Read Mizo Lushai Josua 3 Bible Online

Josua 3 - Mizo Lushai bible

Josua 3

¹A tûkah Josua hovin Israel-te chu zîng takah an tho va, Sitim zâwl aṭang chuan lui bulah an insawn a, lui an kân hmain an riak a.

²Chumi tûk tûk lehah chuan hotute chuan bûk chu an fang a,

³“LALPA in Pathian Thuthlung Bâwm chu puithiamten an zâwn in hmuh hunah intêl fel ula, in zui nghâl dâwn nia.

⁴In kalna ngai lohva kal tûr in ni a, an hnung in zui zêl dâwn nia; amaherawhchu, Thuthlung Bâwm hnaih lutuk suh ang che u, tawng sânghnih vêl in inkârah tla rawh se,” an ti a.

⁵Josua chuan mipui hnênah, “Inthian thianghlim rawh u, naktûk hian LALPA chuan kan zîngah thil mak tak a ti dâwn e,” a ti a.

⁶Josua chuan puithiamho hnênah, “Thuthlung Bâwm chu zâwn ula, kal hmasa rawh u le,” a ti a.

⁷ LALPA chuan Josua hnênah, “Vawiin hian Israel-te hmuhah ka chawimawi dâwn che a ni, Mosia hnêna ka awm ang khân i hnênah pawh ka awm ṭhîn dâwn tih an hre dâwn nia.

⁸Puithiamte chu Jordan lui kamah tui daia ding tûrin hrilh rawh,” a ti a.

⁹Josua chuan Israel mite hnênah, “Lo kal ula, LALPA in Pathian thu hi ngaithla teh u,” a ti a.

¹⁰Josua chuan, “Pathian nung chu in zîngah a awm tih leh Kanan mite leh Jebus mite chu in hmaah a hnawt chhuak ngei dâwn tih hetiang hian in hria ang.

¹¹Jordan luiah in hma hruaiin khawvêl zawng zawng LALPA Thuthlung Bâwm chu a kal hmasa ang a.

¹²Mi sâwm leh pahnih, Israel hnam tina mi pakhat ṭheuh thlang chhuak ula,

¹³khawvêl zawng zawng LALPA Thuthlung Bawm zâwntu puithiamte ke-in Jordan lui a dai vêleh, Jordan lui tui luang chu a chat ang a, chhak lam aṭanga lo luang zawng zawng chu a tling khâwm vek ang,” a ti a.

¹⁴Mipui chu Jordan kai tum chuan an puan in aṭang chuan an chhuak a; Thuthlung Bâwm zâwntu puithiamte chu an kal hmasa a.

¹⁵Chutih lai chu buh seng hun, Jordan lui len lai a ni a, a kuang a liam hial a. Thuthlung Bâwm zâwntuten Jordan lui an han dai chuan,

¹⁶chhak lam aṭanga tui lo luang chu a chat a, a hnâr lamah Zarethan bul Adam khawpui thlengin a tling khâwm a. Araba lam Tuipui Thi a luang lût ṭhîn chu a kang chat ta vek a; Jeriko khaw bul maiah mipui chuan lui chu an kal kai ta a.

¹⁷Israel mite chu an zavaiin lei chârah Jordan lui chu an kal kai a; Thuthlung Bâwm zâwntute chu li laiah chuan leichârah mipui kai zawh hma chu an ding a.