Read Mizo Lushai Josua 6 Bible Online

Josua 6 - Mizo Lushai bible

Josua 6

¹Israel-te luh theih loh tûrin Jeriko kulh chu a inkhâr tlat a; tu mah an chhuak thei lo va, an lût thei hek lo.

²LALPA chuan Josua hnênah, “Jeriko khua chu an lal leh a sipai huaite nên ka pe tawh a che.

³Khua chu hual la, ni tin vawi khat, râlkai chin chuan kal hual ṭhîn rawh se; chutiangin ni ruk in ti ang a,

⁴a ni sarih ni chuan puithiam pasarihin berâmpa ki tawtawrâwt kengin Thuthlung Bâwm zâwntute hma an hruai ang a, berâm ki chu an hâm ang a, vawi sarih in kal hual tûr a ni.

⁵Tawtawrâwt chu fân ruaiin an hâm ang a, chu chu in hriat veleh theihtâwp chhuahin mi zawng zawng au dur dur ula; kulh chu a chim rup mai ang; mahni hma zâwn ṭheuhvah in tlân lût mai thei ang,” a ti a.

⁶Nuna fapa Josua chuan puithiamho chu a ko va, “LALPA Thuthlung Bâwm chu zâwn ula, tawtawrâwt keng ṭhiau puithiam pasarihin hma hruai sela, zui ang che u,” a ti a.

⁷Mipui hnênah, “Kal ula, khua chu kal hual rawh u, LALPA Thuthlung Bâwm hmaah râlthuam keng kal hmasa rawh se,” a ti a.

⁸Josuan mipui hnêna thu a sawi zawh chuan, a tih ang chuan an ti a; tawtawrâwt keng puithiam pasarih chuan tawtawrâwt chu an hâm a; LALPA Thuthlung Bâwm zâwntute chuan an zui a.

⁹Tawtawrâwt hâmho puithiam hmaah râlthuam keng an kal a, Thuthlung Bâwm hnungah râlthuam kengten hnung an dâl a. Tawtawrâwt chu chhum lo chat lovin an hâm a.

¹⁰Josua chuan mipui hnênah, “Au rawh u’ ka tih hunah theihtâwpin in au dâwn nia, chumi hma chuan au tûr a ni lo,” a ti a.

¹¹ LALPA Thuthlung Bâwm zâwn chung chuan khua chu vawi khat an kal hual a, bûkah an kîr leh a, zân an riak a.

¹²A tûkah Josua chu zîng takah a tho va, puithiamho chuan bâwm chu an zâwn leh a.

¹³Râlthuam kengin hma an hruai a, puithiam pasarih, tawtawrâwt kengin an zui a, tawtawrâwt chu chhum lo chat lovin an hâm a; Thuthlung Bâwm zâwntute chu râlthuam kengin an rawn chhawm a.

¹⁴A ni hnihnaah pawh khua chu vawi khat an kal hual a, bûk lamah an haw leh a. Chutiang hlîr chuan ni ruk an ti a.

¹⁵A ni sarih ni erawh chuan kâwl ênah an tho va, an tih dân pângngaiin khua chu an kal hual leh a; chumi ni erawh chuan vawi sarih an kal hual a.

¹⁶An kal hual vawi sarihnaah chuan Josuan, “Au rawh u le, LALPA chuan khua hi a pe ta che u;

¹⁷a khaw pum leh a chhûnga awm zawng zawng te hi tihchhiat tûra LALPA tâna serh hran vek a ni. Kan mi tirhte lo humtunu avângin Rahabi leh a ina mi awm zawng zawng erawh chu zuah tûr a ni.

¹⁸Serh hran tlat tawh chu in awt palh ang e, pakhat tê pawh in la tûr a ni lo, in lâk chuan Israel-ho bûkah chhiatna râpthlâk tak in tithleng ang.

¹⁹Tangkarua te, rangkachak te, dâr te leh thîr te erawh chu LALPA sum bâwmah dah ṭhat tûr a ni,” a ti a.

²⁰Tichuan, puithiamte chuan tawtawrâwt chu fân ruaiin an han hâm a, miten chu chu an hriatin an au chiam a, kulh bang chu a chim ta a; mahni hma zâwn zâwnah an lût ta sung sung a, khua chu an la ta a.

²¹Khua chu an tichhe vek a, a chhûnga awm a hmei a pa, a pui a pang, bâwng te, berâm te, sabengtung te nên khandaihin an sât hlum vek a.

²²Ram enthlatute hnênah, Josua chuan, “Nawhchizuar inah kal ula, kha nu kha a neih zawng zawng nên va hruai chhuak rawh u,” a ti a.

²³Enthlatu tlangvâl, a ina thlengte khân Rahabi chu a pa te, a nuṭa te leh a laichîn hnai a awmpui te chu a neih zawng zawng nên an hruai chhuak a, Israel riahhmunah chuan an hruai a.

²⁴Khua leh a chhûnga awm zawng zawng chu an hâl vek a; tangkarua te, rangkachak te, darbêl te, thîr te erawh chu LALPA ina sum bâwmah an dah ṭha a.

²⁵Jeriko enthla tûra Josua mi tirhte a lo hum avângin nawhchizuar Rahabi chu a pa chhûngte nên, a neih zawng zawng nên Josua chuan a zuah a, Israel zîngah tûn thlengin an la tel ta reng a ni.

²⁶Chûng zawh chuan Josuan mipui chu a vau ta a: “Jeriko khaw din leh tumtu chuan LALPA ânchhia dawng rawh se, A lungphûm rem lehtu chuan a fa tîr chân sela, A kulh kawngka siamtu chuan a fa tlum chân rawh se,” a ti a.

²⁷ LALPA chuan Josua chu a awmpui a, ram pumah a hming a thang ta a.