Read Mizo Lushai KHUAA MITE HNENA TIRHKOH PAULA LEHKHATHAWN PAHNIHNA THESSALONIKA 3 Bible Online

KHUAA MITE HNENA TIRHKOH PAULA LEHKHATHAWN PAHNIHNA THESSALONIKA 3 - Mizo Lushai bible

KHUAA MITE HNENA TIRHKOH PAULA LEHKHATHAWN PAHNIHNA THESSALONIKA 3

¹A tâwp berah chuan, unaute u, min ṭawngṭaisak rawh u. Lalpa thu chu in zîngah ropui tak leh chak taka a darh ang khân a darh zêl theihna tûr leh,

²mi dik lo leh mi sualte laka kan him theihna tûrin. Mi zawng zawngin an la ring si lo.

³Lalpa erawh chu a rinawm a, ani chuan a tichak che uin mi sual lakah chuan a vêng him ang che u.

⁴Thu kan pêk che u angin in ti a, in tih zêl pawh Lalpaah chuan kan ring tlat a ni.

⁵Lalpa chuan in thinlungte chu Pathian hmangaihna hre lehzual tûr leh Krista anga dawhtheihna nei tûrin kaihruai rawh se.

⁶Unaute u, kan hnên aṭanga zirtîrna an dawn anga awm lo unau, dâwngdah taka awm zawng zawng laka inthiarfihlîm tûrin kan Lalpa Isua Krista hmingin thu kan pe a che u.

⁷Nangmahni ngeiin kan tih dân zir tûr in nih in hria a, in zîngah dâwngdah takin kan awm ngai loh kha.

⁸Tu chaw mah a thlâwnin kan ei ngai lo va, in zînga mi tu mah kan tihhautak lohna tûr che uin chhûn leh zân hah tak leh rim takin hna kan thawk ṭhîn a nih kha.

⁹In mi châwm kan phût theih loh vâng a ni lo va, in mi entawn atân tiin kan thawk zâwk ṭhîn a ni.

¹⁰In hnêna kan awm lai khân, “Hna thawk peih lo tawh phawt chuan ei pawh ei suh se,” tiin kan hrilh ṭhin che u kha.

¹¹In zînga ṭhenkhat an dâwngdah a, mahni hna thawk si lovin mi hnaa inrawlh an chîng tih kan lo hria a ni.

¹²Chutiang mite chu thawk mawlh mawlha mahni thawh chhuah ring tûrin Lalpa Isua Krista hminga thu pein kan fuih a ni.

¹³Unaute u, nangni zawngin thil ṭha tih ning suh u.

¹⁴Tu pawhin he lehkhathawna kan thu sawi hi an zawm duh loh chuan chhinchhiah bîk ula, kawm serh rawh u, an zah theihna tûrin.

¹⁵Amaherawhchu, hmêlma ang chuan ngai lo ula, unau angin zilh zâwk rawh u.

¹⁶Remna Lalpa ngei chuan kumkhuain kawng tinrêngah remna pe che u sela, Lalpa chu in zaa hnênah awm rawh se.

¹⁷Kei Paulan keima kut ngeia chibai ka bûkna che u a nih hi. Hetianga ka ziak hi ka lehkhathawn apiang chhinchhiahna a ni.

¹⁸Kan Lalpa Isua Krista khawngaihna in zaa hnênah awm rawh se.