Read Mizo Lushai Josua 8 Bible Online

Josua 8 - Mizo Lushai bible

Josua 8

¹ LALPA chuan Josua hnênah, “Hlau suh la, beidawng hek suh; Israel-te zînga indo thiam hruai vek la, Ai khua bei tûrin chho rawh. Ai khaw lal te, a mi te, a khawpuite leh a ramte chu i kutah ka pe tawh a che.

²An khua leh an lal chu Jeriko khua leh an lal i sawisak ang khân sawisa ang che; tûn ṭum hi chuan an berâm leh an rante chu mahni tân in lâksak dâwn nia. Khaw hnung lam aṭangin bei thut ang che u,” a ti a.

³Ai khua bei tûr chuan Josua leh a hote chu an insiam a. Josua chuan mi fel deuh deuh sîngthum a thlang chhuak a, zânah a kal chhohtîr a.

⁴“Khua chu a hnung lamah châng ru ula, khua aṭanga hla lovah biru ang che u, inring reng ang che u.

⁵Ka mite nên khua chu a hma lamah kan rawn bei ang a, min bei tûrin an lo chhuak ang a; a hma angin kan tlânchhe der ang a;

⁶khua aṭanga hla fe thleng min ûm hnuah, a hma ang khân kan tlânchhe tak tak emaw an ti ang.

⁷In bihrûkna ata in lo chhuak ang a, khua chu la ang che u. In Pathian, LALPA chuan a pe ang che u.

⁸Khua in lâk hnu chuan LALPA thu angin hâl rawh u. In tih tûr chu, chu chu a ni,” a ti a.

⁹Josua chuan anni chu a kaltîr a, Ai khaw thlang lam Bethel nêna an inkârah chuan an hual ru a, zânah Josua ho chu puan inah an riak a.

¹⁰Josua chu zîngah a tho va, a mite chu a ko khâwm a, Israel upate nên Ai khua chu an pan ta a.

¹¹Khaw kawtchhuah, hmâr lam tlângah a hote chuan ṭanhmun an khuar a, Ai khua nêna an inkârah chuan ruam a awm.

¹²Ai khawthlang lam, Bethel nêna an inkârah a rûka châng tûr mi sângnga a dah a.

¹³A sipai bupui chu hmâr lam aṭanga Ai khua bei tûr chuan an inrâlring a, khaw thlang lama lo châng tâwk an awm bawk a. Chumi zân chuan Josua chu ruamah chuan a kal a.

¹⁴Ai khaw lal chuan a lo hmu a, a mite nên zîngah an tho va; Israel-ho nêna an inbeihna Araba ruamah khân Israel-ho bei tûr chuan an chhuk leh ta a, an hnung lam aṭangin khawpui bei tûr biru an awm tih an hre lo.

¹⁵Josua leh Israel-te chu hlau âwm takin thlalêr lam panin an tlânchhe der a,

¹⁶Ai khuaa mite chu ûm tûrin an inpun khâwm a, Josua chu an ûm a, khua chu an chhuahsan ta vek a.

¹⁷Ai khaw mi zawng zawngin Israel-te chu an ûm a, khaw vêngtu pakhat mah an awm lo, khua chu a inhawng huai mai.

¹⁸ LALPA chuan Josua hnênah, “I fei khân Ai khua tin rawh, khua chu ka pe dâwn che a ni,” a ti a.

¹⁹Josuan a fei ken chuan Ai khua chu a tin a. Chutia a han tin vêleh chângtute kha an bihrûkna ata an lo zuang chhuak a, khuaah an lût a, an la ta mai a; khua chu an hâl ta hluah hluah a.

²⁰Ai khaw mite chu an han lehhawi a, an khaw kâng khu ngun ngun chu an hmu a, thlalêr pana tlânho khân an rawn bei lêt bawk a, tlânna tûr lam rêng an hre ta lo va.

²¹Josua leh Israel-te chuan châng rutute khân khua chu an la a, an hâl khu ngun ngun ta tih an hmuh chuan an lêt leh a, Ai mite chu an that ṭan ta a.

²²Khaw latute khân an rawn ûm bawk a, Israel-te chuan an kârcheh a, tu mah dam emaw, tlân chhuak emaw awm miah lovin an that a.

²³Ai khaw lal erawh chu a nungin an man a, Josua hnênah an rawn hruai a.

²⁴Ai khaw mi, Israel ûmtute kha, thlalêrah an lo that vek a, an sah hlum zawh chuan Ai khuaah Israel mi zawng zawng chu an kal a, chuta mi zawng zawng chu khandaihin an that vek a.

²⁵Ai khaw mi, chumi nia an thah chu a hmei a pain mi sîngkhat leh sânghnih an tling.

²⁶Ai khaw mi an thah zawh fai phiar hma chu Josua chuan a fei kha a lek reng a.

²⁷Josua hnêna LALPA thupêk angin ran an mansak te, an râllâk sumte chu mahni tân an nei a.

²⁸Tin, Josua chuan Ai khua chu a hâl chim vek a, tûn thlengin a ram a, bawlhhlawh vûm mai a ni ta.

²⁹Ai khaw lal chu a khai hlum a, tlai thlengin thingah a khai a, ni a tlâk chuan Josua thu angin a ruang chu an la thla a, khaw kulh kawngka sîrah chuan an paih a, lung an vawm hnan thûr a, tûn thlengin chûng chu a la awm.

³⁰Josua chuan Israel-te Pathian, LALPA tân Ebal tlângah maichâm a siam a.

³¹LALPA chhiahhlawh Mosian Israel-te hnêna thu a pêk, Mosia Dân bu-a ziak angin lung chher loh, thîra chher lohvin maichâm an siam a, LALPA hnênah hâlral thilhlan leh remna thilhlan an hlân a.

³²Israel-ho hmuh lai ngeiin Josua chuan Mosia dân chu lungah chuan a ziak chhuak a.

³³Israel-ho chu an upa te, hruaitu te, rorêltu te leh an zînga hnam dang awm vê te nên puithiam Levia-ho zâwn, Thuthlung Bâwm hawiin, lehlam lehlamah chuan an ding a. A zâtve chuan Gerizim tlâng an hmachhawn a, a zâtve chuan Ebal tlâng chu an hmachhawn a. Israel mipuite mal an sâwmsak dâwnin hetianga din ṭhin tûr tih Mosia thupêk ang khân an ding a.

³⁴An din fel chuan Dân bu-a thu zawng zawng, malsâwmna thu te, ânchhe dawn tûr thu te chu Josuan a chhiar chhuak a.

³⁵Israel mipui hmaah, hmeichhia te, naupangte leh an zînga kal ve hnam dang mite hmaah Mosia thupêk zawng zawng chu chhiar hmaih a nei hauh lo.