Read Mizo Lushai Josua 5 Bible Online

Josua 5 - Mizo Lushai bible

Josua 5

¹Jordan lui thlang lama awm, Amor lal zawng zawng leh Mediteranean kama Kanan lal awm zawng zawngin Israel-ten Jordan an kân chhûng zawng lui tui chu a tihchahsak tih an lo hriat chuan an zâm chhe zo ta a.

²Chutih lai chuan LALPAN Josua hnênah, “Meilung hriam siam la, Israel mi serh la tan lohho serh tansak rawh,” a ti a.

³Josua chuan meilung hriam a siam a, Israel-te chu Gibeat-haaralot-ah an serh a tantîr a.

⁴Aigupta ram aṭanga râlkai chin lo chhuak zawng zawng chu thlalêrah an thi vek tawh a,

⁵an chhuah tirh khân serh an tan vek a ni; an lo kal chhûnga piangte erawh chu an serh la tan loh a ni.

⁶Israel mite chu thlalêrah kum sawmli an vâkvai a, Aigupta ram ata an chhuah aṭanga râlkai tawh chin chu an thi hman vek a ni. LALPA thu an ngaihthlâk loh chuan khawizu leh hnutetuia luang ram pêk a tiam chu an thleng ve lo vang tia a sawi tawh ang khân.

⁷An aiah, an fate a tipuitling a, chûng mite chu a ni Josuan serh a tansakte chu; kawngah an serh an la tan lo a ni.

⁸Mi zawng zawng serh an tan hnu chuan an dam hma chu bûkah an awm a.

⁹ LALPA chuan Josua hnênah, “Vawiin hian Aigupta miten an hmuhsitna che u kha ka nuai bo ta e,” a ti a. Chumi hmun chu tûn thlengin Gilgal an ti ta a ni.

¹⁰Gilgal-ah chuan Israel-ten bûk an khuar a, Jeriko phaizâwlah chuan chumi thla, ni sâwm leh pali ni chuan Kalhlên kût an hmang a.

¹¹Kalhlên kût zawh tûkah chuan, chu rama thar barli chhangphut, dawidim telh loh chhang leh chhangpêr an ei ve ta a.

¹²Chu ram buh an ei tûk aṭang chuan mana pawh a tla ta lo va. Israel-te chuan mana ei tûr an nei ta lo va, chumi kum aṭang chuan Kanan ram buhbâl thar an ring ta a.

¹³Jeriko bul lawka a awm laiin Josua chuan a han en a, mi pakhat, khandaih keng hi a hmaah a lo ding reng a, a han hnaih a, “Kan sipai nge i nih a, hmêlma sipai?” a ti a.

¹⁴“A khawia mah ka ni lo, LALPA sipaite ho tûra lo kal ka nih hi,” a ti a. Josua chu lei siin a kûn a, “I chhiahhlawh hnênah eng nge sawi i duh?” a ti a.

¹⁵ LALPA sipai hotu chuan Josua hnênah, “I pheikhawk kha phelh rawh, i dinna kha hmun thianghlim asin,” a ti a, Josua chuan a phelh ta a.