Read Mizo Lushai Josua 7 Bible Online

Josua 7 - Mizo Lushai bible

Josua 7

¹Israel-te chuan thil serh hran tlat chu an pawisa lo va; Juda thlah Zera fa, Karmia fapa Akana chuan thil serh tlat ṭhenkhat chu a lo la a, Israel-te chungah LALPA chu a thinur ta hle a.

²Bethel chhak lam Beth-aven bula awm Ai khua en thlithlai tûrin Josua chuan Jeriko aṭangin mi a tîr a. Anni chu an chho va, Ai chu an han en thlithlai a.

³An lo haw a, Josua hnênah, “Mi zawng zawng chho teh suh se, mi sânghnih sângthum vêl chauh chho sela, Ai chu han bei rawh se, an tlêm khawp mai; mi zawng zawng tihhah a ṭûl lo,” an ti a.

⁴Mi sângthum vêl chuan an han bei a, Ai khaw mite hmaah chuan an tlânchhe ta a.

⁵Ai khaw mite chuan kulh aṭangin Sebarim thleng rawkin an ûm a, an tlân chhuk chu mi sawmthum leh paruk lai an that a. Israel-ho rilru chu a hnual a, an zâm ta hle a.

⁶Josua leh Israel upate chuan an puan an pawtthlêr a, LALPA Thuthlung Bâwm hmaah chuan an bawkkhup a, an lu-ah vaivut an phul a, tlai thlengin an bawk a.

⁷Josua chuan, “A va pawî em, LALPA Pathian, Amor mite sawisak tûr leh tihral mai tûrin engah kher nge Jordan lui min kal kaitîr teh rêng le? Jordan chhak lama awm kha lo lungawi tâwk mai ila a ṭha tûr.

⁸Aw LALPA, Israel-te chu an hmêlmaten an ûm ta mai si a, ṭawngna tûr pawh kan neih tâk loh hi.

⁹Kanan mite leh hêng rama awmten an hriatin min hual ang a, min that vek ang a, a mite pawh a hum zo lo an ti ngei ang che le,” a ti a.

¹⁰ LALPA chuan Josua hnênah, “Tho teh, bawk reng teh suh,

¹¹Israel-ten thil sual an ti alâwm. Ka thuthlung zâwm tûra ka tih chu an bawhchhia a, thil serh hran tlat aṭangin lâk an nei, an ru a, an zêp a, an thawmhnaw zîngah an thukru lehnghâl a.

¹²Chuvâng alâwm Israel-te hian an hmêlmate an ngam lohva, an tlânchhiat ni; ânchhia an dawng a ni. Lâk loh tûr in lâk kha in tihboral hma chu in hnênah ka awm lo vang.

¹³Tho la, mipuite chu thian fai la, an hnênah, naktûkah chuan inthian fai tûrin hrilh rawh. Israel-te Pathian chuan, ‘Israel-te u, in zîngah ânchhia a awm a ni, chu chu in zîng ata in then fai hma chuan in hmêlmate in ngam lo vang,’ a ti e, tiin hrilh rawh.

¹⁴Tichuan, zîngah a hnam hnamin lo kal sela, LALPA lo man hnam chu a chi chiin an lo kal leh tûr a ni; LALPAN chi a lo man aṭang chuan chhûngkuain an lo kal ang a, chhûngkua a lo man aṭang chuan, paho an lo kal leh tûr a ni.

¹⁵Thil serh tlat latu man chhuah chu hâl tûr a ni, a neih zawng zawng nên, LALPA thupêk, lâk loh tûr a tih chu a bawhchhia a, Israel tân thil zahthlâk tak a ti a ni,” a ti a.

¹⁶Josua chu zîng takah a tho va, a hnam hnamin Israel-ho chu an lo kal a, Juda thlahte chu man an ni ta a.

¹⁷Juda thlah zîngah Zer chi man an ni leh a, Zer-ho zîng aṭang chuan Zabdia chhûng man an ni leh a.

¹⁸Chu mi chhûngte zîng aṭang chuan Karmia fapa Akana, Zabdia tupa chu man a ni ta a.

¹⁹Josua chuan Akana hnênah, “Ka fapa, Israel-te Pathian, LALPA hmaah thu dik tak sawi rawh aw: Thupha chawi mai teh, eng nge i tih, zêp lovin min hrilh teh,” a ti a.

²⁰Akana chuan Josua chu a chhâng a, “Israel-te Pathian, LALPA lakah thil sual ka lo ti a ni.

²¹Kan thil man zîngah Babulon puan mawi tak, tangkarua sekel za bûk vêl leh sekel sawmnga vêl bûk rangkachak nên ka hmu a, ka awt êm a, ka la ta mai a ni. Ka puanin chhuatah ka phûm a, a hnuaihnung berah tangkarua chu ka dah kha,” a ti a.

²²Josua chuan mi a tîr a, puan inah chuan an kal a, a lo thukru ngei rêng a, a hnuai berah tangkarua chu a lo awm a.

²³Puan in ata chu an la a, Josua leh Israel-te hmaah chuan an rawn la a, LALPA hmaah chuan an dah a.

²⁴Josua leh Israel-te chuan Zera fapa Akana chu puan te, tangkarua te, rangkachakte leh a nupui fanau te, a bâwng te, a sabengtung te, a berâm te leh a neih zawng zawng nên Akor ruamah an hruai a.

²⁵Josua chuan, “Min timangang hle mai a, LALPA chuan vawiin hian a timangang ve dâwn che a nih hi,” a ti a. Mi zawng zawngin Akana leh a chhûngte chu lungin an dêng a, an neih zawng zawng nên chuan an hâl ta a.

²⁶A chungah chuan lung an vawm vûm thûr a, LALPA thinur chu a dai ta a. Vawiin thlengin chu ruam chu Akor ruam tih a la ni ta reng a.