanna tûr maichâm hrang siam kan tum a ni hek lo, kan Pathian maichâm, a Bâwkte kawta mi lo kha chu maichâm hrang kan din dâwn hauh lo,” an ti a.

³⁰Puithiam Finehasa leh pungkhâwmho hruaitu, khawthlang lama awm hnam hruaitu sâwmte chuan Reuben-ho te, Gad-ho te, Jordan chhak lam Manase-ho zâtve te thu chu an hriatin an lungawi ta a.

³¹Finehasa, Puithiam Eleazara fapa chuan an hnênah, “LALPA zawngin min lo awmpui ngei zawng a lo ni tih kan hre ta e; LALPA lakah in lo hel loh hi; LALPA pawhin Israel-te a hrem dâwn lo a nih chu,” a ti a.

³²Reubena leh Gada thlahte awmna Gilead aṭang chuan puithiam Eliazara fapa Finehasa leh Israel hotute chu Israel mite awmna Kanan ramah chuan an kîr a, an thu chu an thlen a.

³³Israel mite chu an lung a awi ta a, Pathian an fak a; Reubena leh Gada thlahte chu an awmna ram aṭanga nuai bo tûra thawh chhuah thu an sawi ta lo va.

³⁴Reubena thlah leh Gada thlahte chuan chu maichâm chu “Kan inkârah LALPA hi Pathian chu a ni tih hretu a ni,” an ti a, Thuhretu an vuah a.