Read Mizo Lushai Josua 24 Bible Online

Josua 24 - Mizo Lushai bible

Josua 24

¹Josua chuan Israel hnamte chu Sekem khuaah a ko khâwm a. Israel upa te, an hnam hruaitu te, rorêltu te leh hotu te chu Pathian hmaah an rawn inlan a.

²Josua chuan mi zawng zawng hnênah, “LALPA, Israel-te Pathian chuan heti hian a ti: ‘Hmânlaiin in thlahtute chu Eufretis lui piahah an awm ṭhîn a, pathian dangte an be ṭhîn. Chûng zînga pakhat chu Abrahama leh Nahora pa Tera a ni.

³In pu Abrahama chu Eufretis lui piah aṭang chuan Kanan ram pumah ka hruai kual a, fapa Isaka ka pe a, a thlahte ka tipung a.

⁴Isaka chu fapa Jakoba leh Esauva ka pe a, Seir tlângte chu Esauva hnênah a chênna atân ka pe a. Jakoba leh a fate erawh chu Aigupta ramah an chhuk a.

⁵Nakinah chuan Mosia leh Arona chu ka tîr a, Aigupta mite chu ka timangang nasa hle a; nangni erawh chu ka hruai chhuak ta che u a.

⁶In pute chu Aigupta ram aṭangin ka hruai chhuak a, Aigupta mite chuan sakawrtawlailîr nên, sakawr chungchuang mite nên an rawn ûm a;

⁷mahse, Tuipui Sen an lo thlen khân mangangin LALPA an au va, Aigupta mite nêna an inkârah thim a awmtîr a, tuipui chuan Aigupta mite chu a chîm a, an pil ta a. Aigupta rama ka thiltihte chu in hria a, thlalêrah rei fe in awm a.

⁸Jordan chhak lama awm Amor mite awmna chu ka hruai thleng che u a, in indo va, ka hnehtîr che u a; an ram chu in nei ta a. In hmaah anni chu ka tiboral a nih kha.

⁹‘Zipora fapa Balaka, Moab lal chuan Israel-te chu a lo bei a; Beora fapa Balaama chu ânchhia lawh tûr che uin a pun a.

¹⁰Balaama thiltum chu ka remti lo va, mal a sâwmsak ta hlauh zâwk che u a; chutiang chuan Balaka kut ata ka chhan che u a,

¹¹Jordan lui in kai a, Jeriko khuaa mite chuan an lo bei che u a; Amor mi te, Periz mi te, Kanan mi te, Hit mi te, Girgas mi te, Hiv mi te leh Jebus mi te pawhin an lo bei che u a; mahse, ka hnehtîr vek che u a.

¹²Amor lal pahnih phei chu khandaih emaw, thal emaw hman ngai lovin in hmaah khawinghal ka ûm chhuahtîr a.

¹³In chei hah ni hauh lo ram ka pe che u a, in sak hah loh khawpuiah ka awmtîr che u a. Tûnah zawng in phun loh grep rah in tlân a, in phun loh oliv rah in ei hi.’

¹⁴“Chuvângin, LALPA chu zah ula, tihtak zetin a rawng bâwl tlat rawh u. Mesopotamia ram leh Aigupta rama in pute biak ṭhin pathian lemte kha paih vek rawh u.

¹⁵LALPA rawngbâwl hi ṭha in tih loh chuan in thlahtute biak, Mesopotamia rama pathiante rawng kha nge in bâwl duh, tûna in awmna rama Amor-ho pathiante hi, vawiin hian in duh zâwk chu thlang rawh u. Kei leh ka chhûngte erawh hi zawngin LALPA rawng a ni kan bâwl dâwn ni,” a ti a.

¹⁶Mipui chuan, “LALPA rawngbâwl hi ṭha lo kan ti awzâwng hlei nêm: pathian dangte rawng chu kan bâwl hauh lo vang.

¹⁷Aigupta rama bawiha kan awm min hruaichhuaktu chu LALPA, kan Pathian hi a ni alâwm; kan hmuhah thil ropui tak tak te a ti a, hnam tin chi tin zînga kan kalna apiangah min hum zêl ṭhîn a ni.

¹⁸He ram kan lo thlen pawh khân LALPA chuan kan hmaah hênga awm Amor-hote a hnawt chhuak vek a nih kha. Chuvângin, LALPA rawng a ni kan bâwl dâwn ni, amah chauh hi kan Pathian chu a ni,” an ti a.

¹⁹Josua chuan mipui hnênah, “LALPA rawng hi in bâwl thei ngût ang emaw chu: Mi thianghlim a ni a, pathian dang rêng a ngaithei lo va, in bawlhhlawhnate, in sualte a ngaidam lo vang.

²⁰LALPA chu hawisanin pathian dang rawng in bâwl vaih chuan a hawisan ang che u a, a hrem ang che u; in chungah ṭha hle ṭhîn mah se, a tiboral mai ang che u,” a ti a.

²¹Mipui chuan Josua hnênah, “Pathian dangte rawng zawng kan bâwl hauh lo vang; LALPA rawng a ni kan bâwl dâwn ni,” an ti a.

²²Josua chuan an hnênah, “LALPA rawngbâwl in thlang ngei a ni tih hretu chu nangmahni hi in ni e,” a ti a. Anni chuan, “Ni e, thuhretute kan ni e,” an ti a.

²³Josua chuan, “Chuti chu hnam dang pathian lim in kawlte kha paih bo rawh u le: Israel-te Pathian, LALPA chauh chu pawm rawh u,” a ti a.

²⁴Mipui chuan Josua chu an chhâng a, “Kan Pathian, LALPA rawng chu kan bâwl ang a, a thu pawh kan zâwm zêl ang,” an ti a.

²⁵Tin, chumi ni chuan Josua leh mipui chuan thu an thlung a; an zawm tûr dân leh thupêk a siamsak a.

²⁶Josuan chûng chu Pathian dân bu-ah chuan a ziak lût a; lung lian tak a la a; Sekem khuaa LALPA Hmun Thianghlim sasaw thing bulah chuan a phun a.

²⁷Josua chuan mipui hnênah, “En teh u, he lung hi kan thuhretu a ni; kan hnêna LALPA thu sawi zawng zawng kha a hre vek a, in Pathian in kalsan loh nân in thuhretu a ni,” a ti a.

²⁸Josua chuan mipui chu a hawtîr a, mahni ram ṭheuhvah an haw ta a.

²⁹Chumi hnu chuan kum za leh sâwm a nihin Josua chu a thi ta a.

³⁰Gaza tlâng hmâr lam, Efraim tlângrama ama chanpual Timat-sera-ah chuan an phûm ta a.

³¹Josua dam chhûng chuan Israel-te chuan LALPA rawng an bâwl a, a thih hnuah pawh, anmahni mit ngeia LALPA thiltih zawng zawng hmutute dam chhûng chu an bâwl zêl a.

³²Josefa ruang, Israel-ten Aigupta ram aṭanga an rawn lâk chhoh kha Sekem khuaah, Jakoban tangkaraw tlang zaa Sekema pa Hamora thlahte hnên aṭanga a leiah khân an phûm a. He ram hi Josefa thlahte khân an rochung zêl a ni.

³³Arona fapa, Eleazara pawh a thi a, Efraim-ho tlângrama awm, a fapa Finehasa puala an pêk ram Gibea khuaah an phûm a.