Read Mizo Lushai Josua 9 Bible Online

Josua 9 - Mizo Lushai bible

Josua 9

¹Jordan thlang lam tlângrama awm te, tlâng bulṭhut rama awmte leh Mediteranean tuipui kama Lebanon tlâng thlenga awm Hit-ho lal te, Amor lal te, Kanan lal te, Periz lal te, Hiv-ho lal te, Jebus lal te chuan Israel-ho chakzia an lo hria a.

²An inko khâwm a, Josua leh Israel-te chu lo beih rawn zai an rêl a.

³Gibeon khuaa awm Hiv mite chuan Jeriko leh Ai khua Josuan a sawisak dân an hriat chuan,

⁴finrâwl an thawh ve ta a. Palai ni âwm tak tak an insiam a, ip hlui tak hi sabengtung an phurhtîr a, an uain savun ip, hlui peh ver vurte chu bel ṭup a ni a,

⁵pheikhawk hlui, bel ṭiam ṭuam an bun a, kawr hlui tak tak an ha a. An chhang kente chu a khirin a hmuar uar a.

⁶Israel-te riahhmun Gilgal-ah chuan Josua an rawn pan a, a hnênah, “Ram hla tak aṭangin kan lo kal a, inremna thu i thlung ang u,” an ti a.

⁷Israel mite chuan, “He lai hnaia mite in nih chuan thu kan thlunpui thei lo vang che u,” an ti a.

⁸Josua hnênah, “I chhiahhlawh kan nih hi,” an ti a. Josua chuan, “Tute nge in nih? Khawi lam aṭanga lo kal nge in nih?” a ti a.

⁹Anni chuan, “I chhiahhlawhte hi ram hla tak aṭanga lo kal kan ni. In Pathian, LALPA chanchin kan lo hria a, Aigupta rama a thil tih hmingthang tak tak te,

¹⁰Jordan râla Amor lal Sihona, Hesbon lal chungah te, Basan lal Astarot khua Oga chunga a thil tih te kan lo hria a.

¹¹Kan upate leh kan ram mite chuan, ‘Zan riak chaw keng ula, anni chu va hmu ula, in chhiahhlawh kan ni a, thu min thlunpui rawh u, va ti ang che u,’ min ti a.

¹²Kan chhang kente hi kan lo chhuah tûk chuan a la lum thar thar a; tûnah zawng a khirin a hmuar tawh hi.

¹³Kan savun ip tharte pawh a peh zo tawh a, kan thawmhnaw te, kan pheikhawkte pawh kan lo kal thui êm tawh avângin a hniar veng vung tawh a nih hi,” an ti a.

¹⁴Israel mite chuan an chhang chu an lo eisak a. LALPA an râwn lo.

¹⁵Josua chuan ṭhiana inhmang tûrin thu a thlunpui a, tihhlum loh a tiam a, Israel pungkhâwmho hruaitute pawh chuan an tiam a.

¹⁶Thu an tiam hnu ni thum lekah chuan chûng mite chu an ṭhenawm, an bul lawka awmte an ni tih an hre ta a.

¹⁷Tichuan, Israel-hote chu ân insawn a, ni thum an kal a; chung mite awmna khua Gibeon te, Kafira te, Kiriat-jearim te chu an va thleng a.

¹⁸Chûng mite chu Israel mite chuan an khawih thiang lo, Israel-te Pathian, LALPA hmingin an hotute chuan thu an lo tiam tlat tawh si a. Pungkhâwmho chuan an hotute chu an dem hle a.

¹⁹Hruaitute chuan pungkhâwmho hnênah, “Israel-te Pathian, LALPA hming chhâlin thu kan lo tiam a, kan khawih a thiang tawh lo.

²⁰Kan thutiam avângin an nun kan zuah tûr a ni: chutilo chu, Pathian kut kan tuar ang.

²¹Zuah ila, kan thing phurtuah leh tui chawitu-ah an ṭang dâwn nia,” an ti a.

²²Gibeon mite chu Josuan a ko va, “Kan bul hnai maia awm si, ram hla tak aṭanga lo kal kan ni tiin engtizia nge min bum le?

²³Hetianga in tih avângin Pathian ânchhia in dawng ta, Pathian ina tuah tûr thing phurtu leh tui chawitu atân chhiahhlawh in ni reng dâwn a ni,” a ti a.

²⁴Josua chu an chhâng a, “LALPA, in Pathian chuan a chhiahhlawh Mosia chu ram pum pui hi pe tûr che uin a ti a, in kalnaa awm apiang that vek tûrin a ti ngei bawk che u a. Chu chu kan lo hria a, kan hlau êm êm che u a, khati khân kan ti ta mai a nih kha, kan hlauh vâng che u a ni.

²⁵In kutah kan awm hi, ṭha in tih ang chuan min ti ang chu,” an ti a.

²⁶Josua chuan hetiang hian a ti ta a: anni chu a hum a, Israel-ten an thah a khap a,

²⁷bawihah a siam thung a. Israel mipuite leh LALPA maichâm tâna thing phurtu leh tui chawitu-ah a dah ta a. Vawiin thleng hian amah an biakna tûr LALPA hmun ruatah chuan chûng hna chu an thawk ta a ni.