Read Mizo Lushai Josua 4 Bible Online

Josua 4 - Mizo Lushai bible

Josua 4

¹Hnam puma Jordan lui an kai zawh vek hnu chuan LALPA chuan Josua hnênah,

²“Israel hnam tin zînga in thlan chhuah mi sâwm leh pahnihte khân,

³Jordan luia puithiamte dinna aṭangin lung sâwm leh pahnih, pakhat ṭheuhvin, pu chhuak sela, zânina in riahna tûrah dah teh se,” a ti a.

⁴Josua chuan hnam tin aṭanga Israel miten an thlan chhuah mi sâwm leh pahnihte chu a ko va,

⁵an hnênah, “LALPA in Pathian Thuthlung Bâwm chu kal pêl ula, lung pakhat ṭheuh, a vaiin Israel hnam zât, Jordan lui lai aṭangin pu ula,

⁶chûng lung chu LALPA thiltih hriat reng nân a ni ang. Nakin hnuah in faten, ‘Hêng lungte hi engtihna nge’ an tih hunah,

⁷‘LALPA Thuthlung Bâwmin Jordan lui a kai dâwn khân Jordan lui luang chu a chat a, kumkhuaa chumi hriatrengna tûr a nih hi,’ in la ti dâwn nia,” a ti a.

⁸Josua thu ang chuan Israel-te chuan an ti a, Jordan lui ata lung sâwm leh pahnih, Josua hnêna LALPA thupêk ang khân, an pu chhuak a; Israel hnam sâwm leh pahnih zât chu an riahna tûrah chuan an dah a.

⁹Josua chuan Thuthlung Bâwm zâwntute dinnaah tak, Jordan luiah chuan, lung a dahtîr bawk a, tûn thlengin chûng chu a la awm a ni.

¹⁰Bâwm zâwntu puithiamte chu luiah chuan an ding a, mipui chu an kal kai sawk sawk a.

¹¹An kai vek hnu chuan LALPA Thuthlung Bâwm zâwntu puithiamte chu mipui hmaah an kal ta a.

¹²Reuben-ho te, Gad-ho te leh Manase-ho zâtve te chuan hriamhrei kengin, Mosia hnêna thupêk ang khân, mipui hma an hruai a.

¹³LALPA hmaa indo peih reng mi sîngli laiin Jeriko bul zâwl an va thleng ta a.

¹⁴Chumi ni chuan Israel zawng zawng hmuhah LALPA chuan Josua chu a chawimawi a, a dam chhûng chu Mosia ang bawkin an ngaisâng a.

¹⁵ LALPA chuan Josua hnênah,

¹⁶“Thuthlung Bâwm zâwntu puithiamte kha Jordan lui ata lo chhuak rawh se,” a ti a.

¹⁷Josuan puithiamho hnênah, “Jordan lui ata kha lo chhuak rawh u le,” a ti a.

¹⁸LALPA Thuthlung Bâwm zâwntute Jordan lui ata an lo chhuaha, lui kam lei an rah veleh Jordan tui chu a luang leh ta dûl dûl a, a hma ang khân a kuang a liam hial a.

¹⁹Jordan lui chu thla khatna ni sâwm ni-in an kal kai a ni. Jeriko chhak lam ramri bul Gilgal-ah bûk an khuar a.

²⁰Jordan lui aṭanga an lung lâk chu Josua chuan Gilgal-ah chuan a phun a.

²¹Israel mite hnênah chuan, “Nakin hnuah in faten an pate hnênah, ‘hêng lung hi engtihna nge?’ tia an zawh che u hunah,

²²‘He laiah hian Israel-ten leichârah lui an kal kai a ni,’ in ti dâwn nia.

²³Tuipui Sen kân hmaa tuipui tui a tichat ang bawk khân LALPA chuan Jordan lui kan kai vek hma chu lui tui luang a tichat a.

²⁴Hêng avâng hian khawvêla hnam tinin LALPA thiltihtheihzia an hria ang a, kumkhuain in Pathian, LALPA hi in chawimawi dâwn nia,” a ti a.