Read Mizo Lushai Josua 23 Bible Online

Josua 23 - Mizo Lushai bible

Josua 23

¹ LALPA chuan Israel-te chu an hmêlmate laka rei fe râlmuang taka a awmtîr hnu chuan Josua chu a kum a tamin a lo upa ta hle a.

²Israel mi zawng zawng - upa te, hruaitu te, rorêltu te leh hotu te chu a ko khâwm a, an hnênah, “Ka lo upain ka lo tar ta hle mai a:

³Nangmahni avângin hêng lai hnamte chunga in Pathian, LALPA thiltihte in hmu a; LALPA, in Pathian chu in hmêlmate dosaktu che u a ni.

⁴Kan hneh tawhho hnam awmna ram leh kan la hneh lohte awmna ram chu in ram chanpual atân ka sem fel vek tawh che u a ni; khawchhak lamah Jordan lui aṭanga khawthlang lama Mediteranean tuipui thlengin.

⁵LALPA in Pathianin in hmaah a tlânchhiattîr zêl ang a, a ûm bo vek ang; LALPA, in Pathianin a tiam tawh angin an ram chu in neihsak ngei ang.

⁶Chuvângin, Mosia dân lehkhabua ziak apiang awih tum tlat ula, ti ngei ang che u, pakhat mah hmaih suh ang che u.

⁷In zînga hnam dang la awmte nên hian inchiahpiah suh u; an pathian lam suh ula, an hming chhâlin chhia chham hek suh u: chibai bûkin an hmaah kûn tawp suh ang che u.

⁸LALPA chu vuan tlat zâwk ang che u, tûn thleng pawha in la vuan ang hian.

⁹Hnam tam tak leh chak pui pui in hmaah LALPA chuan a hnawt chhuak zêl a, tu mah lo dang thei che u an awm lo a ni.

¹⁰“A tiam angin LALPA in Pathian chuan in hmêlmate a dosak che u avângin mi pakhat pawhin sâng têl in ûm a nih kha.

¹¹LALPA, in Pathian chu hmangaih ngei ngei ang che u.

¹²In hawisana, in zînga hnam dang lo awmte nên in inchiahpiaha, in inneih pawlh vaih chuan,

¹³LALPA, in Pathian chuan hêng hnamte hi in hmaah a hnawh chhuahsak tawh hauh lo vang che u. LALPA, in Pathianin he ram ṭha tak a pêk che u aṭanga in boral vek hma chu in tân thang leh tlâkna khur hlauhawm an ni ang a, vuakna hruihrual leh mita chhuntu hlîng an ni ang tih hre chiang rawh u.

¹⁴“Ngai teh u, tûnah zawng, leilung dân angin ka kal a hun ta. Tu pawhin ngun taka in chhût chuan LALPA, in Pathian chuan thil ṭha a tiam zawng zawng che u chu a pe zêl che u tih in hria ang. A tiam ang chuan a ti zêl a, pakhat mah tih loh a nei lo.

¹⁵LALPA, in Pathian chuan thil ṭha a tiam chu a hlen zêl ang ngeiin a pêk che u ram aṭanga in boral vek hma chu thil ṭha lo tih a tiam pawh chu a ti ngei ang.

¹⁶LALPA, in Pathianin zâwm tûra a tih che u, a thuthlung chu in bawhchhiata, pathian dangte in pana, an rawng in bâwl chuan, LALPA thinur chu a alh ang a, ram ṭha tak a pêk che u aṭang hian in boral mai ang,” a ti a.